¹ Yakoba, muenya mudimo wa Nzambi nu wa Fumu Yesu - Kilisto, gudi iphuta kumi nu iyadi yagudimuanga: moyo wenu. ² Zangudienu iphuta kumi nu iyadi yagasue gifua ndaga ya gusuangulugila, aphanji'ami a mala, mahugo mudi mulolewa mu luholo nu luholo. ³ Mujiye egi gulolewa gua gutshigina guenu gudi muhana gudindamana. ⁴ Egi gudindamana gukhale yagutagenesewa mu midimo ya gutshigina, hagula egi mukhale diago yagukula nu yagutagana, nu mukunda mukondigo nga gima gimoshi. ⁵ Uvi gula muthu mumoshi ya mukatshi dienu udi nu funu ya ungambi, awulombe gudi Nzambi, muthu yago wanahana nu gusuanguluga nu ganatunago gudi muthu yagasue udi gumulomba, nu mba udi gumuhana. ⁶ Uvi muene alombe nu gutshigina, gahagigo giphapha nga mu gima gimoshi. Ndaga muthu yagasue udi muhaga giphapha udi gifua mahuhua mu nzadi adi mubatewa gudi fundji nu adi munyigishiwa khanda yagasue. ⁷ Ndaga muthu muene gajiyilego gutangiza egi mba uheta nga gima gimoshi gudi Fumu. ⁸ Muthu ya ngenyi gashigo yatagana mu ndaga jienji jiagasue. ⁹ Egi phanji'a yala ya phuthu aditumbuise mu luholo luenji luaguthuphudiwa, ¹⁰ uvi muthu ya umonyi aditumbuise mu nluholo luenji luagubulumuishiwa, mukunda mba ubalega gifua yaji ya givunza mu foto. ¹¹ Ndaga kumbi dianazoga nu muanya wabala nu wana wumisa givunza. Yaji gianabua, nu gubonga guenji guanatota. Luholo lumoshi luene, muenya umonyi mba utota mukatshi dia guwenda guenji. ¹² Gusuanguluga gudi gua muthu udi mudindamana mu gulolewa. Ndaga hangima dia gukhala yagulolewa, mba uheta giphu gia monyo, giahagewe mukunda nu athu ago atshigina Nzambi. ¹³ Gukhadigo nu muthu gula udi yagulolewa azuele egi :<< Nzambi udi gungulola, >> mukunda Nzambi ganalolewago mu gubola, nga muene ganalolago muthu. ¹⁴ Uvi muthu yagasue wanalolewa gudi ngina yenji yabola, yanagumubata nu gumubuisa. Hangima, hago ngina yabola idi muza, yana buta gubola. ¹⁵ Nu hangima gubola guanakula, guana buta gufua. ¹⁶ Mukhadigo yagudimbiwa, aphanji'ami a mala aguzumba. ¹⁷ Gishimbigo giabonga giagasue nu gishimbigo giatagana giagasue gidi muza gosa. Gianaza gudi Shetu ya muenji. Gudi muene gushigo nga gubalumuga gua gima nga phipha mukunda nu guvuga. ¹⁸ Nzambi waphonene ha gutuhana gubutshiwa mu mbimbi ya giamatshidia, hagula egi tukhale gifua mabundu athomo (agudiangela) a ima yagasue yago muene afugile. ¹⁹ Mudi mujiya, aphanji'ami a mala agutshigina: egi muthu yagasue akhale watagana ha gunengena, mage-mage ha guzuela, nu mage-mage ha guvua khabu. ²⁰ Ndaga khabu jia muthu jiana tshitago ndaga yatagana ya Nzambi. ²¹ Hene bishidienu ndaga yagasue ya majilo nu yaguvula gua gubola. Mu gudibulumuisa, zangudienu mbimbi yakunyiwe, idi yatagana ha guhuluisa monyo wenu. ²² Khadienu atshitshi a mbimbi uvi mukhadigo khuta avi a mbimbi, adi gudi dimba ene hakhawo. ²³ Ndaga gula muthu mumoshi udi muvi ya mbimbi nu gashigo mutshitshi wa mbimbi, udi gifua yala mumoshi udi mutesa phala yenji yagubutshiwa gu githala-thala. ²⁴ Muene udi mutese muene hakhenji nu hangima udi muya nu wajimbila diago luholo akhala. ²⁵ Uvi muthu udi mutala muabonga mu mikhuala ya ukhaledi, nu udi guyitshita, ndo gifua muvi udi mujimbila, muthu muene mba ukhala yaguzela muila mu ndaga jienji jiagasue. ²⁶ Gula muthu mumoshi udi guditangiza egi udi muenya gutshigina, uvi ashigo mutala zuelelo dienji, muene udi mudimba mutshima wenji, nu gutshigina guenji gushigo nu funu. ²⁷ Gutshigina guabonga nu guatagana gutuama dia Nzambi wetu nu Shetu gudi ngegi: khuatesa shiye nu akhetu agafunda mu kumbi adi nu lamba, nu khadienu alaphe mu mavu.