¹ "Talenu, himungutuma kanganda kami, iye kuma lulika jila ha lutwe lya yami. Mba Mwene, yoze nwakufupa, susumuku meza mu tembele yenyi. Kanganda wa usendo yoze nwakuwahilila, talenu, meza," chocho anambe Yehova wa Tujita. ² Alyoze iya mahasa kumana ha tangwa lya kwiza chenyi? Iya mahasa kujikiza ha kusoloka chenyi? Mumu iye makapwa ngwe kahya ka mukwa kupemesa olu nawa ngwe sambau yakupemesa. ³ Iye makatwama ngwe mukwa kupemesa nyi kuwayisa palata, iye makatomesa ana ja Levi. Iye makapemesa ngwe olu nyi palata, mba makaneha milambu ya ululi kuli Yehova. ⁴ Mba mulambu wa Yunda nyi Yelusaleme mu wuwahila Yehova, ngwe mu matangwa a shakulu, nawa ngwe mu matangwa a myaka ya kushi. ⁵ "Mba mungukakundama kuli yenu ha upatwilo. Mungukapwa chela keshi kulaluka wa kuhisa yimbanda, nyi yitanji, nyi waze akwa kulishinga nyi mahuza, nyi hali waze akwiya fweto kuli mukwa milimo, nyi waze akupinjisa tuliwa nyi shiwa, nyi waze akukapula njize, nyi hali waze keshi ku ngwivwila woma," chocho anambe Yehova wa Tujita. ⁶ "Mumu yami, Yehova, chishi kwalumuka; keshika enu ana ja Yakomba kanunongesele. ⁷ Chize ku matangwa ja tulamba twenu hi nwahambuluka ku shimbi jami nawa hinwajifungile ko. Hilukenu kuli yami nyi yami munguhiluka kuli yenu," Chocho anambe Yehova wa Tujita. "Alyoze nwaakwamba ngwenu, 'Kuchi mutuhiluka?' ⁸ Mutu mahasa kwiya kuli Zambi? hindu yenu nunangwiyi. Alyoze nwakwamba ngwenu, 'Kuchi tunakwiyila?' Ha yihanda yenu ya kumi nyi milambu. ⁹ Nunashingiwa nyi shingo, mumu ha kwiya kuli yami, che chifuchi cheswe. ¹⁰ Nehenu yihanda yeswe ya kumi mu zuwo lya kutulikila, hanga mukapwe kulya mu zuwo, halyapwila nukangweseke nacho muli chino," chocho anambe Yehova wa Tujita, "Nyi chishi kunwazulwila manjanela a mu malilu nyi kunuzukwila yiwape yakulumbama hali yenu, ndo kukushi kapwa nawa chihela cha kutulikilaho yeswe. ¹¹ Mungukanjishila mukwa kwonona mihuko ya mavu jenu, hanga keshi konwona kucha cha mafuchi enu. Mitondo yenu ya uva kuyishi kaholola mihuko shimbu kanda yichihya" Chocho anambe Yehova wa Tujita. ¹² "Mafuchi eswe makanutongola kupwa awaha, mumu munupwa chifuchi cha kuwahilila," chocho anambe Yehova wa Tujita. ¹³ "Maliji jenu hapwa atachi akulimika nyi yami," Chocho anambe Yehova. "Alyoze nwakwamba ngwenu, 'Kuchi twahanjika hakachi ka yetu kulimika nyi yena'? ¹⁴ Hinwamba ngwenu, 'Chapwa chamokomoko kulingila Zambi. Chika mutufumbula ha kufunga shimbi yenyi chipwe kwenda nyi kulinyenga ku meso ja Yehova wa Tujita? ¹⁵ Chocho halyapwila twakutambika waze akulinga chipi ngwo kawaha. Akwa kulinga chipi kakuwaha, nichikwo nawa alyoze kakweseka Zambi nyi kulilamwina.'" ¹⁶ Mba waze akwivwila woma Yehova ya hanjika kuli umwe nyi mukwo. Yehova yapanjika nyi kwivwa, mba yasoneka mukanda wa kwiuluka kumeso jenyi hali waze akwivwila woma Yehova nyi waze akulemesa jina lyenyi. ¹⁷ "Kumakapwa nyi ami," chocho anambe Yehova wa Tujita, "Upite wami yoze nazanga, ha tangwa lize mungukalinga. Mungukevwila keke, ngwe chizechene mutu akwivwila keke mwanenyi yoze wakumuvumbika. ¹⁸ Mba nawa munukahandununa hakachi ka akwa ululi nyi akwa yingulungulu, hakachi ka yoze wakuwayila Zambi nyi yoze keshi kuwayila Zambi.