¹ Yezu, mu ntangu ka ba kutikisiki ba kumi ye bola,ba hele ngolo ye n'swa mu pheve zi mbi zakulu, ye ngolo zi ki pheve zi ku kodisila ba mbeefu. ² Ba tumi ba teya ki Pfumu ki Nzambi ye ku kodisa ba mbeefu. ³ Lu mongiku kima samu di nzietelu, ba kambi, kete ki tini ki n'ti, kete sakoshi, kete di pha, kete mbongo, phe lu kadiku ye ba kazaki boola. ⁴ Mu zi nzo zi kaka zi lu banda kwe koti, lu kala mwa muna; phe mwamuna lu kwendila. ⁵ Phe, na batu ba luyambiku, lu lubuka mu mavula mana, phe lu nkukumuna pfututu bitambi bi beno, mu ku tendula ki kuma ki bawu. ⁶ Beele, phe ba kangadi mu hata ye hata, ye kwe phanzi tsangu mboti ye kwe kodisi mwakulu bimbefo. ⁷ Elodi Pfumu zola kwe m'budi matadi widi makulu mana makala kwe salami, phe kakala yaboko kuyindula. Samu ba hika bakala hoyaka na Yowani futumuki ku bafwa. ⁸ Baatu bakaka ba hoyiki na Eliya wiisa ; ba hika na m'bikudi (polofeti) mosi mukati di ba bikudi ba mbuta wu futumuki. ⁹ Mana Elodi ka kala hoyaka: yi n'tabusisi Yowani n'twa; na kene bwa wandutu, wu yi kwe wi ba kwe hoyidi biima bi bwaabu? Phe ka diingi ka ka'mona. ¹⁰ Ba ntumwa, ba kala mu ku kabuka, ba teele phandi kwe Yezu maakulu ma ba sadi. Ba moongi ye yaandi, phe ba katuki beele ku khaala, ku ndambu yi mavulu ma ba telaaka Betesayida. ¹¹ Bi buka, ha biyeebe, bi n'leende. Yezu ba yambi, phe ka kala ba hoyila mu ki Pfumu ki Nzambi ; ye ka kodisi phe baatu ba bakala ye m'pfunu ku kola. ¹² Samu masika ma yandiki kwe bwi, ba longoki baa kuumi ye bole ba phusani, phe ba n'kambaka : Kabula kibuka, mukusia ne beenda mu mahata ti mu mahata ma n'tseke ma nziunga, samu di ku nimba ye ku dinga bima bi ku dia; mu diambu ntwene haka ha nkatika tseke(n'toto wu konda ma dia). ¹³ Yezu ka ba samunaka : Lu ba heka Be nweno bima bi ku dia. Mana ba kabusi mvutu : Ntwene kaka ye ma pha ma tanu ti ye ba mbisi ba mamba boola, kolu na ntwenda be twetu ntwe suumba bima bi ku dia samu di n'kangu wawu. ¹⁴ Mu kutala, ha kala ye ki tesu ki mafunda ma tanu ma ba yakala. Yezu ka hoyaka kwe balongoki baandi : Lu bazakadisa mu n'longa wu makumi matanu. ¹⁵ Ba sadi bwa buna, ba bazakadisi baakulu. ¹⁶ Yezu mongi ma pha maa matanu ti ye ba mbisi ba mamba ba boola, phe, tadisi meso ku zilu, phambudi bi dia. Phe, kabisi bi dia, phe hene kwe ba longoki, mu ku songa na ba kabisa ku kibuka. ¹⁷ Baakulu ba diidi phe ba yukuti, phe bisa kabusa bi tunga makumole bi bi tini bi ma pha bi kabaasi bi seele. ¹⁸ Kilumbu ki mosi ki ka yenda sambila Yezu ku khaala, ka kala ye ba longoki baandi, ba hiudi ngiufu yayi: Na ba kwe hoyi yene mene? ¹⁹ Ba kabusi mvutu: Yowani mbitiki, ba hika, Eliya; ba hika diaka, mosi mu kati di ba polofeti (m'bikudi) futumuki. ²⁰ A beno, ba hiudi, na lweka hoya yene? Phiele kabusi mvutu: Klistu wu Nzambi. ²¹ Yezu ba busidi ye ku