¹ Kana wo wa lemfuki ya ankum a wo mpi n'ankum a mbumater, walemfuki, mpi wawong djwi n'etshia e wuo. ² Kana wo wakwon ntuba vii apwo djwi na vear, nduur ashia, na ngya na lutondo ya vear, wajii nkra ngie ne viy a vear. ³ Djwi na su semie mpi, si kayugaka ve, mpi sikalemfukaka. Djwi na su, avey su mbug emuu, akum su wamfum na vii a luzingu. Ayisu vear afwetewo ntun, mpi sikayiaka na ngaagn sug na sug. ⁴ Kansi, ntangu wuo e Nziam, Ngulusi esu, ti ngaagn ende djwi na vear apwiwo ne viy a vear, ⁵ amitevuga, epa djwi n'etshia esu e wuo ekieakasu, kansi djwi na ngy ende. Amitevug ne mbug e mbotika e luzingu empa e Mpeve-Santu. ⁶ Nzeam atshiag Mpeve-Santu mingi na su ne mbug e Yezu Kristu Ngulusi esu. ⁷ Akiinde gaagn, na ngrasia ende, djwi sisakum vear amisaviya luzingu e mvue na mvue ne mbug e lukwikilu. ⁸ Otuba one eli djwi djwi. Ndeang ojir vii ane, djwi vear amidjir Nzeam wakii etshia e wuo, watsug nteang e wo. Vim ane eli wuo ti mfunu djwi na vear ankum. ⁹ Tun esiy na ntshim i vear, oshuru, ashia alir enkwon, djwi eli mpama, kaku mfunu ve. ¹⁰ Yug otingnianga mbala emog, ti mbala ipe, wur enkum elenami vear ne kati egnu, lur nde, ¹¹ mpi jia yiyen wur enagn amilim ne mbug e wuo, mpi alekii masumu mpi ayen ndemie vii apwo alekinde. ¹² Ntangu esotuma me Artemas ti Tichik, kie eveang yag ondii oli me ne Nicopolis etay emivey me nginu i gneme n'owaa ene. ¹³ Kie eveang, wong ekien e Zenas, wur ejia enkwon, ti Apollos, djwi wapikug nkwon vim emog ve. ¹⁴ Vear asu wa fwete na ndonguka na nkieka vii a wuo djwi na nsarisa vear na mpay iwo djwi wa kakwon ngwur mbeam. ¹⁵ Vear ankum ali wa me watotuma mbea. Pea mbea ya vear ankum ateleang ne lukwikilu. Ngrasia eyii ya gnu gnankum.