1 Kilumbu kintete ki phosa, ba kheto beele ku maziamu ye kibungi-kibungi, ye mafuta ma tsudi ba yidiki. 2 Ba mwene tadi ba dindumuniki dio ku thwala maziamu. 3 Ha ba koti, ba mweneko luutu lu Pfumu Yezu. 4 Bakheto batsutsumuki, bamwene bayakala boola batelemiiki mu khala mwelo ye milele mi pha. 5 Samu bakheto booma bukala bu bakweteke, bahene mboti yi kukunda kilunzi mu mafu, bahiudi: "khi kikuma lu kwee dingidi mutu wene mu luzingu ha kati di bafwa"? 6 Kee mwoko dihika, futumukii, lu yibuka bwe ka lukamba, thangu lukala ku Galileya, 7 ka hoyaka: "Mwana mutu ba n'kaba ku moko ma batsumuki, ba n'koma ha kulunzi, mu kilumbu kitatu ka futumuka". 8 Banketo ba yibuki bwo, bakabuki. 9 Beele, bahoyi tsangu zaazizi kwe bathumwa kumi ye mosi ye kwe bana bahika. 10 Bakheto ba bahoyi bwo hakala: Madiya mangandala, Zani, Madiya ngudi Izaki ye bakheto bahika ba bakala bawu. 11 Bathumu ha bawidi tsangu zeene bamongi zô yaaba ne zi butufi phe ba kwikiloko ma bahoya bakheto. 12 Piele telemi phe leki thinu ku maziamu, fokami phe tadi, mwene yandiene milele mi matekita, Piele kabuki ku nzo'andi, muna kwee dihiudi mambu ma mahioki. 13 Mu kilumbu kiene, boola ha kati di bawu beele ku hata di Emawusu, di diene mu kiteso ki makumi sambanu ki kitamina ki mavula ma Yeluzalemi. 14 Beeka kwe hoyasani bawu ye bawu mambu ma mahioki. 15 Mu thangu yi ba dindamiki phe ba dihiudiki, Yezu yandiene wisa monika phe beele bawu nzila mosi. 16 Mana meso ma bawu makasami beeka kwe n'yabiku. 17 Yezu bahiudi: "Khi mambu ma lukwe hoyi beno boola hana lukotikidii kwenda?" Bahweni ye kiadi. 18 Mosi hakati di bawu, zina diandi Keleyopasi, kabusi mvutu: "Yandi ngeyi n'kutu mukati di mbanza Yeluzalemi weka yaboko mambu ma meeka hoyama bilumbu biabibi?" 19 "Khi mambu?" Ka bahiulaka Yezu. Ban'kabusidi: "Mambu ma Yezu musi hata di Nazaleti", wuna wukala mbikudi mu bisalu ye mu kuhoya ku meso ma Nzambi ye makanda maakulu, 20 ye khi phila ba mbuta ba Nganga Nzambi ye ba pfumu beeto ba luyalu, ba n'teki mu ku n'zengila n'kanu lufwa phe ba n'koma ha kulunzi. 21 Ntwekasia mbundu ne bukala yandi fweti hulusa Izalayele. Eh! Ntwekene kilumbu kitatu tuuka ma hioki mambu mâ. 22 Bakheto ba mosi hakati di beeto, bathu yitukisi, beele ku maziamu ye kibungi-kibungi. 23 Ha bamweneko mvumbi, bisa hoya ne ba wanzio ba balubukidiiki phe ba basamuni ne Yezu kene mu luzingu. 24 Bahika thu kele bawu beele ku maziamu, ba mwene mambu bwoso bahoyiba kheto. Mana ba m'mweneko dihika." 25 Mana Yezu ka bakambaka: "Oh! Batu bakonda ngangu, phe mbundu zi bawu zene zi malembi mu kukwikila mambu ma bahoya ba mbikudi! 26 Bufweneko Kidisito ka mona phasi kikuma ki mambu maama phe kakota mu n'khembo'andi?" 27 Yandika Moyize ye kuna ba mbikudi baakulu, batendudidi masonama ma santu maakulu mana ma batadidi. 28 Ha balubuki ku fula di hata, ba hunikisi yabaa ne ka kwenda ku ma hata ma kiana. 29 Ba lundikisi phe ba n'kambi: "Thu nimba tangu di hioki,kuma kuyidi." Ba nimbi bawu. 30 Ha bakoti ha meesa ye bawu, mongi dipha phe hene matondo, bukuni dio phe ba hele. 31 Hakana meso ma bawu makanguki phe ba n'yebe na Yezu wandu, mana muna thangu yene ladi. 32 Bahiulasani: "Bwe zi kondi thu budila zimbundu ha kakele kwe thu hoyisi mu nzila ye kwe thu tendudidi masonama. 33 Muna thangu yayina buna basikami, bakabuki ku Yeluzalemi, ba bamwene bâ kumi ye mosi, ye ba hika ba basambidi bawu, 34 bakambi: "Pfumu futumikii mu masonga phe ka n'lubukidi Simoni. 35 " Bateele phandi mambu mana mabwidiki mu nzila, ye bwe Yezu kabayubudi kimutu ki'andi ha ka bukuni dipha. 36 Ha bahoyi mambu meene, yandiene Yezu ba lubukidi hakati phe hoyi: "Ngemba yi kala ye beno! " 37 Ba baasa ye booma, yaaba ne bamwene tebu(m'fu). 38 Yezu ba kambi: "khi lu phulukidi mbundu, ye khi lweka di hiudila mu tsi zimbundu zeeno? 39 Lutala moko ye malu maama, mene wandu mu masonga. lutsimba ye luthala. Pheve yi kalaaku kete kikudi, lumbona bwoso yene." 40 Buna kahoyi bwabuna, ba songidi moko ye bitambi bi'andi. 41 Thangu yi bakala dihika batu ba konda lu kwikilu ye kiesi bayituki, yezu bakambi: "Lwene ye kiima ki kudiaa?" 42 balubudi mbisi mamba yi kufuta. 43 Yezu mongi yô, diidi ha meso ma bawu. 44 Ka bakambaka: "Khiakina yi lukambidi, thangu thu kala yeeno, yi lukamba ne maakulu ma basonika samu di mene mu n'kanda Moyize, ba mbikudi ye mu mikunga mi Dawidi ma fweti lungisama." 45 Bakangudi ki m'pheve mukusonga bayaaba masonama ma santu. 46 Bakambi: "khiakina busonama ne kidisitu ka fweti mona phasi, phe kafutumuka ku bafwa mu bilumbu bitatu. 47 Kubalula mbundu ye ndolula yi masumu ba longa yo mu zina di yandi mu zitsi zaakulu, yandika ku Yeluzalemi. 48 Lwene ba mbangi ba bima biabi. 49 Tala, yi hitika ha thandu beno bima bina kaluhele kilasi tata'ma. Mana beno, luzakala kuna mbanza tiii ye kuna luyamba pheve yituuka ku zilu." 50 Yezu ba neete ye kuna Betani. buna ba thuti moko, basambudi. 51 Ka mongi buna kabasakumuni, basisi phe tombuki ku Zilu. 52 Buna bamanisi ku fukama, bakabuki ku Yeluzalemi ye kiesi kiingi. 53 Bazakadi kaka muna kati di nzo bisambu, ye kuyimbilaka mikunga mi n'kembo ye mi kusakumuna Nzambi.