¹ Ké énukéawo vayi vɔa, Yésu tsan énusrɔnla buwo yi wɔaho héhlɛnmé nyi blandré, yi lé dɔwo évé évé yi éduho mé kudo tohowo ké yi n'tɔ lé ja yia. ² Yésu lé tonuwo bé: "énuku dédéa sugbɔ vɔa amékéwo la déa owun sugbɔ o. Yintia midé kuku na énukudédéa ho Apétɔ bé nédɔ énuku délawo va. ³ Mijo yi! n'lé dɔmi sigbé alɛnwo lé jantawo domé. ⁴ Min'gbé tsɔ éga, akpɛtɛ, alo akpɛtɛ dé alɔméo yi né milé émɔji lé yia min'gbé dogbéna amédé o. ⁵ Aho dékpékpémé ké miadoa, migblɔɛ nɔwo tsutsugban bé: "n'tifafa nénɔ kudo mi." ⁶ Né inyi bé amédé lé guwun jé na yayra ké migblɔ niwoa la ilanyi bé élanɔ kudéwo tsé yi da, vɔa né omu jé na yayra woa éla gbé trɔva mia gbɔ. ⁷ Minɔ wɔagbɔ lé ahoamé yi miadunu yi nu énu ké okpɔ ni mia, dobé édɔwɔla jéna éfɛn tu. Min'gbé ditsa lé ahoawo méo. ⁸ Né ényi bé mido édudé mé yi éduamé tɔwo hɔ mi nyɔɛdé la, n'dékpékpé ké ola tso do miaho akɔmé midui. ⁹ Midagbé lé édɔnɔ ké olé gawuan n'ti, yi miato nawo bé jipo fiaduhoa gogo. ¹⁰ Vɔa édu dékpékpémé ké miado yi omu hɔmi oa, miyi édua ho émɔwo ji yi miagblɔ nawo bé: ¹¹ "mi huhu miaho édua ho ké kélé miaho afɔwo gɔméa dé miaji! Vɔa minyɛ bé mawu fiduhoa gogo. ¹² N'kadé iji ni mi bé lé vɔnudrɔgbé wɔa n'zizi na Sadom tso wu édu kia. ¹³ Baba niwo Korazin! baba niwo Bétsaïda! Dobéna né ényi bé Tiro kudo Sidɔn duwo mé yi n'wɔ nukunu kiawo ké n'wɔ lé miagbɔa, éla nyi bé ola trɔ éjimé hoho. ¹⁴ Lé nyatoho méa éto ké wɔadɔna Sodɔmkudo Tiro akadémé tso wu miatɔ. ¹⁵ Yi owo Kapérnaum, obusé bé ola dowo dé éjia? Gbédé ola didiwo dé gɔmé lé ézomavɔ mé. ¹⁶ Amékéwo la hɔ miaji séa éji nyé yi ohɔsé, vɔ néinyi bé omuhɔ miaji séa anya bé éjinyé yi omuhɔsé, yi omuhɔ amékédɔmua ji sé o." ¹⁷ Enusrɔnla blandréawo kpata gbɔva kudo jijɔ lé gblɔ bé: "Apétɔ gbɔgbɔvɔnwo n'tɔtsan odoto mi lé n'kɔwo ji." ¹⁸ Yésu do yinti nawo bé: "n'kpɔ Satana gé tso jipo sigbé étsi kézo nɛnɛ. ¹⁹ Muni mi n'sé bé miadu éfutɔ ho nusén kpata ji, yi miazɔ édanwo kudo agɛnɛwo ji yi bada dékpékpé n'ja wɔ mi o. ²⁰ Gankéa min'gbé kpɔ jijɔ dédé bé gbɔgbɔvɔnwo doto mio, vɔa mikpɔ jijɔwu dobé oŋlɔ miaho nyikɔ déjipo fiaduhoa ho agbalɛn mé." ²¹ Tétéa Yésu kpɔ jijɔ lé gbɔgbɔ kɔkɔé nti lé gblɔ bé: "n'kafuwo, o tata, jipo kudo anyigba ho Mawu bé nétsɔ énukéa tso wladé éhihé kiamé ho nunyalawo gbɔ yi otsɔɛ tsé fian amékéwo hɔ éjiwo sigbé déviwo nɛnɛ. Nyatoho, tata, dobéna nɛnɛ yi oji bé nénɔ lé n'kuwo mé." ²² Enyé yi nyi tatanyé ho amédɔdɔ lé n'dékpékpé mé, yi amédékpékpé n'jénasi