¹ Phaula nu Timoté, enya mudimo wa Yesu-Kilisto, gudi athu agasue ahagewe mu lukalo mu Kilisto, ago adi gu Filipo, gudi atuameji a Ekelezia nu Madiakona; ² Ngasa nu guhuima gukhale nu enue, gudi Nzambi shetu nu Fumu yetu Yesu-Kilisto. ³ Ngudi muhana hamba dia hana gudi Nzambi, mu hugo diagasue di ngudi gumitangiza, ⁴ mu gukombelela guami mukunda nu enue, ngana kombelela nu gusuanguluga. ⁵ Ngudi muhana hamba dia hana mukunda nu gudibungisa mu lukuma lua bonga sendese mu lusugu lua gudiangela unu mangino. ⁶ Ngudi muhaga mutshima egi muthu yagasue wa sendesele mudimo wabonga mukatshi dienu alandule ha gu'umanesela unu mu lusugu lua Yesu-Kilisto. ⁷ Idi yabonga ha ame guvua ngenyi mukunda nu enue agasue, ndaga ya ngudi gumibata mu mutshima wami. Muakhalele mukuta wagasue nu ame mu ngasa nu mu gungina guami mu bologo nu gunguluila nu guya mulongesa lukuma lua bonga. ⁸ Ndaga ya Nzambi udi themua yami mu luholo lu ngami tshigina khungi'enu yagasue mu Yesu-Kilisto. ⁹ Nu ngudi mukombelela ngegi : Guzumba guenu gubalegele luko mu ujiyi nu mu kotelesa. ¹⁰ Ngudi mukombelela egi mujiye gukhaphumuna nu gutomba ndaga jidi jia gubalega gubonga. Ngudi mukombelela luko egi mukhale athu a giamatshidia nu ajiyilego guwambewa mu lusugu lua Kilisto. ¹¹ Idi nji mukunda egi mukhale muazala pha nu mabundu a giamatshidia gidi muza gudi Yesu-Kilisto, mu lutumbu lua Nzambi. ¹² Luenyelu anetu, ngudi mutshigina egi mujiye egi ndaga jinyi jia ngubuila, jia bata lukuma lua bonga gutuama. ¹³ Malenge ami ajiyiwa gudi ataledi agasue agu mbadia mafumu nu gudi athu ako agasue ¹⁴ nu anetu avula atshiginyile mukunda nu malenge nu akhikhile gulongesa mbimbi ya Nzambi woma ndo. ¹⁵ Diago ako adi gu itshita mu giphi nu gikhongo. Uvi ako adi mulongesa Kilisto mu guzumba. ¹⁶ Ago adi mulongesa ndaga jia Kilisto mu guzumba adi mujiya egi ngambiwe haha mukunda nu guluila lukuma luabonga. ¹⁷ Uvi ako adi mulongesa ndaga jia Kilisto nu giphi nu matangi abola. Adi mutangiza egi adi gungu kambela milonga ha ngudi mu malenge. ¹⁸ Uvi inyi yagasue ishigo nu ndaga ndo ! ndaga ya, nga mu giphi nga mu guamatshidia, mbimbi ya Kilisto idi mulongesewa nu mu yene, ngudi musuanguluga. Ayi mba ngudi musuanguluga. ¹⁹ Ndaga ya ngudi mujiya egi yagasue mba isuga mu guzolewa guamai mu bologo. Yagasue inyinyi mba ibua mukunda nu gukombelela guenu nu gukuatesa gua givule gia Yesu-Kilisto. ²⁰ Idi mukunda nu guhaga guami gua mutshima nu gudifelela guami mba ngula gufishiwa ndo musonyi. Yene nji nu makhaso gifua mu masugu agasue nu mangino ngudi gudifelela egi Yesu mba uthuphudiwa mu muila wami, mu monyo nga mu gufua. ²¹ Ndaga ya mukunda nu ame, monyo udi Yesu, nu gufua gudi luta. ²² Uvi gula gukhala nu monyo mu muila gudi muhana mabundu a mudimo wami, ngenyi na ngushigo mujiya itshi ngajiya gutomba. ²³ Ndaga ya ngudi ya gudikhaphumuna mu mashinda wawa ayadi. Ngudi nu nzala ya gukatuga ha mavu wawa nu guya mukhala nu Kilisto, yene idi ya gubalega gubonga ! ²⁴ Uvi nji gusala nu monyo gu muila gudi nji guabonga mukunda nu gubonga gukhala guenu. ²⁵ Ndga ya ngudi ya guhaga mutshima gu ndaga yene nu ngudi mujiya egi ngudi musala nu gulandula nu enue mukunda nunguya guenu gua gutuama nu gusuanguluga guenu mu gutshigina. ²⁶ Ngenyi gudisuta guenu ha guduhala mu Kilisto mukunda nu ame gudi muzala mukunda nu gumuenega guami mukatshi dienu. ²⁷ jingenu nu ginemua gia lukuma lua bonga lua Kilisto. Tshitenu yeyi yagasue hagula egi ha ngudi muza gumitala nga ha ngushigo hene, ngukhale muvua luholo tshi lu mudi ya gukuatagana mangololo mu givule gingoshi. Ngudi mutangiza guvua egi mudi mutshita mudilo hangoshi nu givule gingoshi mukunda nu gutshigina gua lukuma lua bonga. ²⁸ Nu ima yagasue idi mutshita ambalagaji enu, imihanyi ndo woma. ²⁹ Mukunda nu ene, idi gijiyilo gia gubua guawo. Uvi mukunda nu enue idi gijiyilo gia guhuluga guenu gudi muza gudi Nzambi. Ndaga guamihuwe mukunda nu ndaga ya Kilisto, ishigo khuta mukunda nu gutshigina muatshiginyine gudi muene, uvi nji mukunda nu lamba di mua muenene mukunda nu muene. ³⁰ Ndaga ya mudi nu umbalagaji umoshi wene gifua mua umuenene nu ame, nu mba muvua muzuela egi udi nu ame luenyelu.