¹ Paula mupostolo wa Kilisto Yesu mu gutshigina gua Nzambi gudi asantu a mu iphuta ya Nzambi gu Efeso, nu adi agudindamana mu Kilisto-Yesu. ² Ngenyi ngasa ya Nzambi ikhale holu dienu nu guhuima gua Nzambi shetu nu Fumu yetu Yesu-Kilisto. ³ Ngenyi Nzambi nu sha Fumu yetu Yesu-Kilisto atumbuishiwe ! Muene watuhuile guzela muila, nu guzela muila gua diago mu givule gia bonga mu mafundo a mudilu mu Kilisto. ⁴ Nzambi watutombele gu gisendeselo gia mavu hagula tukhale asantu ashigo nu majilo gu meso enji. ⁵ Nzambi wadiangele gututomba ha gutubuisa anenji mu Yesu-kilisto mu luholo lua gusuanguluga gua diago mu gutshigina guenji. ⁶ Gukudishiwa gudi gutudijiga lutumbu lua gukoma gua ngasa ituahuiwe yakhenda mu yago yazumbile muene. ⁷ Mu Yesu-kilisto tudi ya gukudiwa mu mahayshi nu tudi ya guviwa jikhenda mukunda nu gubola guetu, mukunda nu guvula gua ngasa. ⁸ Wamuangunuishile ngasa yene holu dietu mu ndunge jiagasue nu gutuvuila. ⁹ Nzambi watujiyishile gishina gia gudisuega gua gutshigina guenji mu luholo lua musuanguluishile muene nu luholo lua didijigile muene mu Kilisto. ¹⁰ Mudimo wa Kilisto wakhalele luholo lua gutagenesa kumbi ha gubungisa ima yagasue yago idi mudilu nu hamavu mu uhinyinyi wa Fumu mumoshi mu Kilisto. ¹¹ Mu Kilisto tuahuwe majina a uhinyinyi ( ahingaganyi ) yene inyi yatombewe gudiangela, mu luholo luago yago wanatshita ndaga jiagasue mu gutshigina guenji. ¹² Nzambi watuhuile jina dia ahinyinyi nga ahinganyi mukunda nu tuajiya gukhala a gudiangela ha guheta gudifeela guadiago mu Kilisto, ngenyi tuajiya gukhala lutumbu lua gutumbuga guenji. ¹³ Mu Kilisto, enue nji ha muavile mbimbi ya giamatshidia, lukuma lua guhuluga guenu nu mua mutshiginyine nu muambiwe njimbu nu givule giabonga giamitendelewe. ¹⁴ Givule giabonga gidi gifua njila ya gudiangela ua guhuluga guetu nu uhinyinyi gifua nana a Nzambi mu Kilisto, unu mbatuzangula diago mu lutumbu lua gutumbuga gienji. ¹⁵ Mukunda nu ngenyi, mualeha mu kumbi diene dinyi ngavile guzuelewa gua gutshigina guenu mu Fumu Yesu-kilisto nu guzumba guaye mukunda nu usantu wa iphuta ya Nzambi. ¹⁶ Khenji gabembele gale go guhana hambadiahana gudi Nzambi mukunda nu enue ha gumitanga mu gukombelela guami. ¹⁷ Ngana kombelela egi Nzambi ya Fumu Yesu-kilisto, tata ya gutumbuga, amihue givule gia ndunge nu gumijiyisa ujiyi wenji. ¹⁸ Ngudi mukombelela egi meso a mutshima waye akhale aguphelegetesewa ha aye ujiye itshi idi gudifuelela gua diago hamitamegene muene, wamitamegene nu uhinyinyi wadiago mukatshi dia asantu a iphuta ya Nzambi. ¹⁹ Mu gukombelela guami, ngana lomba egi mujiye yago udi gashigo nu gisendeselo nu gusugishilo gia gukoma gua ngolo jienji mukatsh dia esue tudi nu gutshigina gu luholo lua mudimo udi mutshitshiwa mu ngolo jienji. ²⁰ Idi mu ngolo jiene jinyi Nzambi watuhuile najio mu Kilisto hamuzugishile muene gu gufua nu wamukhalesele hashi gi koko guenji gua madia mu fundo dia mudilu. ²¹ Wakhalesele Kilisto gualeha nu holu dia ufumu nu uhinyinyi, nu ngolo holu dia jina diagasue diasonegewe. Kilisto mba uhinyina, ishigo khuta mu hugo diedi, uvi nu mahugo adi muza gutuama. ²² Nzambi wahagele ima yagasue goshi' ya ikanzo ya Kilisto nu wamuhanene mu Ekeleziya gifua Fumu ya ima yagasue. ²³ Ekeleziya idi muila wenji, guzalesewa gua yago wana zalesa yagasue nu yagasue.