¹ Lamba ku chihnda chazalamo nyi manyinga! Chato nyi mahuza nyi upite wa kupupa; akwa lamba kali muli iye shimbu jeswe. ² Alyoze kuli zungo lya shikote nyi lundunjila wa yijingo, kutumbwoka cha tuvwalu, nyi kulundumuka cha matemba. ³ Akwa tuvwalu kanalundumuka, nyi mikwale yinapeyima nyi mikunga yina lejima ! Mulumba ya afu, mijimba keshi kuhasa kwalula - Akwa kole jo kakutalinga ha mijiba yo. ⁴ Chino cheswe china lingiwa ha mulonga wa chitanji yoze mupema, kali kumekume mu wanga, wakulanjisa mavungu mu utangi wenyi, nyi atu jenyi kupalikila mu itanga yenyi ya wanga. ⁵ "Tala, kalimika nyi yena - chenacho anambe Yehova wa tujita - keshika mungukufukula mahina je ndo ku meso hanga mavungu akamone uselesele we , nyi mavungu, akamone sonyi je nyi ku myanangana. ⁶ Mungukukuwa luchisa mungukusaula; mungukupwisa chitaletaly kume. ⁷ Wola mukeza muze mutu mweswe makutala masuswamyana nyi woma ngwo, 'Ninive hamwenyeka; iya mamulilila kama ?'Kuli munguya nguwane yoze ma kulembejeka? " ⁸ Ninive, kuma yena uli mupema kuhyana Tembese yoze watwamina ku kalwiji wa Nilo, wakujingilika nyi meya yoze watengele kalunga - lwiji, chipanga chenyi, nyi meya kapwile chipanga chenyi? ⁹ Kushi Ingitu japwile tachi jenyi nyi sango l;ya kuhi ku tachi; nyi Pute nyi Alumbimi apwile yikwashi jenyi. ¹⁰ Hindu Tembese yamutwala; yaya ku ufunge; Anenyu yashiha shiha yateta teta muyipinji ha makano eswe; malunga jenyi alemu yatela chela nyi, malunga anene akashile malenge. ¹¹ Nyi yena nawa mukazengewa; nyi yena muweseka kuswama, nawa mukafupa chiswamo kuli akwa kole je. ¹² Yihunda je eswe akukoleka kumapwa ngwe mitondo ya mikuya ya mihuko yitangu kuhya: Nyi mayinyingika, muyiholoka mu kanwa lya mukwa kulya. ¹³ Tala, atu ali hakachi ke mapwo;yikolo ya chifuchi che yapwa ya washi kuli akwa kole je; yikungo yenyi hiyawema nyi kahya. ¹⁴ Yenu tahenu meya ha jita ya kuseleka; kolesenu yihunda yenu ya tachi; yenu ku uma chakenu ndambo; kwatenu misheke ya ndope. ¹⁵ Kahya mukanulisa, nyi katana manutetaho. Manulya ngwe mbuto yize hayilya kuli makumbi lyozesenu yenwene ngwe makumbi, okenu ngwe mapasu. ¹⁶ Hinwokesa akwa kulanjisa kuhyana tutongonoshi a mwilu; alyoze kali ngwe ana ja makumbi: kakwenyeka chihela mazazulula mapulwa jo mahumuka. ¹⁷ Alemu jenu kanapu ngwe mapasa, nyi akwa kusonyeka jenyi ngwe malelwa jamakumbi waze akupupwila ha yipanga ha tangwa lya chishika. Mba muze tangwa mulivumbuka kakuhumuka, nyi ku chihela kuze akuya wakwihi waku nyingika ko. ¹⁸ Mwanangana wa Asulya, tufunga twe mu tulo ali; Alemu je kana pombo hashi kanahwimi. Atu je hana mwangana ha milundu, nyi akwa kwakungulula akuhi. ¹⁹ Yilonda ye kahashile kuyiwuka. Yilonda ye Yinene. Eswe waze mevwa sango ja kwonona che. Masakwila koshi nyi uwahililo hali yena. Yiya yoze kanyingikine ngwe shili jenu jina twalilila?