¹ Yeyi idi gimona meso gia Yesu Klisto giago giamuhuiye Nzambi ha gudijiga gudi asthitshi a mudimo wenji gundaga jiago jidi nayo guza luenyelu. Wayidijigile ha tumine muanjelo wzenji gua musthishi wa mudimo wenji Yone. ² Yene wazuelele githemua mukunda nu ndaga nga mbimbi ya Nzamni nugithemua gianewe mukunda nu Yesu-Klisto gu ima yagasue igamuenene. ³ Guzela gua muila gukhale gua yago udi mutanga nu dizui diakola nu yago udi muvua mbimbi jia ungambi wenji nu udi mutumaga gudi yago udi ya gusonega ndaga ya kumbi didi gale hehi. ⁴ Yone, gu Ekelezia sambadi ya gu Aziya: Ngasa imihuiwe nu guhuima gudi Yesu - Klisto, Yago udi, wa khalele nu mba uza nu gu khanda a nyuma sambadi yago idi gu gifue gia ufumu, ⁵ nu gua Yesu - Klisto, udi themua ya giamatshidia, udi somi ya afua nu Fumu ya mafumu a mu mavu. Gudi yago watuzumba nu yago watukatshile mu uhiga wa gubola guetu gu matshi enji, ⁶ ( watukatshitshile, dimbo dia ufumu wenji, Nzambi jia Nzambi mukunda nu Nzambi Tata); gudi muene gutumbuga nu jingolo jikhale mayilago mu ivo nu ivo. Idingenyi! ⁷ Tadienu, udi muza nu matuta,; meso agasue mba amumona, nu ene ago a mukutshele dionga nu iphuta yagasue ya mavu mba adisagesa mukunda nu muene! Ayi! Idingenyi! ⁸ << Ngudi gisendeselo nu gisugishilo (Alfa nu omega,), >> gifua mudi guzuela gua Nzambi Fumu, < udi , nu wakhalele, nu udi muza muenya ngolo jigasue.>> ⁹ Ame, Yone (phangienu nu yago udi nu kapha malamba, nenu ufumu (watha) nu gudindamana mu Yesu). nga khalele holu dia gisanga gidi mutamegewa egi Patimosi, mukunda nu mbimbi ya Nzambi nu mukunda nu githemua gia Yesu. ¹⁰ Ngakhalele, mu utuamezelo wa Nyuma mu lusugu lua Fumu. Ngavile gu ngima diami dijui dianema (dila sulu) gifua diago dia pungin (ngenze), ¹¹ diakhalele muzuela egi:<< Sonega mukanda umoshi, yagasue i udi mumona, utume gu Ekelejiya sambadi : gu Efezo, gu Simine, gu Peligani, Sadi, Filadelefia nu gu Lawodise.>> ¹² Nga balumugine ha gujiya mbimbi tshi ago idi nguwambela, nu ngabalumugine, nga muenene minda ya wolo sambadi. ¹³ Ha katshi na katshi dia minda, guakhalele nu muthu wadifuana nu mona muthu wasudiga lopho dimoshi dialeha nu gumalu, nu muya umoshi wa wolo wa gulanga ha thulo yenji. ¹⁴ Muto nu sanga dienji diakhalele dilaphe gifua phezo, nu meso enji akhalele gifua dimi dia tshuya. ¹⁵ Malu enji akhalele dila-dila, yago yakhalele ya gukondewa mu jigo dia tshuya nu dijui dienji diakhalele gifua lungu luakoma lua gubulumuga gua meya. ¹⁶ Wakhalele mukuata themua sambadi ha koko guenji gua madia (koko gua tata) nu mukano guenji muazogele phogo imoshi ya mazo khanda jiyadi, phala yenji ya khalele mu guhenya gifua kumbi mu guhenya guenji gua kola. ¹⁷ Ha ngamuenene, ngabuile gu malu enji gifua muthu ya gufua. Wanguhagele koko guenji gua madia nu wazuela egi: << Guvua woma ndo, ngudi gesendeselo nu gisugishilo, ¹⁸ ngundi nji yago udi nu monyo, nga khalele ya gufwa nu, tala ngudi nu monyo wa ivo nu ivo! Nu ngudi nu mvungula ya gufua nu ya galunga. ¹⁹ Sonega diago yago iwamonyi, yago idi nu yago mba iza. ²⁰ Mukunda nu ndaga jia gudisuega jia themua sambadi yago iwamonyi gu koko guami gua madia nu jia minda sambadi ya wolo: Themua sambadi jidi mudijiya Anjelo sambadi a Ekelezia sambadi, nu minda sambadi imudijiga Ekelezia sambadi.>>