¹ Na ndaga ya tudi agujietesewa nu matemu avula diago tubishidienu inemo yagasue idi gutunemena nu gubola gudi gututshuiga mu luholo lualeba. Tulengienu jiphushi nu gudindamana guago gudi gu tuama dietu. ² Tushenu meso etu (tutale nono) gudi Yesu, gisendeselo nu muene muenya gutshigina guetu, yago mukunda nu gusuanguluga gutuhagewe ha ndaga yenji wa dindamene ha mutshi wagudikikisa, waseguiluile musonyi nu wadihagele hashi gu koko wa madia gua gife gia ufumu wa Nzambi. ³ Ngenyi, zangudienu yago wadindamene mu giphuta gudi atshitshi a gubola ha uthu wa ji, ha gula egi mudibembelago nga mulebigo. ⁴ Khenji mumagana (mudindamana) gale go unu gu mahatshi nga mua luile mukunda nu gubola. ⁵ Nu muajimbidile mbimbi yazonda yago yamiwambelewe gifua ana: << Munami, usegulula go malamba amunene Fumu nu utotesago jingolo hadi muene gugubela. >> ⁶ Ndaga ya Fumu wanasagesa muthu yagasue yago yazumba muene nu wanahana dilamba gudi mona yagasue yago yadi muene muzangula. ⁷ Mudikolese mu gulolewa gifua mudi guhuminyina.3 Nzambi wanadivisa nu enue gifua ana, ndaga ya mona tshi yago shenji ganamuhua go dilamba? ⁸ Uvi gula mudi mushigo nu dilamba diago didi mukuta wetunwagasue tudi nu dishinda, na mudi diago ana a makangu mushigo anenji. ⁹ Muenyemo, tuakahalele nu atata a hamavu mukunda nu gutuhua dilamba, nu tuakhalele guanemesa. Tuajiyilego gunemesa gubalega Tata ya mu Nyuma ha gula tuajiya gukhala nu monyo? ¹⁰ Mukunda nu atata akhalele gutuhua dilamba ivi yazonda mu luholo luana gutuhua dilamba mukunda nu gubonga guetu, ha gula egi tuajiya guheta nji dishinda gu gubonga guenji. ¹¹ Gushigo nga lamba dimoshi diajiya guhana gusuanguluga, uvi gu gishina yakhala khuta lamba diakola. Uvi gistshinyi giazonda diana buta (diana hana) bundu dimoshi dia giamatshidia gudi ago asagesewe. ¹² Ngenyi koleshenu mago enu agulamabagana nu mabongo enu aguleba (guhuila), ¹³ Nu londienu njila yamagana tanana mukunda nu malu enu ha gula egi yagasue udi muwenda nu gusumbuta, gakhadigo ya gutota, uvi akhale ya guhetewa. ¹⁴ Kambienu guhuima nu athu agasue nu gubonga nji guago gula ndo nga mumoshi gajiyilego gumona Fumu. ¹⁵ Tshitshienu ha gula egi nga mungoshi gaminyiwago ngasa ya Nzambi, nu gukhadigo nga muji ungoshi wabola ukudigo ha guhaga lungu (matululu) ha gula egi avula akhadigo mu ndaga yene. ¹⁶ Muteme ha gula egi gukhadigo nga mungoshi wabola nga udi nu gubhola gifua Ezau yago mukunda nu gudia wadigile ukuluphi wenji wa gudiangela gubutshiwa. ¹⁷ Ndaga mujiya egi gu tuama hago ha gatshiginyine guzangula uhinganyi wa guzela muila, wakhalele yagubingishiwa ndaga ya gahetelego nga gakumbi gazonda ha muene gubalumuna mutshima gudi shenji, nga wamuzonzele nu masoji gu meso. ¹⁸ Ndaga ya mujilego gu mulundu umoshi wajiya gukuatewa (gukandugiwa) mulundu umoshi wajiya guhia tshuya, phipha, matiuta, nu gimbundumbundu. ¹⁹ Muajilego gu gudila gua tenda nga gu dijui gifua gudi ago adi muavua, adi mulomba egi guakhalele go nga itshi y'awambelewe yagubalegela. ²⁰ Ndaga y'akhalele avui ajiya gudindamana yago yahuwe gu mukhuala : << Nga tshima shitu imoshi yakuata mulundu, idi nayo gushiyiwa nu jiseso. >> ²¹ Ndaga ei yakhalele diago yakola hene Mose gadi muzuela egi: Ngudi diago mudiyita (mu phaguta). >> ²² Uvi na muajile gu mulundu wa Siyona nu mu dimbo dia masamba dia Nzambi ya monyo, Yelusalemo ya gosa mu dilu, nu gua Anjelo avula-vula mu makumi nu makumi adi mu gutumbuga. ²³ Muajile mukatshi dia thundu ya agasue akhalele ana a somi mu gubutshiwa, akhalele agusonegewa majina mu dilu, gudi Nzambi mulumbuluishi ya agasue nu gudi ivule-vule ya giamatshidia yago yakholele ya gutagana. ²⁴ Muajile gua Yesu, muzueledi wa ufuta uhe-uhe nu gua mahatshi abundugile ago adi muzuela guzuela guabalega gubonga gu mahatshi a Abele. ²⁵ Dibambienu hagula mutunyigo yago udi muzuela. Ndaga ya gula akhalelego itotshi ha gutuma guvua yago wakhalele muzuela hashi ha mavu, mbatudisuegigo diago gula esue tuavutugilego gudi yago udi muzuela udi mudijiga gosa gunu. ²⁶ Mu kumbi diene dinyi dijui dienji dianyigishile mavu. Uvi luenyelu wahanene dilaji udi muzuela egi: << Mbangunyigisago khuta mavu uvi nu mu dilu. >> ²⁷ Mbimbi jeji : << Hugo diko dingoshi >>, jidi mudijiga gukatshuwa gua ima yago idi munyigishiwa: mu guzuela guabonga ima yago ya fugiwe ha gula egi ima yeyi idi ishigo mudinyigisa go yajiya gusala. ²⁸ Uvi na giwa, tuazanguile dimbo dia ufumu wakoma ushigo munyigishiwa, tukhadienu ajiyi a gubonga guenji, ngenyi, lutumbuishenu Nzambi nu ginemua gienji giagasue nu gudigita. ²⁹ Mukunda nu Nzambi wetu udi tshuya tuana shididisa.