¹ Shimbu yamyaka Zambi wahanjikile kuli tulamba juthu kupalikila mu apulofita ha shimbu jinji nyi mu jila jinji. ² Mba hamatangwa wano akusula , hanahanjika kuli yethu muli Mwanenyi , yoze hanatongola kupwa swana wa yuma yeswe . Muli yiye mwe Zambi watangile chifuchi . ³ Mwenawo mwe kuhenya cha uhenya wa Zambi , chimanyino cha kupwa chenyi. Aye kakukwachisa yeswe hamuwika ku liji lyatachi jenyi. Muze te hamanununa shili , yiye hana twama kukwoko lya chindume lya ulamba wa mwilu. ⁴ Yiye hapwa mwene kuli angelo ngwe jina hanahingi hilinahyana ma jina jo. ⁵ Mumu ku mungelo muka yoze Zambi wambile ngwenyi , ''Ena uli Mwanami , musono hinapwa Tatenu''? chipwe kuli angelo aka Zambi wambile , '' Mungukapwa Tato kuli yiye , nawa makapwa Mwana kuli yami''? ⁶ Mba nawa , muze Zambi haneha mutangu mu chifuchi , yamba , ''Angelo eswe ja Zambi anatela kumuwayila .'' ⁷ Hakutwala ku angelo yamba , '' Yiye wakupwisa angelo janyi mashipilitu , nyi tuvumbi twenyi milengi ya kahya.'' ⁸ Mba kuli Mwana yamba , '' Chitwamo chawanangana we , Zambi , cha myaka yamitolo yeswe . Mulumbu wa ululi we mulumbu wa wanangana we. ⁹ Hiunazange ululi nyi kupihilila ungulungulu . Keshika Zambi , Zambi ye , hakuwahisa nyi maji asambukila kuhyana akwenu .'' ¹⁰ ''Mu uputukilo, Mwene , wasele fundamentu ya hashi malilu yitanga ya moko je. ¹¹ Yino kumuyikalyenyeka, alyoze yena uli wahaya myaka . Ayo kumuyika papujoka ngwe chipinji cha hina . ¹² Mukayivunga ngwe hina , nawa neyo kumuyikalumuka ngwe chipinji cha hina . Alyoze yena ushikwalumuka, nyi ye myaka ye kuyishi kusula.'' ¹³ Mba ku angelo aka waze Zambi alwezele ha shimbu yimwe , '' Twama ku kwoko lya chindume ndo mungu pwisa akwa khole je chitwamo cha molu je''? ¹⁴ Angelo eswe hi mashipilitu ko waze akuvumbika , nyi waze hanatumu kufunga akwa kuhinga ulamwino nyi?