¹ Yehova yamba kuli Mose , ngwenyi , ² " Twala Alone nyi anenyi a malunga hamuwika nenyi nyi e mazalo nyi e maji a ha shili nyi kuji wa ngombe wa mulambu wa shli , nyi kuji a mapanga aali , nyi mulonga wa mbolo kuyishi ufutunwiso . ³ Ukakungulule chikungulwila cheswe ku chikolo cha mbalaka ya chikungulwila . " ⁴ Chocho Mose walingile chize Yehova amutumine , mba chikungulwila chaswile ku chikolo cha mbalaka ya chikungulwila . ⁵ Mba Mose yamba ku chikungulwila ngwenyi , " Chuma chino Yehova hachituma tuchilinge . " ⁶ Mose yaneha Alone nyi anenyi a malunga yaasanyisa nyi meya . ⁷ Yamujika che chikuto yamujichika we muya wa ponda mu mbunda yenyi , yamusa lye hina lya ngungu nyi ye efonde , ya mujichikayo nyi muya wa ponda wa ulangaji wa ku efonde . ⁸ Yamusa che chipwiko , mba mu chipwiko yasa Ulimi nyi Tumimi . ⁹ Yamusa chitambala ku mutwe wenyi , mba kuchitambala , kulutwe , wasele chipenya cha olu , che chipangula chisandu , chizechene ngwe Yehova wamutumine . ¹⁰ Mba Mose wanjile majia kuwyisa no , ya wayisa tambanakulu nyiyize yeswe yilimo yayisela ku usandu . ¹¹ Yasapwila maji ha chilumbilo yisuho shimbyali , yawayisa chilumbilo nyiyikashi yacho yeswe , nyi sahanyi nyi nganda yalwo akayisele ku usandu wa Yehova . ¹² Yazujila amwe maji a ku wayisa no hamutwe wa Alone yamu wayisa akamusele ku usandu . ¹³ Mose yaneha ana ja Alone ja malunga nyi kwajika yikuto . Yaajichika miya ya ponda nyi kwajichika yitambala , chizechene ngwe Yehova amutumine . ¹⁴ Mose yaneha kuji ya ngombe wa mulambu wa shili , Alone nyi anenyi a malunga yasa moko jo ha mutwe wa kuji ya ngombe yoze haneha wa mulambu wa shili . ¹⁵ Yamushiha nyi kwanda manyinga ha munwe wenyi , yaakomona ha mbinga ja chilumbilo , ha kujingilika nyi kupemesa chilumbilo , yazujila manyinga ku shina lkya chilumbilo , nyikachisela ku usandu wa Zambi hanga akafukile shili . ¹⁶ Yanda maji eswe a ha a yihanda yeswe yamukachi nyi ha lyayi m nyi njiso jali hamuwika nyi maji jaho , ayo Mose yayilumba ha chilumbilo . ¹⁷ Alyoze mwe kuji , nyi kupu lyenyi , nyi yifwo yenyi , nyi ufwachi wenyi , ayo yayocha nyi kahya haze lya chilombo , chizechene ngwe Yehova amutumine . ¹⁸ Mose wakunjikile kuji ya panga ha mulambu wa kulumba , Alone nyi anenyi a malunga yasa moko jo ha mutwe wa kuji . ¹⁹ Yamushiha nyi kusapwila manyinga kujingilika ha chilumbilo . ²⁰ Yahananwona mwe kuji ya panga ya lumba mutwe nyi yipinji nyi maji . ²¹ Yakosa yiihanda yamukachi nyi molu mu meya , mba yalumba mwe kuji ya panga mweswe ha chilumbilo . Akapwe mulambu wa kulumba wa lupembo mupema , mulambu wa kahya kuli Yehova chizechene ngwe Yehova watumine Mose . ²² Mba yakunjika panga mukwo , mukwo te yoze wa kwatumbikila ku usasendote , Alone nyi anenyi a malunga yasa moko jo ha mutwe wa kuji . ²³ Alone yamushiha , mba Mose yanda manyinga yaakomona ha songo lya twitwi lya chindume lya Alone , nyi hamunwe wa shina wa kwoko lyaenyi lya chindume , nyi ha munwe wa shina wa kulu lyenyi lya chindume . ²⁴ Yaneha ana ja Alone a malunga , mba yakomona amwe manyinga ha masonga ja matwi jo a chindume nyi ha minwe ya shina ya moko , nyi molu jo a chindume . Mba Mose yasapwila manyinga kwa kujingilika ha chilumbilo . ²⁵ Yanda e maji , nyi muchila wa maji nyi maji eswe a ha yihanda ya mukachi nyi maji a ha lyayi , nyi njiso jeswe jali nyi maji jano , nyi chilama cha chindume . ²⁶ Kukatuka mutonga wa mbolo yize kuyishi futunwiso yatwama kumeso ja Yehova , yanda chandanda chimuwika kuchishi futunwiso , nyi chandanda chimuwika cha mbolo ya maji , nyi likemba umuwika , yayisa ha maji nyi ha chilama cha chindume . ²⁷ Ayo yeswe yayitumbika mu moko ja Alone nyi mu moko ja anenyi a malunga akayihungisa mulambu wa kuhungisa kumeso ja Yehova . ²⁸ Mba Mose yayichiza ha moko jo nyi kuyilumba ha chilumbilo . Kupwa nyi mulambu wa kulumba . Yikapwe mulambu kulitumbikila ku usandu wakuneha lupembo mupema . Mulambu wa kahya kuli Yehova . ²⁹ Mose yanda lye pambo yali hungisa mulambu wa kuhungisa kumeso ja Yehova . Lyapwile lya mbala lya Mose lya ku kuji ya panga mulambun wa kulitumbikila ku usasendote , chizechene ngwe Yehova wamutumine . ³⁰ Mose yanda chihanda cha maji kuwayisa nyi chihanda cha manyinga ; chapwile ha chilumbilo ; yasapwila hali Alone , nyi ha mazalo jenyi , nyi ha anenyi , nyi ha mazalo anenyi amalunga hamuwika nenyi . Chocho yasela ku usasendote , Alone nyi mazalo jo kuli Yehova . ³¹ Mba Mose yamba kuli Alone nyi anenyi a malunga ngwenyi , " Telekenu ye yifwo ku chikolo cha mbalaka ya chikungulwila , nukayilye kuze kwene hamuwika nyi mbolo yize yili mu mutonga wa kulisela kuusandu , ngwe chize nanwambile , ngwami , 'Alone nyi anenyi a malunga akayilye '. ³² Chize muchisala cha ku yifwo nyi mbolo nukachoche . ³³ Kanda nutuhuka ku chikolo cha mbalaka ya chikungulwila ndo matangwa shimbyali , ndo matangwa jenu ja kulitumbikila ku usasendote hahwa . Mumu Yehova makanusela ku usasendote ha matangwa shimbyali . ³⁴ Chize halinga musono - Yehova wachitumine kuchilinga kunufukila shili . ³⁵ Kwe ku chikolo cha mbalaka ya chikungulwila mukatwama matangwa shimbyali mwalwa nyi ufuku , nyi kufunga chiyulo cha Yehova , kuchina munufwa , mumu chocho angutumine . " ³⁶ Chocho Alone nyi anenyi a malunga alingile yuma yeswe Yehova walwezele muli Mose .