¹ Ntang ni Yezu eyinde ileng lelivle a Ble eshu e kisabatu. Alongoki ende ezuk wa nza, mpi me tiang(buka) wa Ble mpi me lawa. ² Ntang Amfarizi me yen no eshuong ngeni, me tib wa w mbon:" kiang! Alongoki eyia ape kie nge lak nsik eshu e kisabatu be". ³ Kansi Yezu ndawa ndamugne :" no te tang no nge kie Davir ntang nge yinde lanza, nde ndavar nge yi wande? ⁴ Insenge nge swe nde levl'e e Nzama, mpi me la nde ndavar ande mampa nge pawa Nzama, ata eyiwa nsik lawa lela itsen Angang a Nzama avar eyia lanswa lelaza? ⁵ Keti no tatang no lonkan ensik e Moyize be ke konso eshu lepem, Angang-a Nzama ape laba nsik eshu keni levl'e e Nzama be? kansi zapa l'e ipwa lev'yi e Nzama be!. ⁶ Me ntakab no otin na, ngele ana ameleng evl'e e Nzama lamfun. ⁷ Keyi no eyiano eme nge lag za: palang me avar awil atung ngi, ke lempame makab e niam; ope lang no le belsa avar ngele ipwa mpang akie be. ⁸ Itsen van wur ale nk'mu ishu lepem. ⁹ Yezu me lim nde loka nge yinde, me swende levl'e ewa enzama. ¹⁰ Wur emwa eyinde ani, ewua kifu. Avar amwua eyiwa ani eling wa lefun Yezu wa mugne nda me kie obe; ebun moyul nde:" keti ansik eso apapa nswa lebusa wur eshu lepem?" ¹¹ Yezu makal nde otin na:"ozuk wur leti eno ale nd'imeme, imeme za amekwa lipuk eshu lepema, kakiende nge? keti nda poka lovey ti lopur lipuk be? ¹² Wur ale mfun ngaling imeme! Itsen laza, ipwa be lelul wur eshu lapama." ¹³ Yezu me tib nda wur ekifu lewua nda mugne:" sim ewua yia". Me sim nde za,mpi mekum za nsa nse ewua emwa ngeni. ¹⁴ Amfarizi me ketay wa itsen ledjak Yezu. ¹⁵ Ntang nge yia Yezu eshuong za,me lim nde ani. Olal avar olab itsen ebulaka nde anga nkang kakin. ¹⁶ Kansi eyinde akebisa ti apawa atasio nda mugne:" obia kab no avar amwa me nde ne !" ¹⁷ Eyiwa mbosa itsen lale lungisa eshuong nge tib mbikur e Zayi. ¹⁸ "Nzama nda mugne: ena wur eme nge pon me lensadil me, ndale wur palang me, nge pankie kiese iv're. kopame nde mpeve eme; ke nde kakab nd'avar a boo ngele me mesil lampagne. ¹⁹ Nda potsuk ntem be, apo kie eshuong lembok za be, nsawur kazuk otib ende lebabal be. ²⁰ Nda pobiak nsekey epwa be, nda popelsa tshia be losim emwin ngele apepel nsa be. kalab nde tii ngamung nde eshuong kakwa-kakwa. ²¹ K'avar kanso katsuk wa otum lewa nde. ²² Ntang ni,me yil wa Yezu nk'l, v'yi diak enga wie; itsen eyinde lmpeve ipwa. Yezu mobelul nde mpi me tib nde mpi me yen nde. ²³ Avar kanso me yituk wa,we yul-yul we:" obo, wur na apoza van Davir be?" ²⁴ Ntang nge zuk Amfarizi eshuong ni, wa mugne:" ndepur ampeve ipwa ke labir e nk'mu ewa satan Belzebul. ²⁵ Kansi Yezu akeyi ngin ewa, makab nda mugne: konso ok'mu ngele avar elwa wa la wa, kawa za, ozuk avar awaa emwotuk to ensob e emwotuk elwa wa la wa, wa ni to nsob ni epezing be. ²⁶ Ozuk Satan epur nde avar nde ngaza, wa kabuan ke kimfum ende kazing za ensengi? ²⁷ Patib namugne me papur me mpeve labir e Satan Belzebul. Kansi Alongoki eno, labir eni papur wa za? Ozuk eyi mbosa, eshuong pakie Alongoki eno ngaza palak za mpeve dji-dji be! ²⁸ Kozuk