¹ Mu luyanjiku ndaka yakhedi Ndaka yakhedi ni Nzambi ndaka yakhedi Nzambi. ² Yeni yakhedi ni Nzambi yanjika mu luyanjiku. ³ Yima yoshu ya hangimini kaka mu ndaka yenji. ni kima kimoshi lo kiakondidi kuhangama konda ndaka yenji. ⁴ Mu katshi ka ndaka mwakhedi ni moyi moyi weni wakhedi kieji kia athu oshu. ⁵ Kieji kieza mu kukaya pipa pipa ya lumgidiku kukaya kieji. ⁶ Kwejidi muthu moumoshi watumini Nzambi jina dienji Yoani. ⁷ Mweni wejidi mudi themu mu kwakudila mambu matadila kieji mwenekina. ⁸ Yoani kakhediku kieji kashi mweni wejidi kikuma kia kuhana kithemu kia kieji mewenekina. ⁹ Mweni wakhedi ndaka ya Nzambi wudi kieji kia kiedika wejidi hashi mu ku kutula athu oshu mu pipa . ¹⁰ Mweni wakhedi mu kifutshi kifutshui kiahangimini kudi mweni kashi akwa kifutshi kamwijikidiku. ¹¹ Mweni wejidi kudi a pangi jienji kashi eni ka muyambidiku. ¹² Kashi athu amuyambidi ni ku mukwikila wa wekhinishini ana jia Nzambi. ¹³ Kekhininiku ana jia Nzambu mu menga to mu luzolu lwa kimuthu kashi mu luzolu lwa Nzambi. ¹⁴ Ndaka yekhinini muthu wejidi kujinga ni etu athu. Etu twamweni lukumu lwenji lukumu lwa muhwedi tata lwakhedi lwazala ni mambu mamboti ti ma kiedika. ¹⁵ Yoani wejidi kuhana kithemu ni kulonga etsi Mweni wudi muthu wuniakhedi ku nuleza etsi oyu wakeza kumanima mamemi wanguhita kikuma mweni wakhedi kadi ami kutetuka kadi lo. ¹⁶ Mweni wazala ni kimvwama kienikioki etu oshu twanona mamboti mengi kudi mweni. ¹⁷ Kienikioki tshiku jiejidi kumokhu ma Moshi kashi mambu ma pimbu ni ma kiedika mejidi ni Yesu. ¹⁸ Ni muthu kamonoku kadi Nzambi hoha twakhela. Kaka mwana enji mumoshi wudi enjimweni Nzambi wudi mudi Nzambi wenda kukhala pena pena ni Nzambi mweni weza kutuleza pila yidi Nzambi. ¹⁹ Tala ekhi kidi kithemu kiahanini Yoani tangwa diathumini anganga Nzambi ni amalongi a jitshiku kudi a Yuda akhedi ku Yeluselemi mu ku muhula etsi Ayi wudi nani. ²⁰ Mweni wa wahwedi mvutu ni mutshima wa shipula etsi Ami nishiku Khidishitu. ²¹ Eni amwihudidi epi Wudi kamu nani ayi. Wudi Ediya. Mweni etsi Ami nishiku Ediya. Eni amuhula epi Wudi mbikudi. Mweni wa vutudidi etsi Loni. ²² Tangwedi amuleza etsi Wudi nanai ayi kikuma etu tufeti kwendakuhana mvutu kudi athu atutumini. Ekhi wukwakulanga kikuma kiayi mweni. ²³ Mweni wa wavutudidi etsi Ami ndaka ya muthu wukwakulanga ndaka ya ngolu mu mwangu etsi hangikenu djila ya Fumu pimbu mudi kioki kiakudidi mbikudi Yasaya. ²⁴ Mu katsi kowu mwakhedi athu ekha atumi afadishi. Eni amwididi etsi ²⁵ Kamba ayi wushiku Yesu to Ediya to Mbikudi kikuma kiakhi ukuotikilanga. ²⁶ Yoani wa vutudidi etsi Ami nienda nia botika mu meya. ²⁷ Ejikenu etsi kudi ni muthu mumoshi mu katshi kenu wunu kulekanga kwijika. ²⁸ Mweni wudi amanima mamemi. Ami nia lungidiku ata fioti kukasulula misinga ya yidiatudi yenji. Mambu menama moshu makhedi kuhita ku Betani mu sambwa dia meya ma Yodani