¹ Ekolama la mi nko nkatelie! nkia ntengia engondi ye. Yaaka ntepela akoboko lama la beyenelo la pe bakuswelo, ba mbo bisa Nkolo andakia. ² Nzeba boyambi bomo, esoleka lene mpela diomu la binei, abelwake oko liko bele kuu nko etando le liko le bisato, laape aliki ok'etei le bienge laa pe oni bosale bo bienge bi nde ntiyebe ye yaaka Wangi ayeba. ³ Nzeba mimie bot'oko asakonangwa kuu nk'oko Paladiso (laa pe la bienge laa pe oko bosale boka bienge, ntiyebe ye, yaaka Wangi ayeba). ⁴ Ayokake mbo bimpatobonge la ntemfwa ye bine bimpa boto ntakolame la ntepela. ⁵ L'itina li nde bot'oko, ntatelia. Yaaka l'itina li mi nkika, ntikatelie ye, nko l'itina lika bonghonyu bomi. ⁶ Yaaka laa ndanga mi mie nkatelie, ntingoyala emfunda ye ibango ngotepela mbo bi kweli. Yaaka ntwenya nkanga boto ntasontangela nko mi l'itina lika mbo bi yoka nde pe bi yene nde on'ole mi. ⁷ L'itina mie nkatepele nkanga ntisoyoka losaki lama la bakuswelo pe beyenelo benene besa mi nyene, nsakokono wale bo wembu oni bienge nkonga wue ntomwa eka Satana l'itina le nzokie mi mbabali nkanga ntisosonda nzoke losaki. ⁸ Mbotitiake Nkolo mbala bisato mi mie wale bone bonyimele. ⁹ Yaaka, nde ankolole nde ndee, isei limi likolama ok'ole wu, ibango nguya lemi esokolama oko bonghonyu. Nkatelia la nyinga lama la bonghonyu l'itina mie nguya eka Nkolo oni'ole mi. ¹⁰ Ngako, ibango la Masiya nzoka nyingha l'itina lika bonghonyu, la lowundi pe mbabali la benyoko pe belingatano. ibango ngeng'edia mi bonghonyu, ngako ndia nguya. ¹¹ Mi ntepela nkonga emfunda! Yaaka nyo bolangake ngako. Ekolamake la nyo nyoe bonsekise mi. Nkia mi nde nko yemba ye, ntinge oko mbisa eka ntomwa biko bi dilo ye. ¹² Bilimbetelo bika ntomwa le ta sosolo bisakoyenele ok'etetei le nyo la bonkumela, la bilimbetelo pe la bimwenge, la pe bisali bi nguya. ¹³ Nyo bolangake nyoe bobae bosungi nga bikinda bine binkina oko mbok'enkeni? Nk'ibango mi mboyake mi mie nkanga ntisoyala nga bolito oko liko li nyo. Boonsambaka bobe bomi boko! ¹⁴ Bolenda, akoboko ele mbala le bisato lekakosia mi nzaka-yaka ok'ole nyo. Ntingoyala pe nga yemba le bolito oko liko li nyo ye. Ntokane biemba bi nyo ye, yaaka mekana nyoandwa. Ibango ntekolame oko bana la nkolie biemba l'itina lika baboti ye, yaaka baboti bakolia l'itina lika bana ba bo. ¹⁵ La bosango, ngopasola binkumela bilia mi pe ngokapaa miombondo itina li nsunge belimo be nyo. Laa mi nsosonda ndange nyo, ngako nyo bongondanga mi nko nta nio ngako? ¹⁶ Yaaka, nyo botepela nyoe mi ntiliki bolito oko liko li nyo ye, yaaka mi nkelake boyeli mimie mebae nyo la bongala. ¹⁷ Ok'etetei eka bato bane basa mi ntoma ok'ole nyo, nsoeyengisa la nani? ¹⁸ Mbotitiake Tito mi mie ase ok'ole nyo, pe nsotoma mbale le nde loselele ndia nde. Nde Tito asoeyengisa nyo la lobo nga be? Ntatokelili mia nde mbo bi lami la nguya eka Elimo emo? Ntatokelili mia nde kweli la eyali emo? ²⁰ Ndota mimie laa nsoya ok'ole nyo nkana ntisoetana oko dweli lompa mi ntilange, nyo pe ntoosonyene mi oko dweli lo;pa nyo ntabolange ye. Laa pe engoyala la bosunghemeli la ikeke la bayulu la mpika pe lotolo la losembeki pe la bonene bo bienge la pe belingatano. ²¹ Ndota pe mie ngengo enga mi nze lonkina, Wangi bomi ntasonzokia diemo oko ntondo le nyo pe ngolela l'itina lika wuke bo bane basakokela bobe ntondo pe lelo ntabakalomi bebonda ye yim'oko mbo bi nyoti pe la ndemba pe la mposa bi bobe bisaka bo babenga.