¹ Tiyangu , ndungo ya Zambi nawa ya Mwene Yesu Kilishitu , kumavungu kumi nyi ali waze ana nwangashana: Nguna nu meneka. ² Chinyongenu kupwa kuwahilila cheswe , mandumbu jami, muze yeseko yakulihandununa mu inuwana. ³ Nuna nyingika ngwe kweseka cha ufulyelo wenu ku chakulinga ku nyongonona. ⁴ Echenu kunyongonona chenu chikapwe nyi chitanga chipema hanga nukapwe angunu amu undu, nyi ku hona nyi chimwe . ⁵ Nyingwe umwe wa muli yenu ma zanga mana , echenu akete kuli Zambi , yoze wakuhana nyi ku vungununa keshi kuchoka kuli waze eswe aku mwita, nawa kumaka mwaha. ⁶ Alyoze akete nyi ufulyelo , kanda ayamashana nyi chimwe . Mumu mweswawo yoze mayambashana kali ngwe mukanya waha kalunga lwiji wakuhehuka nyi fuji nyi himu ufuza. ⁷ Mumu yoze mutu kanda akashinginyeka ngwe makatambula chuma chimwe kuli Mwene ; ⁸ Kali mutu wa mbunge jaali , wa kukokoloka mumajila yenyi eswe. ⁹ Echenu ndumbu mukehe akalisambe muze mamulemesa, ¹⁰ alyoze pichi hakumulelesa, mumu ku makahwa ngwe itemo ya mwambu. ¹¹ Mumu tangwa muli vumbuka nyi chivukuminya lyacho nyi mwambu mu uma. Itemo mu iholoka , nyi upeme wacho mu uhwa . Mujila imuwika , pichi kumaka jimuka mukachi kajila yenyi. ¹² Kawaha mutu yoze manyongonona mucheseko . Mumu muze makumba cheseko , kumakatambula chipangula cha mwono , chize hanalakenya kuli waze azanga Zambi. ¹³ Mutu nyi umwe muze mamweseka kanda amba ngwenyi , '' Kanangweseka kuli Zambi ,'' mumu Zambi kechi ku hasa kumweseka nyi yuma ipi , chipwe iye mwene keshi kweseka nyi umwe. ¹⁴ Alyoze mutu nyi mutu mamweseka kulita nyi usolo wenyi mwene , uze mu umutwala nyi ku mu songojola. ¹⁵ Mba usolo muze mu seseka , mu usema shili , nyi shili muze mu ikola , muisema kufwa. ¹⁶ Kanda a nwonga , mandumbu jami a zango. ¹⁷ Yawana yeswe ipema nyi yawana yingunu yakukatuka mwilu . Yakwiza hashi kukatuka kuli mwetata wa pangu . Kuli iye kukushi kwalumuka chipwe chizulye cha kuteuluka . ¹⁸ Zambi nyi upale wenyi mwene watu semene kuliji lya umwenemwene , hanga tukapwe mulali umwe wa mihuko itangu ku yuma yeswe ize atengele. ¹⁹ Nuna nyingika chino , ma ndumbu jami a zango : Mutu nyi mutu ali pupwise kwivwa , makoke mukuhanjika , nawa makoke mukutenuka. ²⁰ Mumu utenu wa mutu ku ushi kulinga ululi wa Zambi . ²¹ Keshika mbilenu maliji eswe nyi ku lumbama cha uhulya . Mukushimbika tambulenu liji lize atumbile muli yenu , lize mulihasa kulamwina mbunge jenu. ²² Pwenu akwa kulinga lye liji kanda nupwa akwa kwivwa wika , nunalyongo yenwene . ²³ Kachi umwe mapwa mukwa kwivwa liji alyoze hi mukwa kulinga ko , kali ngwe mutu matala meso jenyi mukatalilo. ²⁴ Malitala tala mwene haze hene maya washi washi mavulama chize apwanga . ²⁵ Alyoze mutu yoze matalakanawa mu shimbi ingunu ya utuswilo, nawa manyongonona mukuchilinga , se iye kapwile mukwa kwivwa wa kuvulama , yono mutu makamukisula mu itanga yenyi. ²⁶ Kachi umwe mali shinginyeka kupwa mukwa kuwayila shimbu keshi kuhombola limi lye nyi , kakwonga mbunge yenyi nawa u wayilo wenyi wamokomoko. ²⁷ Uwayilo upema ku ushi luchisa kumeso ja Zambi yetu mwe Tata chino kukwasa ana a shiwa nyi tuliwa muluyinda wo , nawa nyi kuli funga mwene ke shi chipeka kuyuma ya hano hashi.