kwakhedi kubotika Yoani. ²⁹ Mu kukhia Yowani wamweni Yesu wejidi kudi mweni, he mweni wakula etsi Talenu mwana dimemi dia Nzambi weza kukatula kubola kwa athu oshu mu kifutshi. ³⁰ Mweni yuyu muthu wuniakhedi ku nuleza tangwa dinaikhedi kwakula etsi Muthu mumoshi wukwizanga kumanima wapita ami kikuma mweni wakhedi kadi kujinga ami kutetuka kadi lo. ³¹ Ami niejikidiku ketshi mweni nani kieni kioki niakhedi kubotika akwa Yisaledi mu meya kikuma eji kudijikisa enjimweni. ³⁴ Yowani watedi epi kithemu etsi Ami nia mweni Pevi ya katuka ku hulu mudi bembi weza kumakana ha mutwa wenji. ³³ Ami nia mwijikidiku pimbu Kashi oyu watumini mu kubotika athu mu meya wandejidi etsi Koshu muthu oyuna wu wakaomona Pevi yakulumuka yeza kumakana a mutwa wenji mweni yoyu wakabotika athu mu Pevi ya Longu. ³² Ami nia mona mambu menamana moshu he nienda nia nuleza etsi Mweni wudi mwana wa Nzambi. ³⁵ Mu kukhia Yowani wakhedi epi hohu ni alonguki jienji mbadi. ³⁶ Eni amweni Yesu ni kuhitila hohu akhedi eni Yowani wa waleza etsi talenu mwana dimemi dia Nzambi. ³⁷ Alonguki mbadi a Yowani tangwa dievidi kienekina amusisa alaba Yesu. ³⁸ Kiela Yesu walumuka wa wamona enda amulaba mweni wa wedidi Ekhi nwazola. Eni etsi Rabbi( Longi )Kwehi wenda kujingila ayi. ³⁹ Mweni wa wahwedi mvutu etsi Yizenu nu kumona. Eni endidi amona akhedi kujingila mweni. Akhedi nenji lutshiku lwoshu kikuma tangwa diakhedi diafwa kadi. ⁴⁰ Mumoshi mukatshi kowu wevidi makudidi Yowani walaba Yesu jina dienji Andela pangi wa Simoni Petulu. ⁴¹ Mweni wa waninini thethi ni pangi enji Simoni wa muleza etsi Etu twamweni Mesiya(Kidishitu). ⁴² Mweni wa musendidi kudi Yesu. Yesu kia mutadidi wa muhula Ayi Simoni mwana wa Yowani. Akubula kukutambika CEFASI( Yala). ⁴³ Mu kukhia Yesu wakananga kwenda ku Ngadidi wa wanina ni Fidipa wa muleza etsi Yiza Wungulabi. ⁴⁴ Fidipa wakhedi mukwa Betesada,dimbu dia Andela ni Petulu. ⁴⁵ Petulu kama wa wanini ni Natanedi wa muleza etsi Muthu oyuna wakhedi kwakudila Moshi ni ambikudi etu twa wanini nenji Yesu mwana wa Yazevu mukwa Nazaleti. ⁴⁶ Natanedi wa muleza etsi khia kima kia pimbu kia lunga kuhudikila ku Nazaleti. Fidipa wa muleza etsi Yiza wu kumona. ⁴⁷ Yesu kia mweni Natanedi ni kwiza kudi mweni wa muleza etsi Tala muthu wa kiedika mu katsi ka Yisaledi wakonda wukhubidi. ⁴⁸ Natanedi wa mwihula etsi Kiehi wangwijika ayi. Yesu wa muvutudila etsi Ni Fidipa ni Ami thethi ami nia kumweni kiwakhedi washikama mu mashina ma mutondu wa ma figi. ⁴⁹ Natanedi wa muvutdidi etsi Longi ayi wudi mwana wa Nzambi fumu mujima wa Yisaledi. ⁵⁰ Yesu wa muleza etsi ayi wa kwikila kikuma ami nia kulezanga etsi nia kumweni mu mashina ma mutondu wa ma Fige. Wukoumona mambu makuyituka mahita menama. ⁵¹ He mweni wakula etsi Nia kuleza ni kiedika kioshu wakamona hulu dia kungula a wanjio jia Nzambi ni kukanduka ni kukulumuka kudi Mwana wa Muthu.