¹ Eme pholo, nga phoneye ha gu khala thumwa, ishi go athu a ngu phonele, uvi idi mu njila ya Yesu Kilistu, nu mu njila ya Nzambi Tata yonu wa mu zugishile gu lufwa. ² Neme nu aphangi wanyi ngudi nawo haha, ta mi tumila mbote, nu enwe athu a gu gimvuga gia gu dimbo dia Galatiya ta mi sonegela egi; ³ Khenda nu ngemba jia Tata Nzambi Sha Fumu wetu Yesu Kilisto ji khale nenu, ⁴ yonu wa di hanele ha khenji mukunda nu masumu etu, mukunda nu gu tu katula mu gubola mu luzolo lwa Tata Nzambi. ⁵ Gwa mwene gu khale nu khembo ya mvula nu mvula. ⁶ Ngu mu di hula mu phila mwa mu balumugila mu phushi phushi mwene wa mi tamegele mu khenda jia Kilisto. ⁷ Ishi mu tshigina gu leza go egi gudi nu malongi ako, uvi gudi nu athu a muza mu bata mavanga ha gu balumuna malongi a Kilisto. ⁸ Uvi ata eme nga wanjio mu moshi wa gosa wa mi longa malongi ako wanyi nga mi longele go, mwa bonga a shinjiye. ⁹ Mu phila ta mi longele ha thomo, ngu mu vutugila nji ha gu mi leza egi :" Gula muthu mu moshi weza mu mi longa malongi ako wanyi nga kondele gu mi longa mwa bonga a shinjiye." ¹⁰ Hene ngu mu kamba gu zula lukumu gwa athu nga gwa Nzambi? Gula ngu di mu hwa athu kiese, ngu shi nga musadi wa Kilisto go. ¹¹ Nga tshigina mu jiye a phangia'mi egi, sango yiyi ya bonga nga mi longele ishi mu katuga go gwa athu. ¹² Nga i zudile go gwa muthu, nga ndo nga longeye gwa muthu. Yesu Kilisto mwene hakhenji wa ngu jiyishile nayo. ¹³ Mwa vile lujingu lwami lwa kulu mu phila nga khalele mu kita ndaga jia bola, phila nga nga khalele mu monesa dibundu dia Nzambi phashi nu phila nga khalele mu di phanza. ¹⁴ Nga kudile mu ndaga jia bola ya gu balega a phangia'mi. Nga khalele mudi kumisa mu ndaga jia khalele mu talela shigo jia a shami. ¹⁵ Nzambi wa monele mwa bonga hene a ngu phonele katuga mu vumo dia ginami. Wa ngu tamegele mu khenda jenji ha gu monesa Munenji mu katshi diami, ¹⁶ mukunda ngu longe sango jia munenji gwa aphagano, hene nga lombele gami go mayele a muthu. ¹⁷ Nga kandugile ego gu Yelusalemi gwa athu wanyi a kitugile a thumwa gu thumwa diami, uvi nga yile gu dimbo dia enya gu arabia, gu nyima nga vutugile gu Damasi. ¹⁸ Gu nyima ya mvula jitatu, nga kandugile gu yelusalemi ha gu monana nu Cefase, nga begele nenji ilumbu kumi nu itano. ¹⁹ Uvi nga monele go ata a thumwa ako kaka Jake wa phangia Fumu. ²⁰ Ngu mu mi leza gu twama dia Nzambi egi gu ndaga jikima nga mi sonegele, ngu shi mu mba mambo go. ²¹ Gu nyima nga yile mu khanda ya membo a Siriya nu gu Silisia. ²² Gunu a kilisto a dibundu dia gu Yudeya a khalele gu ngu jiya mwa bonga go. ²³ A khalele kaka mu vwa egi: " Tala muthu yogu wa khalele mu monesa athu phashi mwene u mu longa lulu ngagi sango ya bonga yinyi a shiyile." ²⁴ Athu ene adi mu hwa Nzambi lukumu.