¹ Ndanga mimie bonkandele lomo lama la wano bomfunda bomi! Nko solo bonkandele lomo! ² Ibango ndia ikeke li wuke ibango la nyo nkonga ikeke li yima ok'ole Wangi, ibango nyo bole nkonga biemba bi sa mi mbalia ok'ole wele bomo, nde ale Masiya. ³ Yaaka, nkonga oki nzo ayengisake Eva la boyeli bo nde boobe, ndota mie batangeli ba nyo ntaasopengwa la nyima-yima oko bokolami bonyo la bososolo bonyo ok'ole Masiya. ⁴ Ibango laa boto asoya oni ole nyo pe asoyolaka mbo bi lami la Yesu enkina ene empatonge Masiya l'elaka so, laa pe bosobaa elimo enkina, ene empa nyo lelo ntabobaali ntondo, laa pe nsango dilo enkina lempa nyo lelo ntaboyambili ye, bokolama la nkandele kio lomo wano wuke. ⁵ Ntangela mi mie mi ntinge bo-mbisa boka ntomwa biko bi binene-binene ye. ⁶ Nkia ntingia munya la etepelo le dilo ye, ntikambe boyeli ye; tosoelakia la polele oko'ole nyoankumela oko bemboka benkumela. ⁷ Boyene nyoe nsakokela bobe osaka mi nkakisena l'itina mie nyo bonangwwe, ane osaka mi melaka nsango dilo eka Wangi ntoo-too ifuti (bensongo) te? ⁸ Nsakokela duba, nsakosuka ok'ole bikinda binkina ane osaka mi mposo bensongo be bo l'itina li ntiele nyo. ⁹ Ngeng'eki mi ndiki ok'ole nyo ntondo, ngeng'eki mi nkambake bensongo ntiyubolake nkia boto ye; ibango bambale bakoyimake oko Makedonia ba nzelake biemba binkuma biki mi nkambake. Nsokayisena mbisa nkanga ntisoyala, nkia la yemba be, nga bodito ok'ole nyo, pe ngooyalaka ngengo binkuma nko ngako. ¹⁰ Kweli nkonga ole bososolo boka Masiya oni'e mi, losaki lone lolia mi, nteengoyimela oni mbutu bine Akaya ye. ¹¹ Ibango be? Ibango mi ntielange nyo? Wangi ayeba nde ndee mi melanga nyo! ¹² Lone lokela mi, mekela nko ngako l'itina mie mpekele mboka ok'ole bane balia mposa le nangie bienge bo boe la bo tatia esali emo nkonga leso. ¹³ Ibango bato bale ba ntomwa bi bongala, batii ba iyengisia, bane bakalakia nkonga wue bale ntomwa bika Masiya. ¹⁴ Ntabokabake ye, ibango nkia Satana alokokalakie nga ntomwa le tee. ¹⁵ Ngako ntenge lobo loenene ye laa batii ba nde bakalakia nga batii ba bokolami. Bokuma boobo bonyoyala kweli nkonga bisali bido. ¹⁶ Ntepela lonkina, ntabopaake boto mboka le ntangele nde ndee mi nde emfunda. Yaaka nkia botangela ngako, bompose mi nkonga emfunda l'itina mie nkanenie wano nio. ¹⁷ Bine bi tepela mi akoboko, ntenge mbo bilanga lo Nkolo ye, bile nkonga bika emfunda, lama la bosangie bo bienge. ¹⁸ Bato wuke bakanangia bienge l'itina lika mbo bi bolongo, lami pe nkanangia bienge. ¹⁹ Nyo bato balia boyeli, bokandela bimfunda lomo! ²⁰ Bokanda lomo nyoe baetomake ntomo nga bantamba, bakumolake biemba, baeyengisake, baelendake oko nse le bo, baebolake biemba oko beso. ²¹ Ndia diemo la ntepele mi mie: So tosondake bonghonyu l'itina li nkele ngako. Yaaka laa boto akanangia bienge lama la lobo lonkeni, la mi pe nkanangia bienge (ntepela ane nkonga emfunda!) ²² Bo bale Baebele? La mi pe nde ngako. Bo bale Bayisalaele? la mi pe. Bo bale ibotwa lika Abalayama? La mi pe. ²³ Bo bale batii baka Masiya Mi mosonda (ntepela ane nkonga boto lodia lokeye) masonda la bisali bi nguya, ndalema oko benkokoso, la ndiakwa la pimbo mbala wuke-wuke, nsaka nkai mpika-mpika la iwa mbala la mbala. ²⁴ Mbala bitano ok'ole Bayuda ba mbolake pimbo ntuku binei yimia emo. ²⁵ Ba mbolake la mpalo le bitumba bisato, ba ntumeteke bawe mbala emo. Mbala bisato baswa bakimi nsake lokendo balindake oko losi; ndiki wane bombondo pe botio bombondo oko etei le losi lo bokwa; ²⁶ oko nkendo mbala wuke, oko bakamba ba nzale, la bakamba baka bato ba nziba, la bakamba lama la bato ba ibotwa limi, la bakamba ba mi la biwumu bi ngendia, la bakamba ok'etetei le nza, la bakamba ok'etetei le beleki, la bakamba ok'etetei le losi lo bokwa, la bakamba l'itina lika bambale ba bongola; ²⁷ la bosala wembu pe mbabali, la bokamba bo isilo mbala wuke la betio, la nzala pe bokamba bo losi, la bokamba bo ile li ndeke-leke mbala wuke, la mpio pe bonsele. ²⁸ Pe mpika-mpika oko mbo biko binkumela, losio la losio, bolito boka belingatano bemi lama la bikinda bontoisa wale wuke. ²⁹ Te boto lodia bokondwa mi pe ye nde nani? Te boto losokele ibaku mi pe ntiokasili nde nani? ³⁰ Laa ekolama la mi mie nkasekise, nkasekisa l'itina lika bokondwa bomi. ³¹ Wangi pe Papa eka Nkolo Yesu, nde nd'oko lo sangola so ngengo binkuma, ayeba nde ndee ntitepele bongala ye. ³² Oko Damaseke, bondwa nza oko nse le bonkumu boka nkumu Aleta, akosiake pe akandake nza le Damaseke l'itina nde ndee ba mbute. ³³ Yaaka ba ntulole ok'etei le botete mpolia oko iliisi (ikusu) li epele le nza pe ndotake lamo la lobo lo nde.