¹ Tangwa dialungidi lusthiku lwa Pantekoti owushu akhedi awongama homa hamoshi. ² Mu mbala yimoshi mayema makatukididi ku wulu makhedi mudi funji ya ngolu mazadidi mu nzu yoshu mwakhedi. ³ Amweni yima ya wa wudikila mudi thuya ya dikapa yakhedi mudi ludimi lweza kukhala a mutwa wa koshu muthu katshi kowu. ⁴ Azadidi owuoshu ni Pevi ya Longu ayanjikidi kwakula ji ndaka jekha pila yakhedi kuwaleza Pevi. ⁵ Mu tangwa mwenedina ku Yeluselemi kwakhedi kujinga Ayuda athu a mitshima mia pimbu akatukidi ndambu yoshu. ⁶ Tangwa dia bwidi mayema eni ejidi kuwongama munzu mweneyina ni kuyituka kikuma muthu ni muthu wakhedi kwivwa a khidishitu ni kwakula mu ndaka ya kwimbu diowu. ⁷ Ayitukidi hengi ayanjika kudihula etshi athu mwena oshu akwakulanga eshiku akwa Ngadidi. ⁸ Kikuma kiakhi koshu muthu mu katshi ketu wenda wa wevwa ni kwakula mu ndaka yenji ya kwimbu. ⁹ Mu katshi ketu mudi nia athu akatukididi ku Perse ku Medi ni Elami ku Mesopatami ku Zude ni Ku Kapadosen ku Pont ni ku plovinse ya Asi ¹⁰ ya Fidizi ya Pamfidi ya Ngipiti ti ku ndambu ya Libi didi penapena ni dimbu dia Sirene ekha edi anzenza akatukidi ku Loma. Kudi ni ekha atetukidi ¹¹ Ayuda ekha kama ekhina kusambila Nzambi wa Ayuda akwa Krete ni ni Arabi kashi twahwevwa ni kwakula mu ji ndaka jietu mambu majima ma Nzambi. ¹² Eni oshu ayitukanga pila ya kwakula lo ni kuhwangana etshi mambu ekhi mabwa ¹³ Ekha kama akhedi kuseya eni azela maluvu. ¹⁴ Kashi Petulu wazangulukidi ni Alonguki kumi ni mumoshi wathutha ndaka wa waleza etshi enu akwa zude ni enu akwa Yelusalemi evwenu mani ku nu leza ejikenu ekhi. ¹⁵ Athu awa eshiku azela maluvu mudi ki nu kubanzanga kikuma tudi kaka mu 9h dia suka. ¹⁶ Kashi talenu mambu makudidi mbikudi Yoel ¹⁷ Tangwa diakeza matshiku ma tshuka Nzambi wakula nia ka mwanga Pevi yemi kudi athu oshu. Ana jienu amala ni akhetu a ka bula kubikula. A ngunza a ka bula kumona mambu medi makusweka athu a nuna a ka bula kulota ndoji. ¹⁸ Pila yimoshi ni kudi asadi jiemi akhetu ni amala mu matshiku ma tshuka nia ka mwanga Pevi yemi eni epi aka bula kubikula. ¹⁹ Nia kahanga mambu ma kuyituka ku hulu ni yidimbu yekha ashi mashi thuya ni mishi ya kakhala. ²⁰ Mwania wakhekhina pipa ngonda wa kabenga mudi mashi kumanima lutshiku lwa keza kulunga lwakhakhala lujima ni lukumu. ²¹ He Koshu muthu wa kasambila mu jina dia Fumu wa ka huluka. ²² Enu akwa Yisaledi yivwenu mambu ama Yesu mukwa Nazaleti wudi muthu oyu Nzambi wa lombuludidi kifumu kienji kikuma enu mweni nwejika etshi Nzambi wahangidi mambu majima ni mambu ma kuyituka ma pila ni pila mudi kinwejiya enu mweni. ²³ Nzambi wakanini kadi kienekina wejikidi yanjika thama etshi eni amukahana kudi athu abola pila yidi tshiku jienu nwa mu khokhidi a kulunji ti nwa mu jiya. ²⁴ Nzambi wa