ba tsikaka ba hoyiku kwe mutu. ²² Yiki diaka na ku fwene mwana mutu ka mona phasi ziingi, ba n'losi kwe ba mbuta ba dibundu, kwe ba nganga Nzambi ba mitsiku ti ye kwe ba siklibi, ba n'hondi, phe futumuki ku manima ma bilumbu bitatu. ²³ Phe ka hoyaka kwe baakulu: Na mutu kazodi kisa ku ma nima ma mene, ka busa mambi maandi, ka mongaka konso kilumbu kiyeka ki kulunzi diandi, phe ka ndanda. ²⁴ Samu wuna zola ka hulusa luzingu lwandi ka lu ladisa, mana wuna ladisa luzingu lu yandi samu di mene ka hulusa lwo. ²⁵ Mu nki di n'sadisa mutu kanunga n'toto waakulu, na yandiene keka di bebisa tô ka di ladisa yandiene. ²⁶ Mu diambu wuna kala ye tsoni zi mene tô zi ndinga mene, mwana mutu phe ka kala ye tsoni zi yandi, mu tangu di ka kwisa mu n'kembo-andi, phe ye mu n'kembo tata ti ye di ba wanzio ba santu. ²⁷ Yeeka lu samuna mu ma songa, ba hika mukati di baatu ba bene haka ba fwoko na ba mweneko kimfumu ki Nzambi. ²⁸ Kunima bilumbu nana haka hoyi mambu mana, Yezu mongi Phiele, Yowani, Zaaki, phe ba tombuki ku mongo samu di ku sambila. ²⁹ Mu tangu bakala sambilaka, kilunzi ki yandi ki sobi nkadilu, phe n'lele yandi kumi wu ka seme ye ku ngenge ³⁰ Phe tala baatu bola ba kala solulaka ye yandi, ba kala Moyize ye Eliya, ³¹ bana, ba monani mu kati di n'kembo, ba hoyidiki kwenda ku yandi ku ka ye lungisa ku hata di Yeluzalemi. ³² Phiele ye ba nduku baandi ba kala ku mwa kilu, mana,mu tangu ba sakuki ku kilu, ba mwene n'kembo Yezu ye batu bola ba ka kala bawu. ³³ Mu tangu ka hambasani Yezu ye batu bana, Phiele ka n'kambaka: N'longi, ku kala mboti ntu kala hakaka; Ntu tunga zi nzo Nzambi tatu, mosi yi ngeyi, mosi yi Moyize phe mosi diaka yi Eliya. Ka kala yabaku mambu ma ka kala hoyaka. ³⁴ Samu ka kala hoyaka bwabuna, dituti dimosi diisi disa ba fika; phe ba longokiba wudi boma ha ba ba mwene ba koti mu dituti. ³⁵ Phe mu kati di dituti ndinga yi lubuki, yeke hoya: Wandu kene mwana mene wu tondama, mwe yandi tsiidi kiitu ki mene kiakulu, lu m'wila. ³⁶ Ha yi yambudi ku hoya ndinga, Yezu sele yandi bu hika. Ba longoki ba yambudi ku hoya, phe ba samuniku mutu, mu tangu diadina, ha nkatu kima mu mambu ma ba mwene. ³⁷ Ku nkiel-andi, ha ba kulumuki ku mongo, kibuka kiingi kisa ku ntwala Yezu. ³⁸ Phe tala ha kati dikibuka mutu mosi wu kala ya mukaka: N'longi, yeka ku lomba ndolula, n'tala mwana mene wu yakala, mu diambu ka ngiene yandi bu hika. ³⁹ Pheve mosi yi n'kotidi, phe mbala mosi yandi ku yamuka; mana phe pheve yene yi yandiki ku n'tukikisa ye ngolo zaakulu; phe ye ku n'yangisaka, ye bulu bwakulu mu ku songa na ka katuka belebele ye Yezu, ku nima di ku n'zebisa. ⁴⁰ Taata hoyi: Yi ba lendikiki ba longoki baku mukusia na bakula pheve yaï, mana ba kukiiku. ⁴¹ Kibuka ki batu ba konda ku ndima phe ba balula zi mbundu, ba kabusidi Yezu, ti