¹ Yezu kakala kotiiki mu Yediko ye ka katisiiki mavula. ² Mukutala, mutu mvwama ban'tediki Zashie, pfumu wu batu ba bamongaka ziphaku, ³ kasosi ka mona ne kakala Yezu, mana kakala kukaaku kikuma ki kibuka ki batu, samu kakala ye n'tele wu kakhufi. ⁴ Vuudi thini ku thwala ye meete mu n'ti mosi wu Sikomodi samu kamona Yezu, mu diambu kafweti hiokila mwamuna. ⁵ Muthangu yi kakumi Yezu hakana, thuti meso, [m'mwene] phe kan'kambaka: «Zashie, sasuka wu tuluka, samu yi fweti phemina ku nzo ngeyi lelo.» ⁶ Zashie tuluki ye tswalu phe n'yembe ye kiesi. ⁷ Mukumona bwabuna, baakulu bayenda wuni-wuni mu kuyaaka ne: «wezakala kwe mutu masumu.» ⁸ Mana Zashie telemi ku thwala Pfumu, kan'kambaka: «Pfumu, yi hana kwe baphutu kati-kati di kimvwama ki mene phe, ne yisala mutu dimbi, yi m'futaaka pfokula yâ.» ⁹ Mana Yezu kahoyaka mu mahoya ma Zashie:«Mamboti makoti lelo mu nzo yayi, samu yandi phe kene mwana Abalayami. ¹⁰ Mukutala, mwana mutu kisi kandinga phe ye kahulusa kina kikala kilala.» ¹¹ Samu kibuka ki widi mambu mana, Yezu yiki kingana. Mukutala, kakala bele-bele ye Yeluzalemi phe ba kwikidi ne kipfumu ki Nzambi ki kha di monisa mbala mosi. ¹² Kahoyaaka mana:« Mwana yakala mosi wu mbutuka yi mbuta kayele mu tsi mosi yikiana samu ben'kumisa thotilaye kunima kisa kabuka. ¹³ Tedi batsadi ba yandi kuumi hakati di baakulu, saabasidila mawolo phe ka basamunaaka: «Lusasala mabuta bwingi tiye kuna yikwisila.'' ¹⁴ Muthangu yayina, batu ba mavula ma yandi ban'zodiku phe ba hitiki batu kunima di yandi samu di kuhoya: 'thu zodiku ne mutu wandu kamonga lukumu kwe beto'. ¹⁵ Muthangu yi kisa kabuka kunima di kun'soola thotila, kabatedisi batsadi ba yandi ba ka hele mbongo mukusonga kazaya kon'so mutu khi n'lutu ka sayika hathaandu. ¹⁶ Wu thete lubuki phe kahoyaka: «Pfumu, wôlo di ngeyi di buti mawôlo kûmi. ¹⁷ Kan'samunaaka: Bwene bu mboti, n'tsadi wu mboti. Samu kele wu kwikama mumwa kima kikheke, yamba kipfumu ki ku twadisa mavulu kûmi. ¹⁸ Wu zôle wisi phe kahoyaka: 'Pfumu, wôlo di ngeyi di buti mawôlo matanu'. ¹⁹ Kan'samunaaka: 'Ngeyi diaka, yikusiidi n'twadisi wu mavulu matanu.' ²⁰ Wu hika wisi ye kahoyaka: 'Pfumu, tala wôlo diaku di yi sweka hakati di kitendi kin'lele. ²¹ samu wene mutu wu khabu; mongaka kina kôndi tulula phe katulaka kina kôndi kuna.' ²² Kan'samunaaka: Yi kusambisa mu mahoya maaku, n'tsadi wu mbi; wu zeye ne yene mutu wu sala ye khabu ye masonga, ne yi mongaaka kina tsidiiku phe yi katulaaka kina khôndi kuna. ²³ samu di khi bwawu wu kôndi sia mbongo zi mene ku keesitûnga, mukusia ne mu ku kabuka ku mene yi zi mônga ye n'lutu mosi? ²⁴ Phe kahoyaka diaka kwe ba bakala hakana: Lu n'katula wolo dina phe lu heka wu wee mawu kûmi.' ²⁵ Ba