¹ Keshika yenu asasendote, yino shimbi yili kuli yenu. Yehova wa Tujita kanambe ngwo, ² "Nyi kunushi kupanjika, nawa nyi kunushi kuchisa ku mbunge yenu mukulemesa jina lyami" " mba mungutuma shingo hali yenu, yiwape yenu munguyishinga. Chamwenemwene, hinawashinga, mumu kunushi kusa shimbi jami mu mbunge yenu. ³ Talenu, himungukanjisa mbuto yenu, mungukwita tuji ha meso jenu, tuji anakatuka ku milambu yenu, nyi yenu manumbata hamwe nayo. ⁴ Mununyingika ngwo yami hinatuma shimbi yino kuli yenu, hanga usendo wami nyi levi ukakole," chocho anambe yehova wa Tujita. ⁵ "Usendo wami nyi iye wapwile mwono nyi sambukila, namuheleyo; hanga akevwe woma, mba yangwivwila woma yami, yachikima jina lyami. ⁶ Shimbi ya mwenemwene yapwili mu kanwa lyenyi, mahuza kapwileho ha mivumbo yenyi. Iye wendele nyi yami nyi sambukila nyi ululi nawa watembwile anji ku uhenge. ⁷ Mumu mivumbo ya sasendote chatamba kufunga yinyingi nyi atu chatamba kufumba shimbi kukatuka ku kanwa lyenyi, mumu iye mwe kanganda ka Yehova wa Tujita. ⁸ Alyoze hinwahambuluka mu jila ya umwenemwene. Hinwatalingisa anji kupwa ukuhona kufunga shimbi. Hinwalumbula usendo wa levi," chccho anambe Yehova wa Tujita. ⁹ "Chocho hinanupwisa akwa kulela, nwasuka kumeso ja atu eswe, mumu ku nwafungile jila jami, alyoze hinwalinga katonde nyi shimbi." ¹⁰ Te eswe hi tata umuwika ko? Katutangile kuli Zambi umuwika? Kuchi te twakuhona ufulyelo umwe kuli mukwo, nyi kujilulula usendo wa tulamba jetu? ¹¹ Yunda kalinga nyi mafwefwe. Halinga chuma chakuvwisa lwaji mu Yizalele nyi mu Yelusaleme. Mumu Yunda ha jilula chihela chisandu cha Yehova chize azanga, mba hanambate mwana wa tu zambi amwe atundaka. ¹² Keshika mutu yoze malinga chino Yehova akamuteteho ha mbalaka ya Yakomba, yoze mukwa kushindakenya nyi yoze mukwa ku kumbulula, hanji yoze maneha mulambu kuli Yehova wa Tujita. ¹³ Nyi chikwo nwakulinga: nwakufuka chilumbilo cha Yehova nyi masoji, nyi kulila nyi mikuma, mumu keshi ku utala mulambu chipwe ku utambula nyi vumbi ku moko jenu. ¹⁴ Alyoze nwakwamba ngwo, "Kuchi te kautambwile?" mumu Yehova wapwile chela hakachi ka yena nyi pwo wa mu ukweze we, kuwalalaminyine kuli iye, chipwe apwile sepa lye nyi pwo lye wa usendo. ¹⁵ Iye katulingilile shipilitu nyi kuwasa hamuwika nyi? Mba kuchi te anulingilile kupwa umuwika? Mumu kafupile mulambu kuli Zambi. Chocho fungenu yenwene mu shipilitu yenu, niumwe kanda apwa nyi mafwefwe kuli pwo lya ukweze wenyi. ¹⁶ "Mumu kulakula changupihila," chocho anambe Yehova, Zambi ya Yizalele, "Nyi yoze mafuka mazalo jenyi nyi upupilo," chocho anambe Yehova wa Tujita. " Keshika keyelenu kuli yenwene kanda nupwa nyi mafwefwe." ¹⁷ Hinwakatalisa Yehova nyi maliji jenu. Alyoze nwakwamba ngwo, "Mba kuchi te hi twamukatalisa?" Hakwamba ngwo, "Mweswe yoze wakulinga chipi kanapeme ku meso ja Yehova, iye kakuwahilila no," chipwe "Kuli ali Zambi wa upatwilo wa kulita?"