kuna nki ntangu yi banda kala ye beno, phe yi banda lu sadisa? Za 'nata mwana-ku. ⁴² Samu ka kala phusanaka, pheve zi mbi zi n'losi mu mafu mwana, phe zi yandiki ku n'tungisa mwana. Mana Yezu zi nganini pheve zene, phe n'hulusi mwana, ku nima n'kabusi kwe tata-andi. ⁴³ Phe bakulu ba bangi 'nene Nzambi. Mudiambu konso mutu ka kala mu ku yituka phe mu kiesi ki mambu ma ka sadi Yezu, ka hoyaka kwe ba longoki bandi: ⁴⁴ Samu di beno, luwa mboti mambu mama: Mwana mutu ba fweti n'kaba ha moko ma batu. ⁴⁵ Mana ba longoki ba kala zayaku di hoya dina; dikala di ku sweka samu di bawu, mu ku songa na ba yabiku nkadilu; phe ba kaloko ye boma muku n'hiula samu di diambu diana. ⁴⁶ Mu ku tala, ngindu mosi yi ba yisidi baakulu ku mbundu, ba zodi ba yaba nki mutu mutu mu kati di bawu wu kala mbuta. ⁴⁷ Yezu, mu ku tala di banza di bawu, mongi mwana mosi wu nkeke, n'sidi belebele ye yandi, phe ka ba kambaka: Konso mutu n'yamba mwana wandu mu zina di mene, ngiembe mene; ⁴⁸ phe konso mutu ngiamba mene, ka yembe tata wuna wu ntuma mene. Mu diambu wu wene wu nkatika nkeke mu kati di beno kulu, ye yandi wene mbuta. ⁴⁹ Yowani mongi ndinga, phe ka hoyaka: n'longi, ntu mwene mutu mosi weka kwe kudi pheve zi mbi mu zina di ngeyi; phe ntu m'busidiki ka yambula, samu keko ye beto. ⁵⁰ Lu m'busidiku, ba kabusidi Yezu; mu diambu wuna konda lu telemina kene samu di beno. ⁵¹ Di phusani tangu di ka fweti katuka ha n'toto, Yezu mongi ki kese ki kwenda ku hata di Yeluzalemi. ⁵² Hitiki ha twala yandi ba mwangi tsangu, ba yele phe ba koti mu mwa hata di batu ba samadiya, mu ku songa na ba n'yidikila kizika. ⁵³ Mana ba n'yembeko ha ka tudi, mu diambu ka kala kwendaka ku Yeluzalemi. ⁵⁴ Ba longoki, Zaaki ye Yowana, ha ba mwene bwabuna, ba hoyaka: Pfumu, zodi ntu hana n'swa mu ku sia na mbawu yi ku zilu yi kulumuka phe yi ba zinisa bakulu? ⁵⁵ Yezu baluki kwe bawu, phe ba nganini, ye ku hoyaka: Lweka yabako nki pheve lwene yawu. ⁵⁶ Mu diambu mwana mutu kisi, keeko samu di ku ladisa mioyi mi batu, mana samu di ku ba hulusa. Phe ba yele mu hata di hika. ⁵⁷ Mu ntangu ba kala mu nzila, mutu mosi ka n'samunaka: Pfumu, yi ku landa mwakulu mu kwenda. ⁵⁸ Yezu n'kabusidi mvutu: Ma bata mene ye ki hanga, phe ba nuni ba ku zilu bene ye ma zamba: Mana mwana mutu keko ye ki zika ki ka fweti phemisina n'twa. ⁵⁹ Ka hoyaka kwe wu hika: Landa mene. Phe ka kabusi mvutu: Pfumu, pheka n'swa yenda ye n'zika tata mene. ⁶⁰ Mana Yezu ka n'kambaka: Yambula ba fwa ba ziika zi mvumbi zi bawu; ngeyi, ndanda wenda we mwanga tsangu zi ki pfumu ki Nzambi. ⁶¹ Wu hika ka hoyaka: Yiku landa, pfumu, mana pheka n'swa yenda ye lenga ye batu ba ku nzo mene. ⁶² Yezu n'kabusidi mvutu:Konsomutu sia koko mu ki phundudilu mafu, mana ka kabula meso ku ma nima, keko mutu wu tadidi ki pfumu ki Nzambi.