évi yi n'yi tata o; yi nɛnɛ ké amédé n'jénasi tata yi n'nyi to évia ji o kudo amékéwo éjro évia yéadé yidoké tso fiawo. ²³ Fifia étrɔ dé énusrɔnlawo wuiévéawo gbɔ yi lé glɔ nawo lé wlawlamé bé: "Yrayra tɔwo yi nyi amékéwo lé kpɔ énukéwo milékpɔa. ²⁴ N'lé gblɔɛ ni mi bé ényagblɔdila kudo éfia sugbɔwo ji bé wɔakpɔ énuké milé kpɔa, vɔa owunté kpɔɛ o, yi wɔasé énuké milé séa vɔa owunté sén o!" ²⁵ Tétéa Yudatɔwo ho sé fiala dika tso jité yi lé biɔ bé: "Apétɔ n'kayi mayɔ yi makpɔ agbé mavɔ yi? ²⁶ Yésu lé biɔ bé: "n'kayi oŋlɔ dé éséawo mé yi? N'ka yi milé hlɛŋ?" ²⁷ Nyagblɔdila do yinti bé: "odo la lɔn Apétɔwo Mawu kudo éjiwo kpata, luvɔnwo, n'sénwo kudo susuwo kpata, yi odola lɔn nɔviwo sigbé owo n'tɔ nɛnɛ." ²⁸ Yésu do yinti nɛ bé: "nyatoho ogblɔɛ nyɔɛdé, éwɔ dé iji yi akpɔ agbé mavɔ. ²⁹ Vɔa ké n'tsu kia lé ji bé yéatso ényamé na yidokéa, élé bia Yésu bé: "fifia dé mɛkayi nyi nɔvinyé yi? ³⁰ Yésu do yinti nɛ bé: "n'tsu dé tso Yéruzalɛm yikɔ Yériko. Tétéa égé dé fianfiwo ho alɔmé yi ohɔ yiho nuwo yi ogbé poa kaka ékufényi. ³¹ Tété jɔgbé nyɔɛtɔa, Yudatɔwo ho osɔfo dé to gamua vayikɔ, yi éké ékpɔa ézé to yinti va yi. ³² Nɛnɛ ké Lévitɔ dé va do gawun a, yitsa kpɔɛ yi itsa to yinti vayi. ³³ Vɔa Samaritatɔ dé to tohoa vayikɔ émɔji, ké éva do tohoa yi ékpɔ n'tsua yiho nu wɔ nublanui nɛ n'tɔ. ³⁴ Eyi yigbɔ yi bla yiho abiawo kudo avɔ, yi tsɔ ami kudo vain tso dé yiho abiawo mé. Tétéa ékɔkɔɛ dé yiho ésɔkɛtɛ ji tsɔɛ améjro zépé yi énɔ yigbɔ ézan kpata. ³⁵ Yi ké éhun kéa, étsɔ éga sidi amévé tso na améjro jrado péa jikpɔla bé nétso kpɔ n'tsua ji yi lé gblɔnɛ bé né tso kpɔ iji yi n'dékpékpé ké élaza dé yintia néjibé yétrɔ vayi koa yéatsɔɛ nɛ." ³⁶ Lé amé amétɔ kiawo doméa dé mékayi nyi éhavi na améké va tsi fianfiawo ho alɔmé o?" ³⁷ N'tsua do yinti nɛ bé: "améké kpɔ nublanui nɛayi." Yésu gblɔnɛ bé: "évɔ owotsan yi yi nawɔ nɛnɛ." ³⁸ Yésu kudo yiho nusrɔnlawo nɔ wɔaho émɔzɔnzɔa ji yikɔ Yéruzalɛm, yi ké ova kɔpé dé méa okpɔ nyɔnudé ké yiho n'kɔ yi nyi Marta hɔwo dé yigbɔ lé ahomé. ³⁹ Marta do nɔvi nyɔnu ké yiho n'kɔ yi nyi Maria va nɔanyi dé Yésu ho afɔwo ji lé anyigba yi lé sé Yésu ho ényawo. ⁴⁰ Tétéa Marta lé da énududu bé yéanawo onédu. Marta lé tona Yésu bé: "Apétɔ n'lé wɔ dé nawo bé Maria tati ényé dika lé énududu dahoa? Tonɛ bé néva kpédé n'tinyé." ⁴¹ Vɔa Yésu lé tonɛ bé: "Marta, Marta, olé jagba yi lé défu na édokéwo n'ti, ⁴² vɔa énu dika ké lé vévé déa yi nyi ké Maria tsan yi omahɔɛ lé isi gbé o.