¹ Ngudi mutangiza egi gudi nu malundu adi muza gudi Kilisto. Ngudi mutangiza egi ndaga ya gukolesa gudi muza mu guzumba guenji. Ngudi nji mutangiza egi gudi nu gudibungisa gua givule. Ngudi mutangiza luko egi khenda jidi guene. ² Tageneshenu gusuanguluga guami ha mudi nu matangi angoshi ene, nu guzumba gungoshi guene, ha gukhala ya gudibungisa mu givule nu ha guhata ndaga ingoshi yene. ³ Mutshitshigo nga ndaga ingoshi mu giphi nga mu matangi gituhu. Uvi thsithienu nu gudibulumuisa, zangudienu athu ako egi adi agumibalegela. ⁴ Mukhadigo mukamba gukuta guenu ndo, uvi kambienu gukuta gua athu ako. ⁵ Khadienu nu matangi angoshi ene ago akhalele nu Kilisto-Yesu. ⁶ Wakhalele yagutela nu Nzambi, uvi gatalelego gutela guenji nu Nzambi gifua gima giajiya muene gukuatagana nagio. ⁷ Uvi wadibulushile muene hakhenji. abua muenya mudimo gudiangela. Wabua muthu. ⁸ Wadibulumuisa nu watumaga unu gu gufua, nu gufua gua ha mutshi wa gudikikisa. ⁹ Hene nji Nzambi gamuthuphuile nu wamuhuile jina didi holu dia majina agasue. ¹⁰ Watshitshile ngenyi hagula egi mu jina dia Yesu, mabongo agasue afugame mu madilu, hashi ya mavu nu goshi ya mavu. ¹¹ Et makano agasue atshigine egi Yesu-Kilisto udi Fumu, lutumbu lua Nzambi tata. ¹² Hene anetu aguzumba, ndaga ya muana tumaga mahugo agasue, ishigo mukda ngudi hene, uvi haha idi ya gubalega gula ngushigo hene, landudienu nu gutshita mudimo mukunda nu guhuluga guenu nu woma nu gudigita. ¹³ Ndaga Nzambi udi muzola mukatshi dienu gutshigina nu gutshita mukunda gusuanguluga guenji. ¹⁴ Tshitshienu ndaga jiagasue gu kano tedie, gudisuga ndo nu guboguta ndo. ¹⁵ Tshitshienu ngenyi hagula mukhale athu ashigo nu ndaga ya guwambewa nu athu a giamatshidia, ana a Nzambi ashigo nu gifu. Tshitshienu ngenyi hagula mukhale mulema gifua mueji ha mavu, mukatshi dia gindongo egi gia bola. ¹⁶ Kuatshienu mangololo mbimbi ya monyo hagula egi muhete kumbi dia guditumbuisa mu lusugu lua Kilisto, na hene mba ngujiya egi ngazanguilego phushi nga gutshita mudimo wa gituhu. ¹⁷ Uvu nga tshima ngudi ya guhanewa gifua mulambu nu mukunda nu mudimo wa gutshigina guenu, ngudi nu gusuanguluga nu ngudi musuanguluga nu enue agasue. ¹⁸ Nu luholo lungoshi luene, suangulugienu nji nu suanguluguenu nu ame. ¹⁹ Uvi ngudi muhaga mutshima mu Fumu Yesu, ha gumitumina Timote hagula egi ngukhale ya gulunduluiwa ha ngudi mujiya ndaga jienu. ²⁰ Ngushigo nu muthu muko udi nu makalagelo enji, udi muhaga gikenene mukunda nu enue. ²¹ Ndaga ya adi mukamba mukuta wawo wagasue gukuta guawo uvi gua Yesu-Kilisto ndo. ²² Uvi enue mujiya ndando yenji, ndaga ya gifua udi mutshitshila shenji, ngenji udi mutshita nu ame mu lukuma luabonga. ²³ Ngudi mutangiza gumutuma ha ngajiya itshi adi muzuela mukunda nu ame. ²⁴ Uvi ngudi muhaga mutshima gudi Fumu egi ame hakhami mba ngushigo mushipha ha guza. ²⁵ Ngudi mumona egi idi ya bonga ha gumitumina Epafolodita. Udi phanji'ami et mukuetu mu ita, nu kongo dienu nu muenya mudimo mukunda nu ame. ²⁶ Ha muavile egi udi mukata, wakhalele diago nu gikenene giavula nu wakhalele mutshigina gukhala nu enue agasue. ²⁷ Wakhalele nu ukhashi wavula nu hehi nu gufua, uvi Nzambi wa mufuila jikhenda. Ishigo khuta khenda jienji ndo uvi nu ame nji hagula egi ngukhadigo mu lamba holu dia lamba. ²⁸ Nga bubula ha gumitumina nenji hagula egi mba mumumona luko, mukhale nu gusuanguluga guavula nu ame ngukhadigo luko nu gikenene giavula. ²⁹ Zangudienu muabonga Epafoladita mu Fumu nu gusuanguluga guavula. Hanenu ginemua gudi athu gifua muene. ³⁰ Ndaga yakhalele mukunda nu mudimo wa Kilisto gakhalele nayo gufua. Wakhadi nayo gufua mukunda nu gungutshitshila nu gutshita yago muakhalelego nayo gutshita mukunda nu ame.