¹ Muntangu yina, ha lubuka n'siku wu Sezadi ogisti, yene n'swa wu ku kangala nzo ye nzo mu n'toto wakulu. ² Ku kangala kuna ku ntete ku salami tangu kidiniusi kakala pfumu ki ziunga ki sidi(sirie). ³ Baakulu ba yenda di sonikisaka, konso mutu mu mavula maandi ⁴ Yozefu phe ka tombuki ku hata di Galileya, di mavulu ma nazaleti,mukusonga ne kenda mu hata di Yude, mukati di mavulu ma Dawidi, di ba telaka Beteleyemi, mudiambu kakala mutu nzo phe ki kanda ki Dawidi, ⁵ mu kusonga kee disonikisa ye Madiya, n'nketwa'ndi, wu-u kala ku zimi. ⁶ Mu tangu bakala hakana, Madiya tangu di kubuta di wene, ⁷ phe kabuti mwan'andi wu ntete wu yakala. ka'mvungi mu milele, phe wen'sia ha kidilu ki mameme, mudiambu bakaloko ye mpalasi mu nzo ba nzenza. ⁸ Ku kala, mu nziunga yayina kaka, ba hungudi mameme ba yenda hioki mu masola muna phipa yayina kaka mu diambu ba batila mameme ma bawu. ⁹ Phe tala, wanzio wu pfumu ba lubukidi, ye nkembo nzambi yi ba ziungi. ba widi booma bakulu. ¹⁰ Mani wanzio ka ba samunaka: Lu bangiku, mu diambu ye ka lu samuna n'samu mu bunkete, wu-u kala samu di n'kangu wakulu n'kenda wu kiesi: ¹¹ Kiene kilumbu ki lelo, mu mavulu ma Dawidi, mu lu butukidi ngulusi, wu wene klisto beno kulu, pfumu. ¹² Phe lu tala ku nki kidimbu lu n'yabila: Lu kwe wana mwana mosi ba m'phiti mu milele ye niimbi mu kididi ki mameme. ¹³ Ye mbala mosi kibuka ki ba phumbulu ba nzambi ba yikami kwe wanzio, ye ku kabula lukumu kwe nzambi ye ku hoyaka: ¹⁴ Nkembo kwe nzambi mu bi zika bi hioka zilu, ye ngemba ha n'toto kwe baatu ba bunkete ba ka sepidi bawu! ¹⁵ Muntangu ba basisi wanzio mu ku kabuka ku zilu, ba hungudi(ba kengididi) mameme ba yandiki ku hoya bawu ye bawu: Ntwenda tiye kuna hata di beteleyemi, phe ntu tala mambu mana ma bwidi, ma ka ntu songidi pfumu. ¹⁶ Benda ye nswalu zingi, phe ba wene Madiya ye Yozefu, phe ye mwana nkeke nimbiki ha kididi ki mameme. ¹⁷ Ku nima di ku m'mona, ba kutani ye ki dimbu ki ka basamuni wanzio mu diambu di mwana wanduna. ¹⁸ Baatu bakulu ba bawidi ba yandiki ku yituka mu mambu ba kala ba kambaka kwe ba hungudi mameme. ¹⁹ Madiya sweki mambu mana maakulu, phe ka ma hiokisidi ku mbundu'andi. ²⁰ phe ba hungudi mameme ba kabuki, ye kwe n'kembidi Nzambi phe ku hekaka lukumu Nzambi mu makulu ma ba wiidi ye ba mwene, phe makala kitesu ki mosi ye mambu kaba kambi wanzio. ²¹ Ki lumbu ki nana, ki bafweti n'yotusa mwana, ki mongi ki kumi, ba n'hele zina di Yezu, zina di ka songila wanzio kuntwala ka butuka mu kifundu ki ngudiandi. ²² Ye, ntangu bi wene bilumbu bi pfunguna yi masumu, phila n'tsiku Moyize, Yozefu ye Madiya ba n'neete ku Yeluzalemi, mu ku songa na ka n'tambika kwe pfumu,- ²³ Mukwe landi mana masonama mu n'kanda mitsiku mi Pfumu : Konso mwana ntete wu yakala ba fweti n'tambika kwe Pfumu,- ²⁴ Phe samu di kwe hana mu ki tambiku ba nuni bola ba fwaana ma yembi holowu matuku ma mayembi mola, phila ba sonika mu n'kanda mitsiku mi Pfumu. ²⁵ Phe tala, ku Yeluzalemi ku kala ye mutu mosi mu zina di Simoni. Mutu wuna kakala ye masoonga phe kakala wu kwikama mu ndinga Nzambi, kakala hingila mutu fweti katula izalayelemu ki phika, ye pheve san'tu yi kala mukati di yandi. ²⁶ Pheve