¹ Yehova wahanjikile kuli Mose ngwenyi, ² " Ambila atu a mu Yizalele walweze, ' Muze mununjila mu chifuchi cha Kanana, chifuchi muchi kapwa nyi chenu, chifuchi cha Kanana nyi njiza ja cho, ³ njiza yaku chitokelo mu yi katoha kukatuka kupuya ya Zini nyi kupalika ku njiza ya Endome. Songo lya ku chivumbuko lya njizakutwala kusango lya chitende cha mungwa. ⁴ Njiza yenu yikali koneke kusango kukatuka kumulundu wa Akambime nyi kupalika ndusu ndo kupuya ya Zine. ⁵ Kukatuka kukuze, mwika palika kusanga lya Kandeshe Mbane nyiku tuhika ku Haza Anda nyi kutwalilila ku Azimone. Kukatuka kukuze, njiza mwikalikoneka kukatuka ku Azimone muka nwihi nyi ngenge ya Engitu nyi kwi kaula kukalunga lwiji. ⁶ Njiza yakuchitokelo mwika pwa ngenge yakalunga lwiji munene. Aino mwikapwa njiza yakuchitokelo. ⁷ Njiza yenu yakuto mwikatoha chize ku mufunda munuka funjika kukatuka ku kalunga lwiji munene ndo kumulundu wa Hole, ⁸ chocho chize kumulundu wa Hole ndo ku Lembo Hamate, nukahete ku Zandande. ⁹ Acho njiza yika twalilile ku Zifolene nyi ku sula ha Hazale Enene. Aino muyikapwa njiza ya kuto. ¹⁰ Acho nwatela kufunjika njiza yenu yaku chivumbuko kukatuka ku Hazale Enane ku sango ndo ku Shefame. ¹¹ Acho njiza yaku chivumbuko yikapalumuke kukatuka ku Shefame ndo ku Limbalane, kusali lya chivumbuko cha Ayine. Njiza muyika palumuka kusesa ya chivumbuko chakalunga lwiji wa Kinalete. ¹² Acho njiza muytikatwalilila ku sango sali ya kalwiji wa Yodau nyiku ka lunga lwiji wa mungwa nyi ku twalilila ku njiza yamututuko wa kalunga lwiji wa mungwa. A chino mu chikapwa chifuchi chenu, nyi kulita nyi njiza jacho nyi ku chi jingilika. "' ¹³ Acho Mose yamba kuli atu a Yizalele ngwenyi, " Achino che chifuchi chize munutambula hakuta chela, chize Yehova wambile ahane kuminyachi livwa nyi ku chihanda cha hamuchima wamunyachi. ¹⁴ Munyachi wa ana ja Lubene, kakaula chihinga cha yuma ja tulamba twa munyachiwo, nyi munyachi wa ana ja Ngate, nyi kulita kaula nyi chihinga cha ikumba twa tulamba wa munyachiwo, nyi chihanda cha munyachi wa Manase eswe hanatambula chifuchi cho. ¹⁵ Minyachi yali nyi chihanda cha minyachi hana tambula chihinga cha chifuchi musali ya Yodau ha Yeliko kuchivumbuko, kutalikisa ku utuhukilo wa tangwa. ¹⁶ Yehova wahanjikile kuli Mose ngwenyi, ¹⁷ " Awa e ma jina a malunga waze manutetela chifuchi chikapwe chihinga chenu: Eleazale sasendote nyi Yoshua mwana Nune. ¹⁸ Watela kusakula tetekeli umuwika ha munyachi weswe hanga atetele chifuchi chikapwe chihinga cho. ¹⁹ Majina ja malunga wano: kukatuka kumunyachi wa Yunda, kalemba mwana wa Yefune. ²⁰ Kukatuka kumunyachi wa maswana a Simone, Shemuele mwana wa Amihunde. ²¹ Kukatuka kumunyachi wa Mbenjamine, Elindande mwana wa Kiselone. ²² Kukatuka kumunyachi wa maswana a Ndane tetekeli , Mbuke mwana wa Yongile. ²³ Kukatuka ku yihinga ya Yosefu, kumunyachi wa yihinga ya Manase tetekeli, Hanele mwana wa Efende. ²⁴ Kukatuka kumunyachi wa yihinga ya Efelaime tetekeli , Kemuele mwana wa Shifetane. ²⁵ Kukatuka kumunyachi wa yihinga ya Zepulone tetekeli, Elizafane mwana wa Palanake. ²⁶ Kukatuka kumunyachi wa yihinga ya Isaka tetekeli, Palitele mwana wa Hazane. ²⁷ Kukatuka kumunyachi wa yihinga ya Ashele tetekeli, Ahihunde mwana Solomi. ²⁸ Kuktatuka kumunyachi wa yihinga ya Napetali tetekeli, Pendahele mwana wa Amihunde. ²⁹ Yehova wambile wano atu aka tete chifuchi cha Kanana nyi kuhana munyachi weswe wa Yizalele chihinga cho.