¹ Halyapwila atu alinyenyetene ha ukala wo muze Yehova evwile. Yehova yevwa wano atu wapwile nyi utenu. Kahya kakuli Yehova kalekwokele hakachi ko nyi kulalisa kusongo lya chilombo. ² Mba atu yateta kuli Mose, nawa Mose yalemba kuli Yehova, mba kahya yikajima. ³ Chize chihela yachiluka ngwo Tembela, mumu kahya kakuli Yehova kalekwokele hakachi ko. ⁴ Mbunga ya atu yakulichinga atwamine nyi ana A-Yizalele. yafupa kulya chipema. Mba A-Yizalele alilile cheka nawa ngwo iya matwaha yifwo tukalye? ⁵ Tunewuluka yishi waze twapwile nyi kulya chawana mu Engitu, nyi kasakwa, nyi ulenga, nyi sawola, nyi kalumungu. ⁶ Halyapwila pwila yakulya hiyatuwa, mumu yeswe yize tunamono mana wika. " ⁷ Mana yapwile ngwe mbuto ya kolindu. Yasolokele ngwe ndelyume. ⁸ Atu alimwangine nyi kuyinkunga. Ayichekele nyi mawe, hanji kuyitwa muchinu, ayitelekele mu ndeho, alingile nayo tumbolo. Nawa kuyipanjika ngwe maji. ⁹ Muze mume wasulumyokene hachilombo ha ufuku, ye mana yaholokele. ¹⁰ Mose wevwile atu kanalili muyisemuka yo, nyi mutu mweswe wapwile ku chikolo cha mbalaka yenyi. Yehova wapwile nyi utenu, mba ku meso ja Mose kukungulwila chapihile. ¹¹ Mose yamba kuli Yehova ngwenyi, " Kuchi te hinwangulinga chipi yami kavumbi kenu? kuchi te chawanyine vumbi kumeso jenu? nukangutwike chiteli cha wano atu eswe. ¹² Te yami nasesekele ufumba wa wano atu nyi? te yami nasemene hanga nukambe kuli yami ngwe, ' Wambate mukondo ye ngwe chisemi mukwa kulela mambata mwana unapape? ' ndo kuchifuchi chize yena walakenyene nyi sango kuhana kuli tulamba two nyi ? ¹³ Kulihi munguwana yifwo nguhane kuli wano atu eswe? mumu kanalili kuli yami ngwo, ' Twehe yifwo tukalye. ' ¹⁴ Chahashile ukawami kumbata wano atu eswe. Mumu chalema naye kuli yami. ¹⁵ Nyi munulinga chocho kuli yami, ngushihenu hapwila - nyi hinawana vumbi kumeso jenu - kanda nungwecha kumona lamba lyami. " ¹⁶ Yehova yamba kuli Mose ngwenti, " Ngukungulwile yami makumi shimbyali kuli makulwana A- Yizalele. Waze ananyingika ngwe kapwa makulwana ja e atu nyi tulayi two. Wanehe ku mbalaka ya chikungulwila hanga a maneko hamwe nyi yena. ¹⁷ Munguhulumuka mba kwenako munguka hanjika nyi yena. Mungukachiza kuli yena Shipilitu yoze uli hali yena mungu musa hali ayo. Mba kumakambata chiteli cha atu hamwe nyi yena. Hanga kuchikachimbata yena ukawe. ¹⁸ Amba ku atu ngwe, nulisele ku usandu yenu ene, mumuhatangwa lya hamene kumunukalya yifwo, mumu nwalilile nawa Yehova ha nwivwa. Nwambile ngwenu, "Iya matwaha yifwo tukalye? mumu chapwile chipema kuli yetu mu Engitu." Halyoze Yehova manwaha yifwo, nawa munuilya. ¹⁹ Kunuchi kalya yifwo tangwa limuwika, matangwa aali, matangwa atano, matangwa kumi, chipwe makumi aali a matangwa. ²⁰ Alyoze munukalya yifwo kakweji mweswe ndo muyikatuhuka ku mazulu jenu. kumuyikanusekela mumu hinwalituna Yehova, yoze watwama hakachi kenu. Hinwalila kumeso jenyi. Ngwenu, " Yika te twakatukilile ku Engitu? ""' ²¹ Mose yamba ngwenyi, " Yami ngulino atu hapwa makumi asambano a tununu, nawa hinwamba ngwenu, ' Mungwaha yifwo yakulya kakweji mweswe. ' ²² Kumanyi twashihile mapanga nyi ngombe akaakuchise nyi ? hanji kwakwachila yishi eswe a mukalunga lwiji maswila hamuwika akaakuchise? " ²³ Yehova yamba kuli Mose ngwenyi, " Te kwoko lyami hilyahina nyi ? Halyapwila munumona nyi maliji jami a umwenemwene. " ²⁴ Mose yakatuka yambulwila ati maliji ja Yehova. yakungulula makumi shimbyali a atu makulwana yaasela kwa kujingilika mbalaka. ²⁵ Yehova yahulumuka hashi mulelwa yahanjika nenyi Mose. Yehova yachiza kuli Shipilitu yoze wapwile hali Mose nyi kusa hali e atu makumi shimbyali a makulwana. Muze te mwe Shipilitu hapwila hali ayo, o yapulofeteza, alyoze haze hene wika kachilingile nawa. ²⁶ Malunga aali yasala muchilombo, majina jo umwe Endande nyi Mendande. Mwe Shipilitu yapwila hali ayo. Majina jo a sonewene mumukanda alyoze kayile ku mbalaka. O yapulofeteza mu chilombo. ²⁷ Mukweze umwe mu chilombo wazombokele nyi kwambulwila Mose, " Endande nyi Mendande kanapulofeta mu chilombo. " ²⁸ Yoshua mwana wa Nune, kavumbi ka Mose, wakuli malunga a kutongola, yamba kuli Mose, " Mwata Mose, wakanyise kama. " ²⁹ Mose yamba kuli iye ngwenyi, " Unaavwila ukwa mumu hali yami? Ngunazange kachi atu eswe a Yehova kapwa apulofeta, hanga ase hali ayo Shipilitu yenyi yeswe! " ³⁰ Mose nyi makulwana A-Yizalele yahiluka mu chilombo. ³¹ Mba kwakatukile fuji yimwe ya kuli Yehova nyi kuneha ngwali a ku kalunga lwiji. Ndo kukamwihi nyi chilombo, kusali likwo ngwe wenyi wa tangwa. Kwakujingilika chilombo ngwe mbandu jali helu lya hashi. ³² Atu akungile ngwali tangwa lize lyeswe, ufuku weswe, nyi muze hikwacha tangwa lyeswe. Kwakuhi yoze wakungile kumi likehe lya homele lya e ngwali. O yalipangila ngwali eswe mu chilombo. ³³ Shimbu ye yifwo yichili ku mazo jo, shimbu kanda achiyinjakula, utenu wa Yehova yiukasumukina ali e atu. yalamba atu nyi chikola chinene chinji. ³⁴ Yaluka chize chihela jina ngwo Kombolote - Hatava, mumu kwenako afunjile atu waze evwvile usolo wa yifwo. ³⁵ Katuke ku kombolote - Hatava atu endele ndo ku Hazelote, mba yatwama kwekuze.