¹ Ami Polu musadi wa Nzambi, nidi thumwa wa Yesu Khidishitu muku sadisa athu awana asola Nzambi kikuma kia lukwikilu luowu ni kwijika kiedika kia mambu ma Nzambi. ² Yosu eyina yidi kaka mu kusha mutshima ku moyi wa mvula ni mvula mu kilaji kia hanini Nzambi wenda kuleka kudihuna, yanjika tangwa dikulu. ³ Mu tangwa dia lunga wa tunguludidi kisweki kia ndaka yenji mu malongi mapedi ami muku nulonga. Nia hangidi kisalu mwenekina mu lutumu lwa Nzambi muhulushi wetu. ⁴ Kudi ayi Tite, mwana wemi wa kipevi, nkenda ni ngemba ya Tata Nzambi yi khadi niayi. ⁵ Kieni kioki niaku shishidi ku Crete, kikuma ushi yima yosu mu ndonga yitwa lekidi kumanisa, ni mukushia amambuta dibundu mu kosu dimbu pila yi nia kulongidi. ⁶ Mbuta dibundu kalungidiku ku khala ni kifu kia bola, afeti ku khala yala wa mukhetu mu moshi, ana jienji epi afeti ku khala ana alemvuka, kilawu loni kikonda lujitu. ⁷ Mboti twadisi wudi ni kisalu kia tadila mambu ma Nzambi, akhadi wa konda kifu kia bola. Ka khalaloku ni lulendu, kwakula kwingi loni, kwivanga khabu jingi loni, kunwa maluvu lawu loni, kingolongolu loni, nzala yingi ya mbongu loni. ⁸ Kashi afeti ku khala muthu wenda kuyamba anzenza, ni kuzola kaka mambu ma waha. afeti ku khala muthu wa mayela, wa masonga, wa mboti, wenda kudiyala. ⁹ Afeti ku kangama kaka ku nsangu ya kiedika pila ya yilongukidi, mu pila etshi ahungi athu kikesa mu malongi ma waha, asungiki epi athu enda kuleka malongi menama. ¹⁰ Kikuma kudi ni athu engi kaku labangoku malongi menamana, Ajeneshi mu katshi ka ayuda enda kuhuna athu lawu mu pqnji jiowu jia uzoba. Enda asenda athu lawu mu nzila ya lufwa. ¹¹ Mboti ku washia mu boloku kikuma enda kulonga mambu ma konda funu, ni kunona matapishi ma soni, enda kubwisa ikanda lawu mu kisakasaka. ¹² Mukatshi kowu yala mu moshi wa mayela wa kudidi etu : Enu akwa Crete nudi kaka akhubidi, nwa bola, nudi mudi ambiji akhabu, amolu nwa zola kaka kudia. ¹³ Kitemu eki kidi kia kiedika, kieni kioki wanganini kikuma asobi akhadi ni lukwikilu lwa ngolu. ¹⁴ Nulaboku epi panji jia hukhubidi jienda kulonga ayuda ni zi tshiku ziathu jenda kuvengumuna mambu ma kiedika. ¹⁵ Athu awa edi ni mitshima ya pimbu, mambu mosu medi ma waha; kashi awa edi ni mitshima wa bola adizanga ni kudibebisa mu jitshiku jiowu. ¹⁶ Enda kwakula etshi ejiya Nzambi, Kashi mambu menda kuhanga, menda ku wafunda etshi kejiku Nzambi. Edi athu ambi, ka kwivilangoku Nzambi, yisalu yowu epi yosu ya bola.