¹ Etu twejika etshi, yivwa manzu metu ma henaha hashi ma zangana ,twa ka nona manzu ma pimbu ku wulu dia Nzambi. Manzumenamana meshiku ama menda kuhanga ni mokhu ma athu, kashi manzu ma mvula ni mvula medi ku wulu. ² Twenda twa mona lamba mu manzu metu medi mudi ngandu, tii koku ku twa kanona manzu metu medi ku wulu. ³ Kikuma twa zola kaka etshi tuvwata miledi, tuleki kukhala khonga. ⁴ Tangwa di tudi khadi mu manzu ngandu, twenda twa mona pashi, ni woma. Kikuma, twa zodidiku tushishi muledi mikulu, kashi ywa zola kuvwata ya katataka ha wulu dia yikulu. ⁵ kikuma etshi kimuthu kietu kifu, tunoni moyi wa mvula ni mvula. ⁶ Henihohu, kumbulenu, ejikenu etshi, tangwa di tudi kujinganga mu kimuthu, tudi kwa laha ni Fumu. ⁷ Kikuma hashi a tudi, twenda twa jinga ni lukwikilu, tushiku kumonanga pwelele. ⁸ Kikuma tushienu ngolu, mu kukhala kwa laha ni kimuthu, mu kwenda kjinga pena pena ni Fumu. ⁹ Kienikioki, kima kijima kidi kaka etshi tu feti ku mu sepidisa, ata tudi mu kimuthu to twa katuka mu kimuthu. ¹⁰ Kikuma etu twa ka sambwa ku thwala ya Kitshi kia kifumu kia Khidishitu, koshu muthu mu mambu ma mu tadila , wa ka nona eyi ya lunga kudi mweni, yivwa wakhedi kuhanga mambu ma pimbu to mabola henaha hashi. ¹¹ Mudi ki twejiya kulemvuka kudi Fumu, twenda twa henga kuleza athu lawu mu kuhanganga kienekina. Pila yi tudi etu, yidi yiejangana pimbu pimbu kudi Nzambi, nia zola epi nu mejiki pimbu pimbu mu mitshima mienu. ¹² Etu, tushiku kadi twejiangana kudi enu, kashi twenda twa nu leza mu ku bula thulu kikuma kietetu. He enu nwa kijika kamu kuhana mvutu kudi athu enda kuleka ku bula thulu kikuma kia mambu medi maswamana mu mitshimia, kashi kaka kikuma kia ama menda ku mwekana ku mesu. ¹³ Kikuma, yivwa nia mweniku mambu, medi kikuma kia Nzambi, Kashi mu mambu ma nu tadila, nienda kukhala ni mabanzama pimbu. ¹⁴ Luzolu lwa Khidishitu lwenda lwa tu twadisa, kikuma twejiya etshi muthu mumoshi wafidi kikuma kia athu oshu. Menda ma lombulula etshi athu oshu akekhina mudi amvumbi. ¹⁵ Khidishitu wafidi kikuma kia athu oshu, mu pila etshi athu edi ni moyi, moyi weni wukhala oku wowu mweni, kashi wukhadi kikuma kia muthu oyuna wafidi ,wa tokimini mu lufwa kikuma kieni. ¹⁶ Kienikioki, yanjika lelu, tu ku zengilanga oku muthu mambu pila yetu ya kimuthu, mbata kashu twakhedi kutala Khidishitu ni pila ya kimuthu. Kashi kikimweni tushiku o kutala muthu pila yeneyina. ¹⁷ Medi etshi, yivwa muthu wudi mu kimvuka ni khidishitu, wekhina muthu wa katataka. Mambu ma kulu moshu mahwa, tala he moshu mekhina makatataka. ¹⁸ Mooshu komu menda makatuka kudi Nzambi, weza kwivwangana ni etu mu njila ya Khidishitu, mweni epi watuhwa etu kisalu kulonga athu kwivwangana ni Yesu. ¹⁹ Kikuma Nzambi wakhedi ni Khidishitu, enjimweni weza kwivwangana ni athu mu kifutshi, konda kutanga masumu mowu. Wa nguhwa ami kisalu kia kulonga mambu mahitanga pimbu. ²⁰ Etu a tu sola mudi Milopu ya Khidishitu. Nzambi enjimweni wenda kutambika athu,tangwa di nienda ku wa bondila mu jina dia Yesu. Twenda twa nu lembila mu lozolu lwa Khidishitu etshi:" Shiangenu ngolu, Nzambi a nu yambi mu malembi. Mweni wa zodidi etshi Khidishitu anoni yilo ya masumu metu. ²¹ Mweni ka hangidiku ata masumu, wekhinini mudi muthu a masumu, kikuma etu twikini a longu ku mesu ma Nzambi.