¹ Phaula watamegewe gudi Yesu-Kilisto ha gukhala mupostolo mu ngasa ya Nzambi nu phangietu ya yala Sotene, ² gudi Ekelezia ya gu Kolinto, ago Kilisto wawovele ha ene gukhala asantu, nu agasue ago adi mutamega jina dia Fumu wetu Yesu-Kilisto gu khanda jiagasue. ³ Egi ngasa nu guhuima gua Nzambi Shetu nu Fumu Yesu ikhale nu enue. ⁴ Nganahana masugu agasue ngasa gua Nzambi wami mukunda nu ngasa yago Kilisto Yesu wamihuile. ⁵ Wamihuile guzela gua muila mu ndaga (ima) jiagasue. Mu mbimbi nu mu ujiji. ⁶ Wamihuile guzela muila gifwa guzela guakhalele egi Kilisto wasoluele giamatshidia mukatshi dienu. ⁷ Na luenyelu, mushigo gudifula guhua gua Givule Giabonga (gua nyuma) gifua mudi munenga nu gudifuelela gudijigiwa gua Fumu wetu Yesu-Kilisto. ⁸ Mba umiwunguluisa unu gugisugishilo. Ngenyi mbamukhala ago akatshuwa mu milonga mu lusugu lua gilumbuishilo. ⁹ Nzambi udi uphingua, muene wamitamegene ha gudibungisa (gudifutula) nu munenji Yesu-Kilisto Fumi'etu. ¹⁰ Ngudi gumihua manyinyi (ngolo) luenyelu aphangietu amala nu akhetu, mu jina dia Fumu wetu Yesu - Kilisto yago muatshiginyine enue agasue, nu gukhadigo gudikaphumuna mukatshi dienu. Ngudi gumishinjiga ha gudibungisa mu nyuma mumoshi nu matangi amoshi. ¹¹ Ndaga ya ngavi gudi enya Kolowe egi gudi nu gudinyonga mukatshi dienu. ¹² Luenyelu ngatshigina guzuela muabonga ndaga yeyi: << Gudi ago amuzuela egi: ame ngudi nu Phaula>>, nga << nu Apolose,>>, nga << nu Sefase>>, nga << nu Kilisto>>. ¹³ Kilisto muene udi ya yagudikapha? Idi Phaula wahagewe ha mutshi wagudikikiksa mukunda nu enue? Muabatijiwe mu jina dia Phaula? ¹⁴ Ngudi muhana hambadiahana gua Nzambi egi nga batijilego nga mumoshi mukatshi dienu, gukatula Klispusu nu Gayusu. ¹⁵ Hagula egi muthu mumoshi guzuela ndo egi wabatijiwe mu jina diami. ¹⁶ (Ngabatijile nji enya mu vumo dia Setifano diagasue. Gu ngima dia ngenyi ngushi go muwunguluga go gula nga batijile athu ako). ¹⁷ Mukunda Kilisto gabgutuminego mukunda nu gubatiza, uvi mukunda nu gulongesa mbimbi yabonga, ndo nu mukunda nu ungambi wa athu, ha gula egi mutshi wagudikikisa wa Kilisto ukhadigo wa gituhu gu uhinyinyi wenji. ¹⁸ Mukunda mbimbi ya mutshi wa gukikisa idi yagubalega guvula gudi ago adi mufua, uvi mukatshi dia ago Nzambi ahuluisa, muene mudi uhinyinyi wa Nzambi. ¹⁹ ndaga ifdi ya gusonega egi: << Mba ngumwanga ungambi wa angambi. Mba ngu dimbaganesa gutema gua enya ndunge.>> ²⁰ Guyi gudi ngambi? Guyi gudi muthu walongesewe? Guyi gudi muthu menya iphapha ya mu mavu wawa? Nzambi gabalumudilego gutema gua mavu wawa mu maluiyi? ²¹ Buile hago mavu mu gutema guawo ajimbidilego mukatshi dia lukuma lua muenegene gifua ndaga ya gituhu gudi ako ago adi mutshigina gudi muene. ²² Enya Yuda adi mulomba ijiyilo ya gushimana (ya ipha) nu enya Geliga adi mukamba gutema (ungambi). ²³ Uvi tuanulongesa Kilisto yago wahagewe ha mutshi wagudikikisa, seso imoshi ya gikhakhuishilo mukunda enya Yuda nu maluiyi mukunda nu enya Galiga. ²⁴ Henyaha gudi ago Nzambi gatamegene, enya Yuda nu enya Galega, tuanalongesa manyinyi nu gutama gua Nzambi. ²⁵ Ndaga maluiyi a Nzambi adi agubalega gutema gua athu, nu guleba guenji gudi gua gubalega jingolo jia athu. ²⁶ Muzangule nu mutshima umoshi gutamegewa guenu aphangietu a mala. Mukatshi dienu azonda ago akhalele ngambi mu luholo lua athu. Azonda mukatshi dienu akhalele agubalega ji ngolo. Azonda mukatshi dienu akhalele amonyi ya gubutshiwa. ²⁷ Uvi Nzambi watombele ima ya maluiyi ya hamavu mukunda nu guhana musonyi gudi enya ungambi. Nzambi watombele yago idi ya leba hamavu mukunda nu guhana gu adi nu jingolo. ²⁸ Nzambi watombele yago idi yazonda nu yago idi musanginyigiwa hamavu wawa. watombele ima yago idi mumuenega egi idi ya gituhu , mukunda nu gumanesela yago idi mudijiga egi idi ngolo. ²⁹ Watshitshile ngenyi ha gula egi nga muthu mumoshi ndo gaditumbuisago gutuama dienji. ³⁰ Mukunda nu yago Nzambi gatshitshile, luenyelu mudi mu Kilisto Yesu, yago udi mukunda nu esue ungambi wajile gua Nzambi, giamatshidia gietu, usantu wetu nu gulembudiwa guetu mu uhiga, ³¹ Hene gifua idi yagusonegewa egi: << Yago udi gudishimana, adi shimane mu katshi dia Fumu.>>