¹ Ne kwe beno, lukala ba fwa ki kuma ki bifu bieno ye masumu meeno, ² ma lu sadiiki mbala kaka mu kutala phila yi nzingidi yi n'toto wandu, mu kutala kwe pfumu wu ngolo zi m'phebe, wu pheve yi yene buntwene bwabu mu bisalu mukati di ba phumbulu ba mbi. ³ Betokulu phe, ntu kala mu kati ye bawu: Kudinatisa ku beto ku kala kwendila mu m'pfunu wu phila yi nkadilu yeeto, samu ntu lungisiki ba luzola lu nkadilu baatu ye lu zingindu zeeto, phe ntu kala, mu nkadilu yeeto phe, ba ku yidika ku nkabu, neti bana ba hika. ⁴ Mana Nzambi kene mvwama mu kiadi. Ki kuma ki zola diingi di ka ntu zodi, ⁵ beto ba ntu kala ba fwa ki kuma ki bifu bi beeto, ka ntu kabusi mu luzingu ye kidisitu_ samu di dienga lwene ba huluka_, ⁶ ka ntu futumuni phe ka ntu zakadisi ye yandi mu bi zika bi mazulu, mukati di Yezu Kidisitu. ⁷ Ka sadi buna mukusia ka songila mu zi ntangu zi zikwisa kimvwama ki dienga di yandi ki konda tsuka mu bunkete bu kasongidi mwe beto mukati di Yezu Kidisitu. ⁸ Mukutala, samu di dienga lu hulusami, mu nzila lu kwikilu. Ye lu huluku lwa luna lutuki kwe beno, diene di kabu di Nzambi. ⁹ Keko mu bisalu, mu ku sia ne ha nkatu mutu kadi tsikisa. ¹⁰ Mu masonga, kene yandi wu ntu sadi; ba ntu hangi mu kati di Yezu-Kidisitu samu di bisalu bibu nkete bi ka yidiki Nzambi ku ntwala mukusia ne ntu bisadila. ¹¹ Nkiakina, lu yubuka ne mbala kaka ba kala lu zayaka neti keko ba Zwifi mu kati di lutu lu beno, ba lu tediki ba konda yotusa kwe ba bene ba ku yotusa ye bene ba ku yotusa mu lutu lu bawu, ba basadi ku kikanzu ki mutu. ¹² Lu yubuka ne mu ntangu yayina lukala ba konda Masiya, ba lu katula mu n'swa wu mavulu mu kati di Izalayele, ba nzenze mu zi mvukani zi kilasi, ba konda kiitu ye ba konda Nzambi mu tsi n'toto. ¹³ Mana bu ntwene, mwe Yezu-Kidisitu, beno ba lukala kiana mbala kaka, lukumi bele-bele mu menga ma Kidisitu. ¹⁴ Mu kutala, kene ngemba yi beto, yandi wu sadi mu bibuka biola kikuma ki mosi phe wu bwisi kibaka kina ki bakabisiiki, kiphala. ¹⁵ Mu lufwa lu yandi, ka kumisi wu konda ngolo n'tsiku ye kulombama ti ye zi mbandu, samu di ku hanga mwe yandienene mutu mosi wu pha ha kati di bôla, ye kusiaka phe ngemba. ¹⁶ Ka zodiki ka ba kabula mu kimvuka wuna ye n'kweno ye Nzambi mu ku ba bundikisaka mu lutu lu mosi mu nzila yi kulunzi, mu kubebisaka ha kulunzi nkeni. ¹⁷ Kisiiki ka hana n'samu ngemba kwe beno ba lu kala kiana ye kwe bana bakala bele-bele. ¹⁸ Munzila yandi, mukutala, ntwene ba mosi ye ba kweno n'swa wu ku kota kwe tata mu nzila pheve mosi kaka. ¹⁹ Nkiakina phe, lweko diaka ba nzenze holowu bazingi ba ntangu yi nkeke; lwene mu mbalula batu ba mavula ma ba san'tu, ba mosi mu kikanda ki Nzambi. ²⁰ Lu tungami ha ntandu ku simbisama ku ba ntumwa ye ba mbikudi, Yezu-Kidisitu yandienene mu ku kalaka ditadi di kutungila di ba sia ha kati di bibaka. ²¹ Mwe yandi kwene kusimbama kwakulu, ku kuyidika bu nkete, kweka tombuka samu di kukala Tem'pelo di san'tu mu kati di Pfumu. ²² Mwe yandi beno phe, lu simbami ye bawu samu di ku sala kizakadilu ki Nzambi mu pheve.