¹ Hapwila A-Filisitiya yasa jita nyi a Yizalele. Malunga a Yizalele yachina kumeso ja Filisiiya yafwa ha mulundu wa Ngiboa. ² A-Filisitiya yakaulu hakamwihi Saulu nyi ana jenyi. A-Filisitiya yashiha Njonatasi, nyi Ambinandambu, nyi Maliki-Shua, ana ja Saulu. ³ Jita yashata chikolo hali Saulu, ngashi yamuwana. Yamulemeka chikolo. ⁴ Mba Saulu yamba kuli mukwa kumumbachila yitwa yenyi, "Tomona katana ke ungutuwe nenyi. Kuchina, awa yilima kumeza nyikunguwana mba mangutuwa nyi kunguyunga." Alyoze yoze mukwa kumumbachila yitwa yenyi katayile, mumu wevwile woma chikolo. Chocho Saulu wanjile katana kenyi yaholokelaho. ⁵ Muze yoze mukwa kumumbachila yitwa yenyi yamona ngwo Saulu hafwa, neye yaholokela ha katana kenyi yafwa hamuwika nyi iye. ⁶ Chocho Saulu yafwa, nyi ana jenyi atatu, nyi mukwa kumumbachila yitwa yenyi - eswe wano yafwa hamuwika hatangawa lize lyene. ⁷ Muze malunga ja Yizalele waze apwile sali likwo lya chikulo, nyi waze apwile sali likwo lya Yodau, yamona ngwo malunga ja Yizalele kanachina, nyi Saulu nyi ana jenyi te hafwa, yahichika yihunda yo mba yachina, mba A-Filisitiya yeza yatwamamo. ⁸ Chapwile nawa tangwa lyakawileho, muze A-Filisitiya ejile nyi kuzula afu, yawana Saulu nyi ana jenyi atatu hanafu ha mulundu wa Ngimboa ⁹ Yateta mutwe wenyi nyi kuzula yitwa yenyi, mba yatuma mikeji kuya ku chifuchi ya Filisitiya cheswe akatwale lusango kuli mahamba jo nyi kuli atu. ¹⁰ Yasa yitwa yenyi mu tembele ya Ashitalote, Yahachila mujimba wenyi hachipa cha Mbete-Shane. ¹¹ Muze akwa Njambeshe Ngilyate evwile chize A-Filisitiya halinga kuli Saulu, ¹² tujita eswe amalunga yakatuka nyi kuya ufuku mba yambata mujimba wa Saulu nyi mijimba ya ana ja Saulu ku chipanga cha Mbete-Shane. Yaya ku Njambeshe kwenako ayochelele. ¹³ Mba yambata yifwaha yo yayifunda mushi lya mutondo wa Tamalisike mu Njambeshe, mba yalitwamina kulya ha matangwa shimbyali.