san'tu yi n'samuni mu phila yi pheve Nzambi kafwoko kuntwala ka konda m'mona Klistu wu Pfumu ²⁷ Wisi ku te'mpelo, pheve Nzambi yi n'nete. ye bwoso bibuti bi'andi ba yenda n'kati mwana Yezu mukusonga ba lungisa mana ma tadidi yandi mu mitsiku. ²⁸ Ka m'mongi ha moko ma yandi ye n'sakumuni Nzambi, phe kahoyaka: ²⁹ Mu ntangu yayi, Pfumu, n'yambula n'tsadi ngeyi kenda kwaandi ye ngembe, mû phila ndinga ku. ³⁰ Mu ku tala meso ma mene ma mwene luhulusu lu ngeyi, ³¹ Luhulusu lu wu yidika ku ntwala n'kangu wakulu. ³² Mwinda mu ku ngengisa, n'kangu wu kondi ku zaya ngeyi, phe n'kembo yi izalayele, n'kangu ngeyi. ³³ Tat'andi ye ngudiandi ba kala mu kwe sepidi mambu ma ba hoyiki samu di yandi. ³⁴ Simoni ba sakumuni phe ka hoyaka kwe ngudiandi, Madiya: Tala, mwana wandu kene ye ki sina ki ku nata ku bwa ye ku telama ku batu biingi mu hata di izalayele, pe ka kuma ki dimbu ki fweti hana mvwalangana, ³⁵ phe kwe ngeyene mbeele meno mola yi tubula moya ngeyi , mukusia na wayindu ma batu biingi ma sengu muka. ³⁶ Hakala phe ye n'bikudi(polofeti) mosi wu n'keto, Ana, mwana Faniedi, wu ki kanda ki Azadi. Kakala mbuta bwingi mu zi mvula, phe ka zingi mvula tsambwadi ye yakala diandi tuka ka kala ka kutanieko ye yakala(vidizinite). ³⁷ Kasele m'fwidi, phe ye zi mvula makuumi nana ye ya, ka katukiku te'mpelo, phe ka sadidiki Nzambi phipa ye mwini mu bisambu ye mu ba kalemi(kubusa kudia kikuma ki bisambu). ³⁸ Wisi bawana, yandi phe, mu ntangu yayina kaka, ka kala mu ku kumisa Nzambi, phe ka hoyidi Yezu kwe batu bakulu ba bakala muku hingila ku kangulama ku Yeluzalemi ³⁹ Mu ntangu yi ba manisi ku kumisa makulu masonama mu mitsiku mi Pfumu, Yozefu ye Madiya ba kabuki mu Galileya, ku na Nazaleti, mavula ma bawu. ⁴⁰ Mu ku tala mwana kakala vulaka phe ka kumiki ye ngolo. Ngangu zi n'hatikidiki, phe dienga di Nzambi di kala ye yandi. ⁴¹ Bi buti bi Yezu bi yeleke konso mvula ku Yeluzalemi, ku feti di mapha(paaki). ⁴² Mu ntangu ka kumi ye mvula kumi ye zola, Be'nda, phila dilombidi kutimi di feti. ⁴³ Diaka, ha bi hwidi bi lumbu, phe ba kabuki, Yezu ka sele ku Yeluzalemi. Tat'andi ye ngudiandi ba ye boko na ka sele. ⁴⁴ Mu zi ngindu zi bawu ba yebe na bakala ye Yezu, ba kangadi ki lumbu ki mosi mu nzila, phe ba n'dingi kwe bibuti bi bawu ye kwe batu ba ku yabana. ⁴⁵ Mana, mu ku konda ku m'mona, ba kabuki ku Yeluzalemi samu di kwe n'dinga. ⁴⁶ Ku tsuka bilumbu bitatu, ba m'mwene mu tempelo, zakadiki hakati diba nganga Nzambi ba mbuta(dokitele), keka bawa phe keka ba hika zi ngiufu. ⁴⁷ Bakulu ba bakala n'waka ba yandiki ku yituka mayele ye phila ku kabukila zi mvutu. ⁴⁸ Ntangu bi m'mwene bibuti bi'andi, ba yandiki ku yituka, phe ngudiandi kan'kambaka : Mwana mene, nki ki kuma sadi buna ku ntwala beeto? Tala tat'aku ye mene ntu kwe ku diingi ye kiadi. ⁴⁹ Ka ba kambaka: Nki ki kuma lu kwe ndingidi? Lu yebeko na yi fweti ku di hana mu bisalu bi tata mene? ⁵⁰ Mana ba zeyoko mambu ma ka ba keembe. ⁵¹ Mana ka kulumuki ye bawu Mukusia Benda ku Nazaleti, phe ka ba lemvukidiki. Ngudiandi kabatidiki bima bina biakulu kumbund'andi. ⁵² Phe Yezu ka vudiki mu ngangu, mu ku leya, phe mu dienga, ku ntwala Nzambi ye kuntwala baatu.