¹ Wandugu zangu, kitu ninachotamani kwa moyo wote nami ninachomwomba Mungu kwa ajili ya Waisraeli, ni kwamba waokolewe. ² Kwa maana ninashuhudia kwamba wanajitoa kwa bidii kutumikia Mungu, lakini bidii ile haitokani na ufahamu wa kweli. ³ Hawakufahamu namna Mungu anavyowahesabia watu haki na wakatafuta kusimamisha haki yao wenyewe. Wakakataa kufuata njia ya kuhesabiwa haki mbele ya Mungu. ⁴ Kwa maana kwa njia ya Kristo, Sheria imepata kufikia ukomo wake kusudi kila mtu anayeamini apate kuhesabiwa haki mbele ya Mungu. ⁵ Haya ndiyo mambo Musa aliyoandika juu ya kuhesabiwa haki mbele ya Mungu kwa njia ya kushika Sheria: «Mtu anayetimiza maagizo ya Sheria, ataishi kwa njia yake. ⁶ Lakini hivi ndivyo inavyosemwa juu ya kuhesabiwa haki kwa njia ya imani: “Usijiulize moyoni: Ni nani atakayepanda mbinguni?” (maana yake ni kumushusha Kristo toka kule.) ⁷ Wala usijiulize: “Ni nani atakayeshuka katika kuzimu?” (maana yake kumupandisha Kristo toka kule kwenye wafu). ⁸ Lakini inasemwa namna gani? “Neno la Mungu liko karibu nawe, liko ndani ya kinywa chako na ndani ya moyo wako.” Neno hili ni ujumbe tunaouhubiri juu ya imani. ⁹ Kama ukiitikia kwa kinywa chako mwenyewe kwamba Yesu ni Bwana na kuamini katika moyo wako kwamba Mungu alimufufua, utaokolewa. ¹⁰ Kwa maana mtu akiamini kwa moyo wake, Mungu anamuhesabia haki mbele yake; naye anapoitikia kwa kinywa chake, anaokolewa. ¹¹ Kwa maana Maandiko Matakatifu yanasema: “Kila mtu anayemwamini hatapata haya.” ¹² Basi hakuna tofauti kati ya Wayuda na Wagriki, kwa maana Bwana wa wote ni mmoja tu, na anawabariki sana wote wanaomusihi. ¹³ Ni kama vile Maandiko Matakatifu yanavyosema: “Kila mtu anayemusihi Bwana, ataokolewa.” ¹⁴ Basi namna gani watamusihi yule wasiyemwamini? Na namna gani watamwamini yule wasiyesikia habari zake? Na namna gani watasikia habari zake ikiwa hakuna wanaohubiri? ¹⁵ Na namna gani watahubiri ikiwa hawatumwi? Ni kama inavyoandikwa katika Maandiko Matakatifu: “Angalia jinsi kunavyofurahisha kuja kwa wale wanaoleta habari njema.” ¹⁶ Lakini wote hawakukubali ile Habari Njema. Kwa maana Isaya, alisema: “Ee Bwana, ni nani aliyeamini habari tulizotangaza?” ¹⁷ Hivi basi imani inatokana na kusikia habari, na habari ile inatokana na neno la Kristo. ¹⁸ Basi ninauliza: hawakusikia habari hii? Ndiyo, wameisikia! Kwa maana Maandiko Matakatifu yanasema: “Sauti yao imesikilika katika dunia yote, maneno yao yamefika pande zote za dunia.” ¹⁹ Ninauliza tena: Waisraeli hawakufahamu kitu? Kwanza Musa alikuwa amekwisha kujibu: “Nitawafanya kuwa na wivu juu ya watu wasiokuwa taifa. Nitawakasirisha ninyi kwa njia ya taifa pumbavu.” ²⁰ Isaya kwa uhodari anaongeza kusema maneno haya: “Nimepatikana kwa watu wasionitafuta, nimejifunua kwa watu wasioniuliza.” ²¹ Lakini juu ya Waisraeli anasema hivi: “Muchana kutwa ninanyoosha mikono yangu kwa kuita taifa lenye uasi na ubishi.”»