¹ Paulu , nyi Selevmwanu , nyi Timoteu , ku chikungulwila cha A-Tesalonika mulu Zambi Tata yetu nyi Mwene Yesu Kilishitu . ² Vumbi kuli yenu nyi sambukila ya kuli Zambi Tata yetu nyi Mwene Yesu Kilishitu . ³ Chatutamba kusakwila kuli Zambi matangwa eswe hali yenu , mandumbu , ngwe chize chinalite , mumu ufulyelo wenu kuwakutatuka kuhyana , nyi zango lya mweswe wa kuli yenu eswe umwe kuli mukwo nyi mukwo kulyakulumbama . ⁴ Chocho yetwene twakulisamba hali yenu mu yikungulwila ya Zambi ha uhumikizo wenu nyi ufulyelo mu yihungumyona yenu yeswe , nyi mu luyinda yoze nwakulihumikiza nenyi . ⁵ Chenacho chinyingi pundu cha upatwilo wa ululi wa Zambi , hanga akanunyonge akwa kutela wanangana wa Zambi , uze nwa kuvwila lamba . ⁶ Se chapwa ululi kuli Zambi kufweta luyinda kuli waze akunupinjisa , ⁷ nyi kuli yenu anapinjisa kumunuhwima hamwe nyi yetu , ha usolwelo wa Mwene Yesu mwilu hamwe nyi angelo ja tachi jenyi ⁸ mu kuhya kamilengi , akakale milonga ya waze kanyingika Zambi nyi hali waze keshi kwononoka ku sango lipema lya Mwene wetu Yesu . ⁹ Kumakamona lamba lya mutolo nyi kwenyeka waze anahandunuka ku meso ja Mwene nyi ku uhenya wa ngolo jenyi . ¹⁰ Makalinga achino muze makeza ha tangwa lize hanga aka muchichimyeka muli atu asandu jenyi hanga akamukomoke waze eswe akwa kufulyela , mumu shindakenyo yetu kuli yenu nwafulyelele . ¹¹ Mumu yachino keshika twakunulembelela matangwa eswe , hanga Zambi yetu akanumone akwa kutela kutambika chenyi nyi mungolo jenyi yiye hanga akamanune kuha cheswe cha upema nyi yitanga yeswe ya ufulyelo . ¹² Twakulemba achino hanga akachichimyeke jina lya Mwene wetu Yesu muli yenu , nyi yenu , nyi yenu muli yiye , nyikulita nyi vumbi lya Zambi yetu nyi lya Mwene Yesu Kilishitu .