¹ Uvi gudi enue, muakhalele yagufua mu guzangela nu mu gubola guenu. ² Idi mukunda nu enyawa muakhalele muwenda mu mahugo ako mu gutshigina gua mavu wawa. Muakhalele muwenda nu gutshigina gua ahinyinyi a mu muhehe. Idi muhehe wa yago udi gu mudimo mukatshi dia ana a muenya gushaga. ³ Esue agasue tuakhalele mu hugo diko mukatshi dia ashigo enya gutshigina. Tuakhalele mutshita mu gutshigina gua matangi abola a mila yetu. Tuatshitshile gutshigina gua muila nu gua matangi. Tuakhalele mu muila ana a mu khabu jiabola gifua athu ako. ⁴ Uvi Nzambi muenya khenda jiavula mukunda nu guzumba guenji guakoma mu guene watuzumbile. ⁵ Muenyomo, tuafile mu guzangelewa guetu, watuzumbile gu monyo uheuhe mukatshi dia Kilisto. Idi mukunda nu gisemo, tuahulushiwe. ⁶ Nzambi watuzugishile gu gufua mukuta wagasue nu watukhalesele mukuta wetu wagasue mu mafundo a gosa mu Kilisto-yesu. ⁷ Watshitshile yeyi hagula mu indongo yago idi muza wajiya gutudijiga gukoma gua ngasa yenji. Udi gutudijiga yeyi mu ndaga ya gubonga guenji mu Kilisto-Yesu. ⁸ Ndaga ya idi mukunda nu ngasa yenji muahulushiwe mukatshi dia gutshigina, nu yeyi ishigo muza gudi enue; idi mulambu wa Nzambi. ⁹ Ishigo mukunda nu midimo hagula muthu wajiya gudihala. ¹⁰ Ndaga ya tudi mudimo wa Nzambi, tuafugiwe mu Kilisto-Yesu ha gutshita midimo yabonga ya Nzambi yalondele mualeha gutuama mukunda nu esue, hagula tuwende mu yene. ¹¹ Wungulugeneu egi hugo diko muakhalele enya yuda gu mila. Muakhalele ya gutamegewa: << Mudi ngulungu >>( mushigo enya mukanda nga ilombola ) ndaga ya yago watamegewe egi ngulungu nga gashigo muenya mukanda watshitshiwe nu mago a muthu. ¹² Ndaga ya mu hugo diene dinyi muakhalele ya gukhaphumuguwa mu Kilisto. Muakhalele enyi gu iphuta ya Isalele. Muakhalele enyi mu ufuta wa enya gutendelela. Muakhalelego nga giamatshidia gimoshi mukunda hugo dia gutuama nga mahugo a gutuama muakhalele Nzambi ndo ha mavu. ¹³ Uvi luenyelu, mu Kilisto-Yesu enue muakhalele gualeha nu Nzambi, muasuenesewe hehi nu Nzambi mu mahatshi a Yesu-Kilisto. ¹⁴ Ndaga ya, udi guhuima guetu. Wabungishile muyadi yabuile gingoshi. Washiyile gu muila wenji gibayi giagi giakhalele gutukhaphumuna, nu phipha; ¹⁵ Ndaga wakatuile mukhuala wa mikhuala hagula egi afuge muthu mungoshi muhe-muhe mukatshi dienji. ¹⁶ Watshitshile yeyi mukunda nu gubungisa iphuta yeyi iyadi gu muila ungoshi mukantshi dia mutshi wa gudikikisa. Nu mutshi wa gudikikisa, washiyile iphipha. ¹⁷ Yesu wajile wamiwambelele ndaga ya guhuima; gudi enue muakhalele gualeha nu guhuima gudi ago akhalele hehi nga ago asuenesewe hahi. ¹⁸ Ndaga ya mu Yesu, tudi muyadi tshima yagutagana gu tata mu givule gimoshi. ¹⁹ Ngenyi, enue mudi mushigo enya yuda, mushigo agonze nu enyi. Uvi giwa mudi adimbo nu ago ahagewa gonze nga hehi nu Nzambi nu enya giphuta gia Nzambi. ²⁰ Muakhalele ya gutungiwa holu dia seso jia' apostolo nu ajiyi a ndaga jia gutuama. Kilisto-Yesu wakhalele muene hakhenji seso ya hakhomo. ²¹ Gudi muene, gubatijiwa guagasue gudi mutshita yagasue nu gukoma gifua inzo ya Nzambi nu ufumu. ²² Idi gudi muene, enue muanginyine ha gutungiwa agasue gifua inzo ya Nzambi mu givule.