¹ Muze ino yuma yeswe hi yeza hali yenu, che chiwape nyi lye shingo ize hinasa ku meso jenu, mba ha kwiulula ha kachi ka mavungu eswe kuze Yehova Zambi yenu hanu humina, ² mba muze munuhiluka kuli Yehova Zambi yenu nyi ku zeyela liji lyenyi, kukaula yeswe ize nguna nwambe musono- yenu nyi ana jenu - nyi mbunge jenu jeswe nawa nyi alma jenu jeswe, ³ mba yehova Zambi yenu kuma ka lumuna ufunge wenu nawa makanu vwila keke; makanukungulula ku mavungu eswe kuze Yehova Zambi yenu anu mwanginyine. ⁴ Nyi umwe wa kuli yenu kali mu chifuchi cha unjize hashi lya malilu, ku kuze Yehova Zambi yenu makanukungulula, nawa kwenako maka nusaka. ⁵ Yehova Zambi yenu makanuneha mu chifuchi chize chapwile cha tulamba twenu, mba nuka chizuke nawa; makanulinga ipema nawa makanwokesa kuhyana chize alingile akakenu. ⁶ Yehova Zambi yenu maka nupwisa ngalami ku mbunge jenu nyi we mwono wenu weswe, hanga nutwame nyi mwono. ⁷ Yehova Zambi yenu makasa mashingo wano eswe hali a kwa kole jenu nyi hali waze anuvwila kole, waze anu hungumyonene. ⁸ Munu kahiluka nyi ku zeyela liji lya Yehova, nawa munukalinga shimbi jenyi jeswe jize nguna nwambe musono. ⁹ Yehova Zambi yenu makanufumbula chinji mu milimo yenu yeswe ya moko jenu, nyi ku mihako ya majimo jenu, nyi ana a imuna yenu, nyi mbuto ja ha mavu jenu, hanga nu fumbuke. Mumu Yehova nawa maka wahilila haku nufumbwisa, ngwe chize awahilile hali atatenu. ¹⁰ Makalinga chino nyi muzeyela liji lya Yehova Zambi yenu, mukufunga shimbi jenyi nyi yiyulo yenyi inasonewa mu mukanda uno wa shimbi, nyi mu nwalumukina kuli Yehova Zambi yenu nyi mbunge jenu jeswe nyi mwono wenu weswe. ¹¹ Mumu shimbi jino nguna nwambe musono hi jikaluko chinji kuli yenu, nyi hanji kupwa kusuku nyi kuheta. ¹² Kujishi mu malilu, hanga nwa mbe ngwo, iya matuzezukila mwilu atuhulumwine jo nyi kutukwasa ku jiva, hanga tujilinge? ¹³ Chipwe ku ja pwile musali lya kalunga lwiji, hanga nwambe ngwo, iya matuyila musali lya kalunga lwiji atu nehene jo nyi ku tu kwasa ku jiva, hanga tujilinge? ¹⁴ Alyoze liji lili hakamwihi chinji nyi yenu, mu makanwa jenu nyi mu mbunge jenyi, hanga nu jilinge. ¹⁵ Talenu, musono hinasa kumeso jenu mwono nyi upema, kufwa nyi nyi yipi. ¹⁶ Nyi munu zeyela yiyulo ya Yehova Zambi yenu, ize nguna nwambe musono ku zanga Yehova Zambi yenu, kwenda mujila jenyi, nyi kufunga shimbi jenyi, yiyulo yenyi, nyi upatwilo wenyi, munupwa nyi mwono nawa mu nwoka, nawa Yehova Zambi Yenu manu wahisa mu chifuchi chize nu nayi nyi kuchizuka. ¹⁷ Alyoze nyi mbunge jenu mujiteuluka, nawa kunuchi kwivwa alyoze manukoka mmunu waila tu zambi kweka nyi kutu vumbika, ¹⁸ nguna nwambulwila musono ngwami chamwenemwene kumunu kakuwa; kunuchi kwo kesa matangwa jenu mu chifuchi nuna zauka Yodawu nyi ku chizuka. ¹⁹ Ngunatambika malilu nyi hashi yinushindakenye musono ngwami hinasa mwono nyi kufwa, uwahiso nyi shingo; keshika sakulenu mwono hanga nupwe nyi mwono, yenu nyi ana jenu. ²⁰ Lingenu chino muku zanga Yehova Zambi yenu, ku zeyela liji lyenyi , nyi ku lalaminya kuli iye. Mumu iye mwono wenu nyi kwoka cha matangwa; lingenu chino hanga nukatwame mu chifuchi chize Yehova alishingile kuli tulamba twetu, kuli Apalahama, kuli Izake, nyi kuli Yakomba, akahecho. "