¹ Ha ndaga yeyi ame Paula ngudi muenya bologo ya Kilisto-Yesu mukunda nu enue mushigo enya yuda. ² Ngudi mulegi muavile mudimo wa ngasa ya Nzambi yanguhuiwe mukunda nu enue. ³ Ngudi musonega gifua mu ujiyi wa nguhuiwe. Yeyi idi giamatshidia gia gusuega ngenyi ngagisonegene mu mukanda uko. ⁴ Ha mba mu'utanga mba mujiya ingazanguile mu giamatshidia giene gia suegewe mu ndaga ya Kilisto. ⁵ Mu indongo iko giamatshidia giene giagasue giadijigiwego guna muna muthu. Uvi luenyelu giadijigiwe gudi givule gua apostolo enji nu gudi ago akhalele ajiyi a ndaga jia gusuega diago. ⁶ Giamatshidia giene giasuegewe gidi egi, ago ashigo enya yuda a giamatshidia nu ahinganyi a diago nu enya khapho dia giamatshidia gia muila. Adi a mukatshi dia ago akhalele diago malaji a mu Kilisto-Yesu mu lukuma lua bonga. ⁷ Ndaga ya ngabuile muenya mudimo wa lukuma lua bonga mu khapho dia mu ngasa ya Nzambi yago yanguhuiwe mukatshi dia manyinyi ( ngolo ) jienji jiadimuenegesele. ⁸ Nzambi wanguhuile khapho diene nga tshima ngakhalele yago wabalega guzonda gudi ago akhalele aguhagewa mu lukalo mukunda nu Nzambi. Khapho diedi didi egi ngudi nayo gulondolola ( guzuela ) lukuma lua bonga gudi ago ashigo enya yuda gu umonyi wago udi khenji usengumuwa gale ndo. ⁹ Ngudi nayo gulondolola muabonga gua agasue gudi yakhalele ya gudisuega mu matangi a Nzambi. Yeyi yakhalele mu matangi a gusuega a Nzambi mi indongo yabalegele gua Nzambi wa fugile ( Mufugi ) ima yagasue. ¹⁰ Yeyi yakhalele ngenyi gifua luenyelu,mukatshi dia Ekelejiya, atuameji nu mafumu mafundo a mudilu aze ajiye phala jia vula jia fugiwe gudiangela mu ndunge jia Nzambi. ¹¹ Yeyi mba iza mu luholo lua ivo nu ivo lua taganesele muene mu Kilisto-Yesu Fumu yetu. ¹² Ndaga ya mu Kilisto tudi nu ngolo nu guvula gua gudihana mukunda nu gutshigina guetu gudi muene. ¹³ Ha ndaga eyi, ngudi gumilomba ha enue muhuidigo mukunda nu malamba ami gudi enue. Ene adi lutumbu luenu. ¹⁴ Mukunda nu ndaga eyi, ngudi mufugama ha mabongo gu tuama dia tata, ¹⁵ hehi guago gudi iphuta yagasue mu dilu nu ha mavu walugiwe. ¹⁶ Ngudi mukombelela hagula amihue, mukunda nu gukoma gua lutumbu luenji, hamukolesewe nu jingolo mu givule guenji gidi mukatshi dienu. ¹⁷ Ngudi mukombela egi Kilisto akhale nu monyo mu mitshima yenu mu gutshigina. Ngudi mukombelela egi mukhale ya gujigamana nu ya guhagewa mu guzumba guenji. ¹⁸ Muajiya gukhala mu guzumba guenji hagula muajiya gukotelesa hamoshi nu enya gutshigina agasue, itshi idi guhihia, guleha nu gukoma gua guzumba gua Kilisto. ¹⁹ Ngudi mukombelela hagula mujiye gukoma gua guzumba gua Kilisto, guago guabalegela ujiyi wagasue. Mujiya gutshita ngenyi hagula mukhale aguzalesewa ha mutango wa gutshigina gua Nzambi. ²⁰ Luenyelu, yago udi ya gutagana ha gutshita ima yagasue yagubalega yago itudi mulomba nu itudi mutangiza, mu ngolo jienji jidi mutshita mukatshi dietu, ²¹ gudi muene ikhale lutumbu mu Eklezia nu mu Kilisto-Yesu mu indongo yagasue mukunda nu masugu agasue. Ikhale ngenyi.