me ntepur ampeve ipwa labir a mpeve e Nzama, zelak kimfum e Nzama emekum leti eno. ²⁹ Wur ape len aling leswe levl'e engabir leywong abim ande be, ozuk nde patobam nde esim ntete be. Kozuk nda mobam esim, nda len leywong abim kanso levl'e ende. ³⁰ Wur ngele ewur eme be, ale mben eme, wur ngele ape nsalsa le vukisa avar amwa be wa me be,papay nde wa. ³¹ Nduk za me ntetib mano: la masum kakin ngakie avar itsen lovuenza avar lewa Nzama, Nzama ka lolul nde wa, kansi nda palolul wur nge vuenza Mpeve-Santu be. ³² Wur kokin ngatib ipwa itsen la van-Nzama, Nzama kololul nde. Kansi wur ngatib ipwa itsen la Mpeve-santu, Nzama apololul nde be, ata le ntang na ata lenshu ngize. ³³ "Ozuk elang no leva mbur iwuo, efetel leza no mpi losung ewuo; ozuk olano losung epwa, kavano mpi mbur epwa. konso osung poyiawa nde lambur ende." ³⁴ No aniam ngena, ozuk nolano avar apwa, otin nge kalen no letib eshuong ewuo? itsen wur patib nde eshuong meyu lotum e nde. ³⁵ Wur ensa papur eshuong ngele lewa nde; wur epwa papur mpi eshuong eyinde ipwa-ipwa lotum. ³⁶ Wur ewuo papur nde eshuong ende ewuo lotum; wur epwa papur nde mpi kipwa pafi onsun lotum. Mentakab leshu kasamsa Nzama avar, kasam wa leshuong e mpampam nge tib wa. ³⁷ Nzama ko nungisa nde yia to kobelsa nde lekanso patib yia." ³⁸ Ntang na, Along amwa ansik ti Amfarizi imwa me yul wa Yezu:"Long, so ling leyen kidim nge lak yole la kiyek. ³⁹ Yezu makal nda mugne:" No avar a ntang na, no la no avar apwa, no mpi lukwikil be! Eling no ley kidim, kansi Nzama apa zen no kidim inki be, keze kwa ngeyi mbikur Yonasi. ⁴⁰ Otin ngeyi Yonasi lensobo ense enen nshu isar mbi-otshu, otin keni mpi van-wur kazande leboo nshu isar otshu ti mbi. ⁴¹ "Leshu nge samsa Nzama avar, avar a waa Ninive kasumwa okamwa ti avar a ntang na, k'wa kafun wa no itsen etshim wa etum ntang nge zuk wa malong e Yonasi. Kansi, ana ale ti wur meshun Yonasi!" ⁴² Leshu kasamsa Nzama avar, nk'mu onkar sud kasum nde okamwa ti no avar a ntang na, k'nde kafun nde no itsen ifinde nsuk e boo, mezende ezuk eshuong ayel ngeyi Salomo etib,kansi ana ale ti wur meshun Salomo!" ⁴³ "Ozuk mpeve epwa eme pwe lewa wur, patar za ngele vey be itsen leva oka lepem. Ozuk zateva oka be, ⁴⁴ Katib za lotun ke: mentikal evl'e eme loka pazame. Ntang me kalza luna, ozuk zateyen avar levl'e be, wozuk nki, loka ewa e ngapung. ⁴⁵ Ntang na, kakeza levey ampeve inki diak isambia ipwa ngaleng ngeyi oso; ampeve ni kazeswe za levl'e keni lezing. Lensuk eshuong na, luzing ewur ke na kaza za ipwa ngaling osu. Kazaza otin emwotuk lavar apwa lentang enwan." ⁴⁶ Ntang ngeyi Yezu etib ke nda var keni,maa nde ti atung ande eze marwa lelien lakab nde oshuong. ⁴⁷ Wur emwa makab ndamugne:" kiang, maa yia ti atung ayia ale lelien, wale ti dji lokab." ⁴⁸ Yezu makal mbon:" Maa me ni, atung ame wani? ⁴⁹ Yezu me shong nde Alongoki ende ewua ndamugne:" kiang no: Maa me ti atung ame ndona. ⁵⁰ Wur kakin pakie eshuong palang Taa me ledzuk, nde keni ale atung eme empam to onkar,to maa me."