Kapetulu 1
1
Shimbu yamyaka Zambi wahanjikile kuli tulamba juthu kupalikila mu apulofita ha shimbu jinji nyi mu jila jinji.
2
Mba hamatangwa wano akusula , hanahanjika kuli yethu muli Mwanenyi , yoze hanatongola kupwa swana wa yuma yeswe . Muli yiye mwe Zambi watangile chifuchi .
3
Mwenawo mwe kuhenya cha uhenya wa Zambi , chimanyino cha kupwa chenyi. Aye kakukwachisa yeswe hamuwika ku liji lyatachi jenyi. Muze te hamanununa shili , yiye hana twama kukwoko lya chindume lya ulamba wa mwilu.
4
Yiye hapwa mwene kuli angelo ngwe jina hanahingi hilinahyana ma jina jo.
5
Mumu ku mungelo muka yoze Zambi wambile ngwenyi , ''Ena uli Mwanami , musono hinapwa Tatenu''? chipwe kuli angelo aka Zambi wambile , '' Mungukapwa Tato kuli yiye , nawa makapwa Mwana kuli yami''?
6
Mba nawa , muze Zambi haneha mutangu mu chifuchi , yamba , ''Angelo eswe ja Zambi anatela kumuwayila .''
7
Hakutwala ku angelo yamba , '' Yiye wakupwisa angelo janyi mashipilitu , nyi tuvumbi twenyi milengi ya kahya.''
8
Mba kuli Mwana yamba , '' Chitwamo chawanangana we , Zambi , cha myaka yamitolo yeswe . Mulumbu wa ululi we mulumbu wa wanangana we.
9
Hiunazange ululi nyi kupihilila ungulungulu . Keshika Zambi , Zambi ye , hakuwahisa nyi maji asambukila kuhyana akwenu .''
10
''Mu uputukilo, Mwene , wasele fundamentu ya hashi malilu yitanga ya moko je.
11
Yino kumuyikalyenyeka, alyoze yena uli wahaya myaka . Ayo kumuyika papujoka ngwe chipinji cha hina .
12
Mukayivunga ngwe hina , nawa neyo kumuyikalumuka ngwe chipinji cha hina . Alyoze yena ushikwalumuka, nyi ye myaka ye kuyishi kusula.''
13
Mba ku angelo aka waze Zambi alwezele ha shimbu yimwe , '' Twama ku kwoko lya chindume ndo mungu pwisa akwa khole je chitwamo cha molu je''?
14
Angelo eswe hi mashipilitu ko waze akuvumbika , nyi waze hanatumu kufunga akwa kuhinga ulamwino nyi?