¹ Kienikioki, kikuma etu twa nona kisalu mweneki mu khenda jia Nzambi, etu twa lungidiku kulembwa. ² Etu twa leka kadi mambu mabola menda kuhangama mu kitsweki. Twend'oku kuhuna athu, twend'oku kwalumuna Ndaka ya Nzambi. Kashi, ki twenda kulonga mambu makiedika, twenda twa lunga kumesu maathu oshu enda kuhenga Nzambi ni mutshima womoshi. ³ Kashi, yivwa Tsangu ya mboti yidi ya kuwinda, yidi kaka kudi athu edi kubilanga. ⁴ nzambi wa henaha hashi wa winda mabanza ma athu enda kukonda kukwila. Eni eshiku a lunga mu kumona kieji kia Tsangu ya mboti, ni lukumu lwa Khidishitu oyu wudi kijiji kia Nzambi. ⁵ Twend'oku kulonga tsangu yetu mweni lo, kashi khidishitu Yesu mudi Fumu, etu mweni kamu asadi jienu mu luzolu lwa Yesu. ⁶ Kikuma Dieu enjimweni wakudidi etshi:" Kieji kia ngalumuka mu midima," ni mitshima yetu, mu ku kienzula mayela mu kwijika Lukumu lwa Nzambi lwenda kumwekana ku bunzu ya Khidishitu. ⁷ Kashi etu twa nona kimvwama kijima, kidi mu katshi k'etu mudi mu nzungu ya wuma, kikuma muthu mwoshu ejiki etshi lukumu lujima ludi kudi Nzambi, keshiku kudi etu. ⁸ Etu enda ku tuyangisa pila lo, kashi twenda'oku kulembwa. Enda ku tuhwa pashi, kashi twenda kukasa mutshima, ⁹ enda ku tuhwa lamba, kashi Nzambi kend'oku ku tuleka, enda ku tu bwisa hashi, kashi tii lelu edi kend'oku ku tu jiya. ¹⁰ Etu tudi twa vwata mu mila yetu Lufwa lwa Yesu, kikuma etshi moyi wenji wu mwekani mu mila mietu. ¹¹ Etu tudi ni moyi, tu ku bula kuwangina ni pashi jia pila ni pila kikuma kia kuzola ku twa zola Yesu. Kienikioki moyi wa Yesu wudi kumwekananga kudi etu mu mila mietu mia kimuthu. ¹² Kienikioki, lufwa ludi ku tu nwanisanga, kienekina enu nwenda nwa nona moyi. ¹³ Kashi etu tudi ni Pevi mu lukwikilu lwetu,mudi ki medi ma kusonika etshi:" Ami ki nia kwikididi, kienikioki nienda kwakula."Etu twa kwikila, kienikioki tudi kwakudilanga. ¹⁴ Twijikenu etshi oyuna wa tokimishini Fumu Yesu mu lufwa, wa ka tu tokimisa nietu mu lufwa, waka tusenda ni enu penapena ni mweni. ¹⁵ Mambu menama moshu medi kikuma kwa kuzola kwenenu, kikuma etshi khenda jia Nzambi ji mwangani kudi athu lawu, lukumu lukhadi kudi Nzambi. ¹⁶ Kienikioki, twa lungidiku kulembwa etu. Ata mwila wetu wazangana, moyi we'tu mu katshi wa ka bula kwalumuka tangwa disohu. ¹⁷ Mu tangwa fioti, pashi ji tudi kumonga jia kalumuka jienda jia tulonga, twa ka nona lujingu lwa mvula ni mvula lwa hitanga. ¹⁸ Etu twenda kushia mutshima ku yima yenda kukonda ku mwekana. Eyi yidi kumwekananga yidi ya tangwa ditshiotu, kashi yi kulekanga kumwekana yidi ya mvula ni mvula.