¹ Hene tudi nayo gutshita atashio gu ima ituavile ha gula ibalumuginego. ² Mukunda nu gula mbimbi yago yazuelewe gudi Anjielo yatshiginyishiwe (yatagenesewe) nu uluishi wagasue nu ushagi wazanguile gisombelo gia nu diago, ³ luholotshi mbatudisuega gula tudi mutuna (mu shaga) guhuluga gua koma? Guhuluga guago gua diangele gulondawa gudi Fumu nu gua tshiginyishiwa gudi ago a aguvile. ⁴ Nzambi nji wazuelele mukunda nu guene gu ijiyishilo, nu gu jinzoji nu gu midimo yavula yakoma ya ngolo jiagubalegela ya khaphele muene mu gutshigina guenji. ⁵ Mukunda nu ishigo gudi Anjielo, Nzambi gahanene uhinyinyi gu ndaga jiagasue jia ha mavu mbajiza, mukunda nu jiene tudi muzuela. ⁶ Uvi ishigo mukunda nu ngenyi muthu mumoshi wazuelele gu bugu diko, gu ndaga jiene muzuela egi: << Itshi idi muthu ha gula aye ikhale gu muwunguluga? Nga muna muthu hagula ukhale muzangula ginemo gienji? ⁷ Aye wafugile muthu ndambo ya gubulumuga gudi anjielo, wamutshuigile mu gubinga guaye nu ginemua giaye. ⁸ Wahagele ima yagasue goshia ikanzo yenji.>> Ndaga ya khalele gudi muene ha Nzambi guhaga ima yagasue goshia ikanzo yenji. Gabembelego nga gima gimoshi giakhalele gishigo gu uhinyinyi wenji. Luenyelu, tushigo gale mumona egi ima yagasue idi yaguhagewa mu uhinyinyi wenji. ⁹ Uvi tudi mumona yago wafugile mu konda nu kumbi diahihia goshia anjielo: Yesu yago; mukunda nu lamba dienji nu gufua guenji, wahuwe lutumbu nu ginemua. Ngenyi (hene) gu ngasa ya Nzambi walolele gufua mukunda nu muthu yagasue. ¹⁰ Wakhalele yagutagana mukunda nu Nzambi, ndaga ya ima yagasue idi nu monyo mukunda nu muene nu gudi muene, ha gubata ana avula gu lutumbu. Ya mukhalele yatagana (yabonga) ha gubongesa (gulonda) diago mutuameji ya guhuluga guawo mu malamba enji. ¹¹ Ndaga ya muene wanabongesa diago ago adi gudihana ana katuga gudi gito gimoshi. Mukunda nu ngenyi, gashigo nu musonyi wa gu atamega egi aphanjienji. ¹² Udi muzuela egi: << Mba gungulondolola jina diaye gudi aphanjiami, mba guyimba lutumbu mu katshi dia hungu (thundu).>> ¹³ Nu nji: << Mbanguhaga matangi ami agasue gua (gudi) muene.>> Nunji: << Talenu, ame'owu nu ana ago Nzambi wanguhuile.>> ¹⁴ Hene ngenyi, ndaga ya ana agasue a Nzambi ana khapha musunyi nu mahatshi, Yesu nji wakaphele ima yene imoshi nu ene, hagula egi gu gufua, wazangelele yago wakhalele nu uhinyinyi holu dia gufua, imutshigina guzuela egi Satana. ¹⁵ Yene yakhalele ngenyi ha gula akule (akatule) ago akhalele mulunda nu gufua, abalegele uhiga wawo wagasue. ¹⁶ Ndaga idi yadiago, ishigo anjelo adi muene mukuatesa; uvi, idi ajugulu a Abalayama adi mu kuatesa. ¹⁷ Mu ngenyi, yakhalele yabonga ha muene gudibuisa gifua aphanjiawo gu maluholo agasue ha gula adibuise gifua mukandi wa gudihana nu muenya khenda mu ndaga jia Nzambi nu akhale yabonga ha muene gufila athu abola jikhenda. ¹⁸ Mukunda Yesu muene hakhenji wamuenene dilamba nu walolewe, udi yagutagana ha gukuatesa adi mulolewa.