¹ Kuli kunakatuka jita nyi kuli kunakatuka kulitachika hakachi kenu? Hi ku usolo ko uze wakwasa jita mu yihanda yenu nyi? ² Nwakwivwa usolo , alyoze kunwazukile . Nwakushiha nyikwivwa chipululu , alyoze kunwahashile kuzuka. Nwakulitachika nyi kwasa jita . Kunushi nyi chimwe mumu kunushi kwita. ³ Nwakwita alyoze kunushi kutambula mumu nwakwita ha yipi , hanga nukachinwisa ha usolo wenu. ⁴ Yenu yitanji ! kunwanyingikine ngwo usepa nyi chifuchi cha hashi ha kole kuli Zambi ? Keshika mweswe mapala kupwa kasendo ku akwa hashi malipwisa mukwa kole kuli Zambi. ⁵ Shina nunashinginyeka ngwe chisoneko chinahanjika chamokomoko . '' Shipilitu yoze wakutwama muli yetu kakwivwa ukwa''? ⁶ Alyoze Mwene kakuhana vumbi yahyana , keshika chisoneko chinambe ngwo , ''Zambi kakulimika nyi akwa kulivwa , alyoze kakuhana vumbi kuli akwa kulikehesa.'' ⁷ Keshika lizeyesenu kuli Zambi . Alyoze limikenu nyi ndyapu , mba kumakanuchina. ⁸ Kundamenu kuli Zambi , iye kumakakundama kuli yenu . Pemesenu moko jenu , yenu akwa shili , tomesenu mbunge jenu , yenu atu akwa mbunge jaali. ⁹ Lungajalenu , nenganyanenu , nyi kulila ! kuseha chenu chalumuke kunenganyana nyi uwahililo wenu walumuke kuhonga ku meso. ¹⁰ Likehesenu kumeso ja Mwene , nyi Iye kumakanulemesa. ¹¹ Kanda nuhanjika chipi umwe hali mukwo nyi mukwo, mandumbu . Yoze mahanjika chipi hali ndumbwenyi hanji yoze mapatwila ndumbwenyi mahanjika chipi ha shimbi nyi mapatwila shimbi. Alyoze kachi yena mupatwila shimbi , hi uli mukwa kulinga shimbi ko , alyoze uli sopi. ¹² Kwali sopi umuwika mukwa kuhana shimbi. Yoze mahasa kulamwina mahasa kwonwona. Alyoze yena iya wakupatwila mukwenu? ¹³ Achivwenu , yenu nwakwamba , '' Musono hanji hamene mutukaya ku limbo lya nganji , mutukatwamako mwaka , mutukasepa , nyi kupwa nyifweto . '' ¹⁴ Alyoze kunwanyingikine chize muchipwa ha tangwa lya hamene, nyi mwono wenu kuchi upwa ? Unapu chishichishi chize muchisoloka ha shimbu likepe nyi kulutwe muchitoka. ¹⁵ Shinaho, chanutamba kwamba ngwenu , '' Kachi Mwene mapala , nyi kachi mutupwa nyi mwono nyi ka chi mutukalinga chino nyi chize . '' ¹⁶ Alyoze halyapwila nwakulisamba ha kuzata chenu . Kulisamba chino cheswe chipi. ¹⁷ Keshika kuli yoze manyingika kulinga kanawa alyoze keshi ku chilinga , kuli iye kuchapwa shili.