mu tokimishini mu lufwa wa mu katula mu pashi jia lufwa kikuma lufwa lwambidiku ku mu nunga. ²⁵ kikuma Davidi wakudidi etshi Ami ki nienda kumona Fumu tangwa dioshu kumesu mamemi wudi kukhoku dia kitata kikuma ami ni leki kubwa kisakasaka. ²⁶ Kienikioki mutshima wemi wudi ni kieshi mu ku kuhwa lukumu mwila wemi moyi kikuma nienda kushia mutshima kudi ayi. ²⁷ Kikuma ayi wa kashisa oku moyi mwemi kwimbu dia athu afwa waka zola oku etshi ami muthu weyi ni bebi. ²⁸ Wa ka nguleza njila ya moyi wa ka bula kukhala niami tangwa dioshu. ²⁹ A pangi nia zola kunuleza pwelele kikuma kia khakha Davidi mweni wafidi amujika majiamu menji medi ni lelu. ³⁰ Wakhedi mbikudi wejikidi lusilu lwa shidi Nzambi etshi waka yadika muthu wa kikanda kienji a kitshi kia kifumu. ³¹ Mweni wejikidi kadi kutwala mambu ma kutokama mu lufwa ma Kidishutu Mweni ka kamuleka oku akhadi mu katshi ka athu afwa mwila wenji epi wa lungidiku kubeba. ³² Yesu mweni Nzambi wa mutokimishini mu lufwa etu oshu tudi a themu. ³³ Wudi ku khoku dia kitata dia Nzambi wanona Pevi ya Longu kudi Tata wa yi mwanga mudi kinu ku monanga ni ku nu kwivwanga ³⁴ Kikuma Davidi ka kandukidiku ku hulu kashi wakudidi etshi Fumu walejidi ³⁵ Fumu wemi etshi shikama ku khoku diemi dia kitata tii kooku ku nia kashila a mbeni jiehi ku mashina mia miendu yeyi. ³⁶ Akwa Yisaledi oushu afeti kwijika mboti mboti etshi Yesu wunwa khikhodi a kulunji Nzambi wa mu sodidi akhadi Fumu ni khidishitu. ³⁷ Kiedidi evwa mambu menamana mawa hwedi pashi ku mitshima miowu hehula Petulu ni Athumwa ekha etshi A pangi ekhi tu feti kuhanga. ³⁸ Petulu wa wavutudila etshi balulenu mitshima mienu nu noni mbotika koshu muthu mu jina dia Yesu khidishitu kikuma Nzambi a nu vudishidi kubola kwenu nu swakadi kunona Pevi ya Longu. ³⁹ Kikuma kilaji mwene kina kidi kienenu ni ana jienu oshu ni edi kwalaha ni anzenza aka tambika Fumu Nzambi wetu. ⁴⁰ Mweni wakhedi ku waleza mambu mekha ni ku wahwa kikesa mweni etshi hangenu ngolu nu huluki kikanda kietu kia bila nzila. ⁴¹ Akumbudidi ndaka yenji awa botikidi kaka lutshiku mweno luna akhedi athu mafunda masatu ejidi kuyikama. ⁴² Akhedi kushia ngolu mu kwivwanga malongi ma Athumwa ni kujinga mu kipangi ni kudia homa ha moshi ni kusambila Nzambi. ⁴³ Akhedi ni woma wingi kikuma kia mambu mengi ma kuyituka makhedi kuhanga Athumwa. ⁴⁴ Eni oshu akhedi kukwikila ajinganga mu kimvuka ni kushia yima yoyu yoshu hama hamoshi ⁴⁵ Akhedi kusumbisa yima yoyu ma lupangu mowu ni ku kapangananga pila yakhedi fhunu ya koshu muthu. ⁴⁶ Koshu lutshiku akhedi kaka ni kikuma kimoshi mu nzu ya Nzambi adianga homa hamoshi mu manzu mowu ni kieshi ni mutshima wa shipama. ⁴⁷ Tangwa dioshu akhedi kuhwa Nzambi lukumu ni athu oshu . Fumu wakhedi ku lunda athu ekha akhedi kuhuluka.