¹ Theolphile Mu mukanda wemi wathethi ami nia sonikini mambu moshu amana mayanjikidi kuhanga Yesu ni makhedi kulonga ² tii mu lutshiku lwa kandukidi ku hulu. Yakhedi kumanima ma kuhwa athumwa jienji asodidi tshiku mu djila ya Pevi ya Longu mweni wakhedi kuwa wudikila kumanima ma kumona pashi. ³ Wakhedi kuwa kumwekana matshiku makumi mawana ni kuwa longa mambu ma kifumu kia Nzambi. ⁴ Tangwa diakhedi kuwanina nawu wa walombidi katuka oku ha Yeluselemi kashi amakinini kilaji kia Tata kikwa kulanga etsi Enu nwevidi kudi ami etsi ⁵ Yowani wkhedi kubotika mu meya kashi enu nu kubotama mungolu jia Pevi ya Longu mu matshiku menama. ⁶ Tangwa diakhedi awongama eni amuhula Fumu kia matshiku ayi waka yanjika waka yadika kifumu ku Yisaledi? ⁷ Mweni wa walezidi eni etsi kikuma kia lutshiku ni tangwa manu tadidiku enu. Tata mu kifumu kienji wazenga kadi mu pila yenji. ⁸ Kashi enu nwa kanona ngolu tangwa diakheza Pevi ya Longu kudi enu Enu nwa kakhala athemu ku Yeluselemi ku Zude ku Samarie ti kutshuka ya thothu. ⁹ Tangwa diamanisini Yesu mu kuwaleza mambu menamana moshu wakhedi kutala ku hulu watuka ni kwenda thuta dimoshi diejidi ku wawinda eni ku momona epi lo. ¹⁰ Akhedi kaka kutala ku hulu kwakhedi kwenda Yesu mu mbala yimoshi athu mbadi skhedi avwata miledi yitoka ezidi penapena ni ¹¹ eni ni kwakula etsi anu akwa Ngadidi ekha nwahwenina henaha ni kutala ku hulu. Yesu oyu wakanduka ku hulu wakeza kuvutuka kaka pila ya kanduka. ¹² Eni he akatuka ku mundonda wa ma olive avutuka ku Yeluselemi mundanda weni wakhediku alaha ni Yeluselemi kitesu kia ma kilometre kimoshi. ¹³ Kiela atula anina kusuku diakhedi ku etage kwakhedi kukhala thethi. ¹⁴ Kwakhedi Petulu Yowani Yakobi Andela Fidipa Toma Batolomi Matayi Yakobi mwana wa Alfe Simoni dipasa ni Zude mwana wa Yakobi. Eni oshu akhedi awongama mudi muthu mumoshi ni kukwamina kaka mu kusambila ni a mama bosu Madiya mama ya Yesu ni a pangi jienji. ¹⁵ Mu matshiku menamana Petulu wazangulukidi akatshi kowu oshu akhedi kitezu kia 120 wa waleza etsi ¹⁶ Apangi kudi fhunu yingi ndaka ya Nzambi yi hangami pila ya kudidi muhunga wutoka mu kanu dia Davidi kikuma kia Yudashi wa sadisidi athu akwatidi Yesu. ¹⁷ kikuma wakhedi ni etu ni kunonanga epi ndambu ya lufutu lwenji mu kisalu kienji. ¹⁸ ( Lelu muthu mweni wasumbidi kilanga ni lufutu lwa kisalu kienji kiabola. Kienikioki abwidi mutu hashi mwila wenji wabetuka yitshini yitshini misowa yenji yoshu ya lungumukini hanji. ¹⁹ Mambu menama mejianganini kudi akwa Yeluselemi kienikioki ahwedi kilanga mwenekina jina dia Akeldama bosu etsi kilanga kia mashi.) ²⁰ Henihohu yasonimini mu mukanda wa Khunga ya Davidi etsi Lekenu kilanga kienji kikhini kia konda fhunu muthu ku kujinga momu lo. Leka muthu mwekha anoni palashi yenji. ²¹ Yidi fhunu yingi tusodi muthu mumoshi mu katshi kawa a twenda kukhala nietu tangwa ditwakhalanga ni Fumu Yesu katuka kubotama kwenji kudi Yowani tii ²² lutshiku lwendidi ku hulu niwakhedi themu ni etu mu tangwa dia tokimini mu lufwa. ²³ Eni hahitishidi athu mbadi kumesu Yosefi watambikanga Barsabbas,jina dikowu Justus ni Matthiasi. ²⁴ Eni asambidi Nzambi ni kwakula eki Ayi Fumu wejiya mitshimia mia athu oshu tuleji nani mu katshi ka athu awa mbadi wasola ²⁵ mu kunona palashi mu kisalu ni kukhala thumwa kia zangidi Yudashi wahanga luzolu lwenji. ²⁶ Eni hombidi bwadi. Mattiasi wa sodiwidi amushia mu ndonga ya athumwa kumi ni mbadi.