¹ Ninasema ukweli kwa kuungana na Kristo. Na kwa uongozi wa Roho Mtakatifu zamiri yangu inanihakikishia kwamba sisemi uongo: ² mimi nina huzuni kubwa na uchungu usiokuwa na mwisho ndani ya moyo wangu. ³ Ingekuwa heri nilaaniwe na kutengwa na Kristo kwa ajili ya wandugu zangu wa damu, ⁴ ndilo taifa la Waisraeli. Wao walikubaliwa na Mungu kuwa watoto wake, yeye aliwaonyesha utukufu, alifanya maagano nao, aliwapa Sheria, aliwaonyesha namna ya kumwabudu na kuwatolea ahadi zake. ⁵ Wao ni wazao wa babu zetu, na Kristo alizaliwa kimwili katika kizazi chao. Yeye ndiye mkubwa kupita wote na Mungu anayesifiwa kwa milele! Amina. ⁶ Sisemi kwamba ahadi ya Mungu haikutimia. Kwa maana si wote wanaotoka katika uzao wa Israeli ndio Waisraeli wa kweli, ⁷ wala si wote wanaotoka katika uzao wa Abrahamu, ndio watoto wa kweli wa Abrahamu. Kwa kuwa Mungu alimwahidia Abrahamu: «Ni kwa njia ya Isaka utapata wazao watakaoitwa wako. ⁸ Maana yake, si wale waliozaliwa sawa na kawaida wanaohesabiwa kuwa watoto wa Mungu; lakini ni wale waliozaliwa kufuatana na ahadi ya Mungu ndio wanaohesabiwa kuwa wazao wake wa kweli. ⁹ Kwa sababu hii ndiyo ahadi ya Mungu: “Kwa wakati kama huu, nitakuja tena, na Sara atazaa mtoto mwanaume.” ¹⁰ Na si vile tu; Rebeka alikuwa na watoto wawili aliowazaa na mume mmoja, ndiye babu yetu Isaka. ¹¹ Watoto wale walipokuwa hawajazaliwa bado, wala hawajatenda jambo lolote nzuri au baya, Mungu alimwambia Rebeka hivi juu yao: “Mkubwa atamutumikia mudogo.” ¹² Alisema vile kwa kutimiza mupango wake unaotokana na uchaguzi wake usiofuatana na matendo ya watu, lakini mwito wake kwao. ¹³ Kama vile Maandiko Matakatifu yanavyosema: “Nimemupenda Yakobo, lakini nimemuchukia Esau.” ¹⁴ Basi tuseme nini? Mungu hafuati haki? Hapana hata kidogo! ¹⁵ Kwa maana anamwambia Musa: “Nitamuhurumia yule ninayependa kumuhurumia; nitamurehemu yule ninayependa kumurehemu.” ¹⁶ Basi mambo hayo, hayatokani na mapenzi ya mtu wala juhudi yake, lakini yanatokana na rehema ya Mungu. ¹⁷ Mungu anamwambia mfalme wa Misri katika Maandiko Matakatifu: “Nimekusimika kuwa mfalme kwa sababu hii moja, ni kusudi kwa njia yako nipate kuonyesha uwezo wangu na kusudi jina langu lipate kutangazwa katika dunia yote.”» ¹⁸ Basi ni kusema kwamba Mungu anamuhurumia yule anayetaka, na kumufanya mugumu yule anayetaka. Kasirani na huruma za Mungu ¹⁹ Labda utaniambia: «Ikiwa ni vile, sababu gani Mungu anawashitaki watu? Kwa maana hakuna anayeweza kupingana na mapenzi yake. ²⁰ Halafu sasa wewe mwanadamu ni nani hata ubishane na Mungu? Chombo cha udongo hakiwezi kumwuliza mufinyanzi: “Kwa nini umenitengeneza hivi?”» ²¹ Mufinyanzi anaweza kufanya sawa vile anavyotaka na udongo. Toka donge moja la udongo anaweza kutengeneza chombo kimoja cha heshima na kingine cha matumizi ya kawaida. ²² Basi kuna nini? Mungu alitaka kuonyesha kasirani yake na kutambulisha uwezo wake. Lakini aliwavumilia sana wale waliostahili kupatwa na kasirani yake na waliokuwa wametayarishwa kwa kuangamizwa. ²³ Vilevile alitaka kuonyesha uwingi wa utukufu wake kwa wale aliowasikilia huruma; wale ambao alitayarisha tangu zamani kwa kuwatukuzisha. ²⁴ Ndio sisi tulioitwa naye, si toka kati ya Wayuda tu, lakini toka kati ya watu wa mataifa mengine vilevile. ²⁵ Ni vile anavyosema katika maandiko haya ya nabii Hosea: «Wale waliokuwa si watu wangu nitawaita sasa Watu wangu. Taifa lile nililokosa kulipenda nitaliita sasa Mupendwa wangu. ²⁶ Na pahali pale walipoambiwa: “Ninyi si watu wangu! pale wataitwa Watoto wa Mungu Mwenye Uzima.” ²⁷ Isaya alisema kwa sauti juu ya Waisraeli: “Ijapokuwa Waisraeli ni wengi kama muchanga wa bahari, ni wachache tu watakaookolewa. ²⁸ Kwa maana Baba atatimiza kabisa kusudi lake juu ya dunia bila kukawia.” ²⁹ Ni kama vile Isaya alivyokuwa ametangulia kusema: “Kama Bwana wa Majeshi hangetuponyeshea wamoja wa wazao wetu, ingetutokea sawa Sodoma, ingegeuka kwetu sawa Gomora.”» Waisraeli hawakufuata njia ya kuhesabiwa haki ³⁰ Basi tuseme nini? Watu wa mataifa mengine waliokosa kutafuta kuhesabiwa haki mbele ya Mungu wamehesabiwa haki mbele yake kwa njia ya imani. ³¹ Na kwa ngambo ingine, Waisraeli waliokuwa wakitafuta Sheria kusudi kwa njia yake wapate kuhesabiwa haki mbele ya Mungu, hawakuifikia. ³² Kwa sababu gani? Kwa sababu walitafuta haki ile, si kwa njia ya imani, lakini kwa njia ya matendo. Walijikwaa juu ya lile jiwe la kukwalisha, ³³ kama ilivyoandikwa katika Maandiko Matakatifu: «Angalia, ninaweka jiwe la kukwalisha katika Sayuni nalo ni la kuangusha. Lakini yule anayemwamini hatapata haya.»