¹ Paula, mulandudi ya Kilisto Yesu mu gutshigina gua Nzambi, nu Timote phanji'etu ya yala, ² gudi enya gutshigina nu aphanji'etu a mala analandula diago Kilisto adi gu Kolosayi. Egi ngasa ikhale nu enue nu guhuima gua Nzambi udi Shetu. ³ Tudi muvutula hambadiahana gudi Nzambi, Sha Fumu yetu Yesu - Kilisto, nu tumulomba nji mukunda nu enue. ⁴ Tuavile luholo ludi gutshigina guenu mu Kilisto Yesu, nu guzumba gunu mudi nawo mukunda nu athu agasue ahagehe mukunda nu Nzambi. ⁵ Mudi nu guzumba gunu mukunda nu gudifelela gudi guagusuegewa mukunda nu enue mu dilu. Muadiangele guvua gudifelela guene mu mbimbi ya giamatshidia, mbimbi yabonga ⁶ yajile gudi enue. Mbimbi yabonga yene imuyima mabundu nu imumuangana ha mavu. Idi mu itshita nji mukatshi dienu sendese lusugu lunu muavile mbimbi yene nu mualongesewe mu ndaga imutala ngasa ya Nzambi mu giamatshidia. ⁷ Idi mbimbi yabonga mu luholo muayivile gudi Epafalase, muenya mudimo gifua esue yaguzumba, udi muenya mudimo wa Kilisto mukunda nu esue. ⁸ Epafalase watu tela maga a guzumba guenu mu Nyuma. ⁹ Mukunda nu guzumba guene, sendese lusugu lunu tuavile ngenyi, tuabembelego gulomba mukunda nu enue. Tuanalomba lusugu nu lusugu hagula egi mukhale muazala nu gujiya gua gutshigina guenji mu ungambi wagasue nu gukotelesa gua unzambi. ¹⁰ Tumulomba hugo nu hugo egi muwende mu luholo lumoshi luatagana lua Fumu, luholo luabonga. Tumulomba hugo nu hugo egi muyime mabundu mu midimo yagasue yabonga, nu egi mukule mu gujiya Nzambi. ¹¹ Tumulomba egi mukhale nu ngolo gu ndaga jiagasue, mu luholo lua ngolo jia lutumbu mu gudindamana nu guhiminyina. ¹² Tumulomba egi muhane hambadiahana nu gusuanguluga Shetu wamihagele muatagana ha guzangula shinda dia ima yahagewe mukunda nu ya enya gutshigina mu mueji. ¹³ Watukatudile gu guhuminyina gua phipha, nu watu tumine gu Ufumu wa Munenji wa Yala waguzumba. ¹⁴ Mu Munenji ya Yala, tuazanguile gutotesela nu jikhenda gua gubola. ¹⁵ Mona Yala udi gifanesa gia Nzambi. Udi mona ya somi ya ima yagasue yafugiwe. ¹⁶ Ndaga nu muene, ima yagasue yafugiwe, ima idi mu madilu nu ima idi holu dia mavu, ima imumuenewa nu ima ishigo mumuenewa. Ikhale nga ife ya ufumu, nga ufumu, nga uhuminyinyi, ima yagasue yafugiwe gudi muene nu mukunda nu muene. ¹⁷ Wakhalele gutuama dia ima yagasue, nu ima yagasue idi guene mukunda nu muene. ¹⁸ Nu muene udi muto wa muila, Ekelejiya. Udi gisendeselo nu somi ya mukatshi dia athu afua; ngenyi udi nu gifundo giagutuama mukatshi dia ima yagasue. ¹⁹ Ndaga Nzambi wamuenene egi idi yatagana hagula egi gukoma guenji gukhale mukatshi dienji, ²⁰ nu ha guvisa ima yagasue gudi ( nu ) muene hakhenji mukatshi dia Mona Yala. Nzambi mba gavutula guhuima mu mahatshi a mutshi wa gukikisa wenji. Nzambi mba uvisa ima yagasue nu muene hakhenji, ikhale nga ima idi ha mavu nga ima idi mu dilu. ²¹ Nu enue nji, mu sungii imoshi, muakhalele anjienjia gudi Nzambi nu muakhalele mbalagaji jienji mu matangi nu mu midimo yabola. ²² Uvi luenyelu, wamivishile mu gufua guenji mukatshi dia muila wenji. Watshitshile ngenyi hagula egi amidijine muasantu, muatagana nu mukhadigo nga nu gubola gutuama dienji ; ²³ gula nga mudi sha muakola mu gutshigina, yagujiga nu muadindamana, mushigo nga gutuna gudindamana mu gudifelela gua mbimbi yabonga yamihuwe gudi muthu yagasue wafugiwe hashi. Mbimbi yabonga yago ame, Paula, ngabuidile muenya mudimo. ²⁴ Luenyelu, ngumusuanguluga mu malamba ami mukunda nu enue. Nu ngazalesa mukatshi dia thumba yami yago idi mukonda gu malamba a Kilisto mukunda nu guzumba gua muila gudi ekelejiya. ²⁵ Idi gudi ekelejiya yene inyi ngudi muenya mudimo, mu luholo lua ginemo gia Nzambi wanguhanene mukunda nu enue, ha gutagenesa mbimbi ya Nzambi. ²⁶ Gigi gidi gamatshidia giagifumbe giasuegewe sendese ivo nu ivo nu indongo. Uvi luenyelu, giamatshidia giene giakhalele giagudijinyiwa gudi athu ago adi mutshigina gudi muene. ²⁷ Idi gudi athu ene Nzambi atshiginyine gudijina umonyi wa lutumbu lua giamatshidia giagusuega mukatshi dia athu ashigo enya gutshigina. Idi egi Kilisto udi mukatshi dienu, gudifelela gua lutumbu ludi muza. ²⁸ Idi muene yago tudi mulongesa. Tumuwambela athu agasue, nu tumulongesa muthu yagasue mu ungambi wagasue, hagula egi tudijine muthu yagasue watagana mu Kilisto. ²⁹ Idi mukunda nu ngenyi ngumutshita mudimo nu ngudi muluisa nu ngolo jienji jimutshita mudimo nu ngolo jiagasue mukatshi diami.