¹ Mose nyi makulwana a Izalele yamba kuli atu ngwo, "Fungenu shimbi jeswe nguna nwambe musono. ² Ha tangwa lize munukazauka Yodawu nyi kuya ku chifuchi chize Yehova Zambi yenu ma mwaha, nuka mike mawe anene anene nyi kwa shingula nyi ndambo. ³ Nukasonekeho maliji eswe a shimbi yino muze hinwa zauka; hanga nukanjile mu chifuchi chize Yehova Zambi yenu ana nwehe, chifuchi chize china zala nyi yamwa nyi uchi, ngwe Yehova, Zambi ya tulamba twenu, hana nu lakenya. ⁴ Muze hinwa zauka Yodawu, nukamike mawe ano waze nguna nwambe musono, ha mulundu wa Epale, nyi kwashingula nyi ndambo. ⁵ Nukatungileko Yehova Zambi yenu, chilumbilo cha mawe; mba kanda nuka zundula chikungo cha utale ha kutunga. ⁶ Nukatungile Yehova Zambi yenu chilumbilo cha mawe a muwundu; nukalambwileho milambu ya kulumba kuli Yehova Zambi yenu. ⁷ Nawa nuka lambule mulambu ya sambukila nyi kulila ko; nuka wahilile kumeso ja Yehova Zambi yenu. ⁸ Nukasoneke ha e mawe maliji eswe a shimbi ino akalumbunuke pundu. " ⁹ Mose nyi asasendote, Alevi, yahanjika kuli Aizalele eswe ngwo, " Holenu nawa panjikenu,Aizalele: Musono hinwapwa atu ja Yehova Zambi yenu. ¹⁰ Keshika zeyelenu ku liji lya Yehova Zambi yenu nyi ku zeyela shimbi nyi yiyulo yenyi ize nguna nwambe musono. " ¹¹ Mose yahana shimbi kuli atu ha tangwa lize lyene ngwenyi, ¹² " Wano mavungu aka mane ha mulundu wa Ngerizime mu kuwahisa atu: Muze hinwa zauka Yodawa: Simeone, Levi, Yunda, Yisaka, Yosefe, nyi Mbenjamine. ¹³ Wano e mavungu makamana ha mulundu wa Epale mu ku shinga: Rupene, Ngate, Ashe, Zapulone, Ndane, nyi Napatali. ¹⁴ Alevi aka kumbulule nyi kwamba ku malunga eswe a Izalele mu liji linene ngwo: ¹⁵ ' Akashingiwe mutu yoze masonga kapwonya chipwe ma zuzulula umwe, chizelwokeso kuli Yehova, yalinga ya moko ya chilangaji, nyi yoze wa kumu mika kutenga . ' Mba atu eswe ambe ngwo, ' Amene. ' ¹⁶ 'Kashingiwa mutu yoze malelesa tato hanji naye. ' Mba atu eswe ambe ngwo, ' Amene. ' ¹⁷ 'Kashingiwa mutu yoze matutula njiza ya mwenyembo wenyi.' Mba atu eswe ambe ngwo, 'Amene. ' ¹⁸ ' Kashingiwa mutu yoze mapyangula ka puputa mujila. ' Mba atu eswe ambe ngwo, 'Amene. ' ¹⁹ ' Kashingiwa mutu yoze mahengesa upatwilo wa chilambala, shiwa, chipwe tuliwa. ' Mba atu eswe ambe ngwo, 'Amene. ' ²⁰ 'Kashingiwa mutu yoze mapomba nyi pwo lta tato, mumu iye ha mbata chize cha tato. ' Mba atu eswe ambe ngwo, ' Amene. ' ²¹ 'Kashingiwa mutu yoze mapomba nyi kashitu mweswawo. ' Mba atu eswe ambe ngwo, 'Amene. ' ²² ' Kashingiwa mutu yoze mapomba nyi ndumbwenyi, mwana wa pwo wa tato, chipwe mwana wa pwo wa naye.' Mba atu eswe ambe ngwo, 'Amene. ' ²³ 'Kashingiwa mutu yoze mapomba nyi naye weno. ' Mba atu eswe ambe ngwo, 'Amene. ' ²⁴ 'Kashingiwa mutu yoze mashiha mukwo kutenga. ' Mba atu eswe ambe ngwo, 'Amene. ' ²⁵ 'Kashingiwa mutu yoze matambula chijiko hanga ashihe mukwa kusamba. ' Mba atu eswe ambe ngwo, 'Amene. ' ²⁶ 'Kashingiwa mutu yoze keshi kukolesa maliji a shimbi ino, ngwo ku mazeyela. ' Mba atu eswe ambe ngwo, ' Amene. '