¹ Ayi ye shimbi ya mulambu wa uhye yino . Wapwa usandu wahyana . ² Akashihe mulambu wa uhye ha chihela cha kumushihila , akasapwile manyinga kujingilika ha chilumbilo . ³ Akalambule maji eswe : muchila wa maji , nyi maji a ha yihanda ya muchima , ⁴ je njiso jeswe jiali nyi maj jaho , a ku myalangwe , nyi maji a ha liayi , akaachize hamwe nyi njiso . ⁵ Mwe sasendote makayilumba ha chilumbilo mulambu wa kahya kuli Yehova . Awu we mulambu wa uhye . ⁶ Malunga eswe hakachi ka asasendote mahasa kulya . Makalya homa hasandu wapwa usandu wahyana . ⁷ Mulambu wa uhye wapwa chizechene ngwo mulambu ha shili . Shimbi yimuwika yikwete . Muupwa wa mbala wa sasendote yoze mafuka nawo shili . ⁸ Sasendote mweswe malambula mulambu wa kulumba hali umwe akazuke lye kupu lya mulumbu wa uze halambula . ⁹ Mba mulambu weswe wa wunga wa kwocha mu fono hanji wa kulinga mu chikango , hanji mu foma muukapwa wa mbala wa sasendote yoze maka ulambula . ¹⁰ Mulambu weswe wa wunga , chipwe wa kuchinga nyi maji , chipwe umu ukapwe wa ana eswe a Alone mweswawo mutu nyi mutu . ¹¹ Yino ye shimbi ya chitapo cha mulambu wa sambukila mutu malambula kuli Yehova . ¹² Nyi umwe makaulambula ha kusakwila , akalambule hamwe nyi chitapo cha kusakwila yandanda kuyishi futunwiso , ya kuchinga nyi maji , nyi malikemba keshi futunwiso , a kulembula nyi maji , nyi yandanda ya wunga wafufunuka ya pwocha nyi maji . ¹³ Nawa ha mulonga wa kuhana kusakwila , akalumbe nyi sambukila chandanda chaufutunwiso . Sambukila ha kusakwila . ¹⁴ Mba akalambule umuwika ukapwe mulambu wa kuzundula kuli Yehova . Muukapwa wa mbala wa sasendote mukwa kusapwila manyinga a mulambu wa sambukila . ¹⁵ Yoze mahana chitapo cha mulambu wa sambukila ha kusakwila akayilye tangwa lize lyene haulambula . Kanda achihichika nyichimwe chihanda chayo chikasale ndo chimene . ¹⁶ Nyi chitapo cha mulambu wenyi muchikapwa cha chilakenyo , hanji cha vumbi , akachilye tangwa lize lyene hachilambula , mu kucha nawa makalya chize chasala . ¹⁷ Alyoze , chize yifwo ya chitapo chasala ndo tangwa lya muchitatu makachocha nyi kahya . ¹⁸ Nyi yifwo yimwe ya chitapo cha mulambu wa sambikila makayilya ha tangwa lya chitatu , kanda ayitambula , kanda ayalula kuli mu kwa kulambula . Muyikapwa chuma cha luchisa , mweswe makayilya makambata uhenge wenyi . ¹⁹ Yifwo yize muyikakwata ha chuma cha luchisa kanda ayilya . Akayoche nyi kahya . Alyoze yifwo yasala , yoze unapeme mahasa kulya . ²⁰ Alyoze , mweswawo makalya yifwo yachitapo cha mulambu wa sambukila wa Yehova - shimbu kali nyi luchisa makamuteta kuli atu jenyi . ²¹ Nyi umwe makakwata chimwe cha luchisa chipwe luchisa wa mutu hanji kashitu wa luchisa hanji luchisa , wa lwaji - mba chocho makalya yifwo ya chitapo cha mulambu wa sambukila wa Yehova , makamuteta kuli atu jenyi . "' ²² Mba Yehova yamba kuli Mose , ngwenyi , ²³ " Amba kuli A-Izalele ngwe , 'Kanda nulya maji apwe a ngombe , apwe a panga , apwe a pembe . ²⁴ Maji a kashitu yoze malifwila , hanji maji a kashitu hamushiha kuli ngongo munulinga no cheswacho nunazange , alyoze kanda nwalya ka . ²⁵ Mweswawo makalya maji a kuli kashitu wa kulambula nyi kahya kuli Yehova , kumakamuteta kuli atu jenyi . ²⁶ Kanda nukalya manyinga nyi amwe mu mazuwo jenu , atujila chipweatushitu . ²⁷ Yoze makalya manyinga eswawo , makamuteta kuli atu jeni . "' ²⁸ Yehova yamba kuli Mose ngwenyi , ²⁹ " Amba kuli A-Izalele ngwe , 'mweswe malambula chitapo cha mulambu wa sambukila kuli Yehova akanehe mulambu wenfyi kuli Yehova . ³⁰ Chitapo cha Yehova cha kulumba ha kahya , akanehe nyi moko jenyi . Akanehe maji nyi pambo , hanga lye pambo akalihungisa mulambu wa kuhungisa kumeso ja Yehova . ³¹ Sasendote akalumbe e maji ha chilumbilo , alyoze pambo mulikapwa lya mbala lya Alone nyi anenyi . ³² Nukahane chilama cha chindume munukahana kuli sasendote chikapwe mulambu wa kuzundula wa ku yitapo ya milambu yenu ya sambukila . ³³ Sasendote , ana ja Alone , yoze makalambula manyinga nyi maji a milambu ya sambukila - chilama cha chindume muchika pwa nyichenyi . ³⁴ Mumu hinatambula ku ana A-Izalele , pambo lya chitapo chakuhungisa , nyi chilama che chakuhana , nyi kuyihana kuli Alone ka sasendote nyi ana jenyi amalunga kupwa chihanda cho . ³⁵ Chino muchipwa chihanda cha Alone nyi anenyi a malunga cha ku milambu ya Yehova ya kulumba nyi kahya , ha tangwa lize aakunjikile kuli Yehova akamulingile usasendote . ³⁶ Chino che chihanda chize Yehova wa alwezele kwaha kuli A-Izalele , hatangwa a wayishile asasendote . Muchikapwa chihanda cho ndusu ku yisemuka yeswe . ³⁷ Yino ye shimbi ya mulambu wa kulumba , nyi ya mulambu ha shili , nyi ya mulambu wa uhye , nyi ya kulitumbikila , nyi ya chitapo cha mulambu wa sambukila , ³⁸ yize Yehova yatuma Moze ha mulundu wa Sinayi tangwa lize atumine A-Izalele akalumbule milambu yo kuli Yehova mu puya ya Sinayi . "'