Kabu 1

1 Simoni Petulu muhika ni thumwa wa Yesu Khidishitu kudi awa anona lukwikilu lwa pimbu mudi ki twa lumona lukwikilu mu masonga ma Nzambi ni Yesu Khidishitu fumu. 2 Leka khenda ji khadi nienu leka ngemba yi kandwashi kwizika kwa Nzambi ni Yesu Khidishitu fumu. 3 Mu mambu mosu matala ngolu jia Nzambi mu lujingu lwa tuhwa mu kwijika Nzambi owu watu tambika mu khembu yenji ni masonga. 4 Mu yima eji wa tu shila yilaji kia pimbu yakhedi kiene kina kikuma nu khadi enia kibuka kia ku wulu niku katuka mu kuhanga mambu ma bola medi mu kifutshi kikuma kia mambu ma bola. 5 Kikuma kioki hangenu mosu mu kuhanga ma pimbu mu lukwikilu lwenu hanga ma pimbu mu kwijika kwenu. 6 Mu kwijika kwenu yikenu kushipula he muku sipula kwenu nu yiki kikesa kikesa kinu yiki khenda. 7 Khenda ji nu yiki kuzolangana mu kimvuka yikenu luzolu. 8 Kikuma kivwa yima yidi mwenu yakula nukukhaloku akhobu mu kwijika fumu etu Yesu Khidishitu. 9 Kashi mwosu owu yima eyi yakonda ni owu wuku henganga kaka ma bela bena wudi povu wa jimbangana masumu menji ma ntama. 10 Mu yosu apangi khalenu akubama mu kutambikama ni kusolama ivwa nwenda hanga mambu ama nu kubwoku. 11 Kieni kioki nwa kengila ku wulu dia fumu etu Yesu Khidishitu. 12 Kieni kioki nwa ka khalanga kaka nwa kubama muku nubambukisa ata nwa mejika aha nwekhina ngolu mu masonga. 13 Niabanza ni medi masonga kudi ami mu kunu temusa ni kunu bambukisa mambu ama mu matangwa mosu nidi mu ngandu. 14 Kikuma niejika ntama loni ni ku wudika mu ngandu mudi pila fumu Yesu Khdishitu andejidi. 15 Ni kuhanga mosu nu bambukingi mambu ama ata nishiku. 16 Kikuma twa kabidiku panji jia kupopa ki twakudidi ngolu jia kumwekhana kwa fumu Yesu Khidishitu kashi a themu amweni ni mesu ma kifumu. 17 Kikuma wanona kwa Nzambi tata khembu ni lukumu tangwa ndaka ya khembu ya wudikidi owu mwana memi wu nia zola lawu wu nienda kishila mutshima. 18 Twevidi ndaka ya katukanga ku wulu tangwa di twakhedi ku mundonda wa santu. 19 Tudi ndaka yena ya mbikudi eyi nwahanga pimbu mu kukangama nayi. Yidi mudi mwinda wuku lemanga homa hedi pipa tii tangwa di wudiki tu tumbwa twa musuka tu wudiki mu mitshima yetu. 20 Ejikenu theti ata mbikudi wa yisona mu moshi loni wejidi enjimweni. 21 Kikuma ata mbikudi mu moshi kezoku mu luzolu lwa muthu mukutala athu mu ku twadisama kwa pevi ya longu akudidi Nzambi.