¹ Hene anetu, suengulugienu mu Fumu. Ngushigo gudibemba ha gusonega ndaga jiene jingoshi jiene. Jidi nayo gumibemba ngenyi. ² Khadienu mulenga jimbua. Khadienu mulenga enya mudimo abola. Khadienu mutuna mukanda wabola. ³ Ndaga ya tudi mukanda. Esue tudi munemesa mu givule gia Nzambi. Esue tudi gudi tumbuisa mu Kilisto-Yesu, nu tushigo muhaga mutshima wetu gu muila. ⁴ Ame nji ngakhadi nayo guhaga mutshima gu muila. Gula muthu udi mutangiza egi udi nayo guhaga mutshima gu muila, ame nga balegesa. ⁵ Nga mbiwe mukanda mu lusugu lua nage, ngudi muenya Isalele, mu giphuta gia Benzema, Muhebelu wa enya Hebelu. Mu mukhuala ngudi, mufalase. ⁶ Nga sagesele Ekelezia nu gudihana. Nga khalele mushimanewa gutuama dia giamatshidia gia mukhuala. ⁷ Uvi ima inyi yagasue yakhalele gifua luta mukunda nu ame, nga italele gifua ima ya gituhu mukunda nu Kilistu. ⁸ Diago, ngudi mutala ima yagasue gifua ima ya gituhu, mukunda nu gubonga gua ujiyi wa Yesu-Kilisto Fumu yami. Mukunda nu muene ngatunyine ima yagasue. Ngudi gu itala gifua tuji, hagula egi nguhete Kilisto ⁹ nu ha guhetewa gudi muene. Ishigo nu giamatshidia giami ndo giago gidi muza gu mukhuala. Uvi nu giamatshidia gidi muzanguiwa mu gutshigina mu Kilisto, giamatshidia gidi muza gudi Nzambi, gia gujiga miji mu gutshigina. ¹⁰ Luenyelu ngatshigina gujiya Kilisto nu ngolo jia gufuzumuga guenji, nu gudibungisa gua malamba enji. Ngudi mutshigina ngudifezegese nu Kilisto mu gufua guenji mu luholo luko, ¹¹ hangima guheta mu gufuzumuga mukatshi dia athu agufua. ¹² Ishigo egi ngahetshi gale ima yene, khenji nguheta gale ndo mu usantu. Uvi ngudi muzangula jiphushi ha gukamba ha gu ikuata, ndaga ya ame nji nga kuatewe gudi Yesu-Kilisto. ¹³ Anetu, ngushigo mutangiza egi nga ikuatshi gale. Uvi ngudi mutshita ima gingoshi : gijimbila ndaga idi gu ngima nu gutala gu uma yago idi gutuama, ¹⁴ ngudi muya phushi gu ima ya funu, ha guzangula lufuto lua gutamega gujima gua Nzambi mu Kilisto-Yesu. ¹⁵ Ngenyi, esue agasue tudi makota' athu, tukhadienu nu matangi angoshi ene. Gula mu mahugo ako mudi nu matangi ako, Nzambi udi muhana mueji wenji hene. ¹⁶ Hene hagasue ha tuaheta, tukuataganenu guene. ¹⁷ Anetu, khadienu athu adi gungu tetesa. Tadienu gudi athu adi muwenda mu luholo lu tuamijijigile. ¹⁸ Avula mukatshi dienu adi muwenda gifua mbalagaji jia mutshi wa gudikikisawa Kilisto. Ago ngana nanga nu gumiwambela, nu ngana zuela nu masoji. ¹⁹ Gisugishilo giawo gidi gufua. Ndaga ya nzambi yawo udi vumo diawo, ana haga lutumbu luawo gu ima idi gu ahana musonyi. Adi mutangiza khuta gu ima ya ha mavu. ²⁰ Uvi esue tudi athu a mudilu, guago gu tudi munenga muhuluishi, Fumu Yesu-Kilisto. ²¹ Mba udi mubalumuna muila wetu wa musonyi ha gu ubuisa gifua muila wenji wa lutumbu, watshitshiwe mu ufumu wa ngolo jia gulenvula ima yagasue gudi muene.