n'samunaka: Pfumu, kene kuthwala ye mawôlo kûmi.' ²⁶ 'Yeka lusamuna, kabusi mvutu, ba hàna kwe mutu wuna wene ye kiima, mana kwe wuna kondi kima ba hotumuna ata ki kee kiawu. ²⁷ Ne kwe ba mbeni ba mene ba bakondi zola ne mene yi monga lukumu kwe bawu, lu ba nata hàka phe lu ba honda ha meso ma mene.'» ²⁸ Ku nima di ku hoya bwabuna, Yezu hioki ha thwala kibuka samu di ku tômbuka ku Yeluzalemi. ²⁹ Muthangu kaphusani ye Betefazi ye Betani, mu ndambu yi mongo wu batelaka mongo wu ba Odiviewu, Yezu tumi bôle mu ba longoki ba yandi ³⁰ yekubakambaka: «Lwenda ku hata di diene ha sambu. Muthangu yi lukota, luwana mwana phunda mosi ha thandu yandi ba konda mata kete kwe mutu. ³¹ Na mutu ka lu: 'Samu di khi lweka n'katula?' Lu [n'kabusila] mvutu: 'Pfumu ke yandi m'pfunu.'» ³² Baatu ba katumi beenda phe ba wene maakulu bwoso kabasamuni Yezu. ³³ Samu bakala katulaaka mwana phunda, ba kengididi ba bawu ba bakambi: «Samu di khi lweka katula mwana phunda?» ³⁴ Bakabusidi mvutu: «Pfumu ke yandi m'pfunu » ³⁵ phe ba nete mwana phunda kwe Yezu. kunima di ku losa kazaki bawu ha thandu kunda di mwana phunda, ban'matisi Yezu. ³⁶ Mu kitesu ki kaphusaniiki, baatu ba yenda yadi milele mi bawu mu nzila. ³⁷ Baphusaniiki mbala mosi ye Yeluzalemi, mukhulumuka yi mongo wu ba Odiviewu. Muthangu yayina kibuka kiakulu ki ba longoki ki bèse ye kièsi, ba yandiki ku yimbila ye ndinga ngolo mikunga mi lukumu kwe Nzambi samu di bipha biakulu bi ba mwene. ³⁸ Bayenda hoyii: «Ka phambulama thotila wu weka kwisa mu zina di pfumu!» Ngemba ku zulu ye n'kembo mu bi zika bi hioki zulu!» ³⁹ Hakati di kibuka, ba Fadizie bahika bahoyiki kwe Yezu: «N'longi, banganina balongoki ba ngeyi ba yambula makhelele.» ⁴⁰ Kabusi mvutu: «Yeka lusamuna, ne bawu badibatika, Yi telamisa matadi ma ngimbidila!» ⁴¹ Muthangu yi kakumi bele-bele ye mavulu phe ka mwene, Yezu didi samu di mavulu phe kahoyaka: ⁴² «Nawuyabani ngeyi phe, lelo, kina ki fwene ki kuheka ngemba! Mana buthwene, kiene ki kusweka ku meso mangeyi. ⁴³ Bilumbu bikwisa mudiambu di ngeyi bina bakusia ha kati ba mbeni ba ngeyi ye bisalu bi ngolo-ngolo, bakusia ha kati phe bakukàshila zi ndambu zaakulu. ⁴⁴ Bakubebisa, ngeyi ye baana ba ngeyi hakati di ngeyi, phe basisoko tadi ha thandu tadi samu yubukiku thangu yibayisi kutala.» ⁴⁵ Yezu koti mu tem'pelo phe yandiki kwe kudi batèki. ⁴⁶ Kaba kambaka: «Masonama: Tem'pelo di mene dikala nzo bisambu, mana beno, lukumisi yo nzo biifi.» ⁴⁷ Ka longiiki bilumbu biakulu mu tem'pelo. Ba pfumu ba banganga nzambi, ba batanga bwingi mitsiku ye ba pfumu ba n'kangu ba dingiki ban'honda; ⁴⁸ mana bakala yabaaku khi phila ba fwene yandika, samu n'kangu waakulu kan'wididiki, wudihene mu mahoya ma bibebo bi yandi.