¹ Ne Ntangu eyike vear abag ewu, nziya emog ashwiwo ne wiya. Wur emoge Beteleem e Yuda, ti wear nde to aman ande ampeam ape, watsa nkie ivim i nshuu ne buu e Moab. ² Dzin I wur ewo ayiwo Elimelek, mby wear nde dzin once Naomi, mby aman ande ape, emog Maklon, emuu Kiljon. Ayiwo ne okuu o Efraim, ne Beteleem e Yuda. Ntangu emikum wo ne buu e Moab, s'apierikiwo kog. ³ Elimelek, wum e Naomi, awa, asatsuga na aman ande ape ampeam. ⁴ Watsug ankear a Moab, emog dzin once Orpa, mby emuu Ruti. Apierikiwo kog ata mvwe djum. ⁵ Maklon to Kiljon Wawa mpi wankeape, Naomi atiwuo wum to aman ande ape. ⁶ Mby nde ti akiu ande s'ayimiwo, walim ne buu e Moab, djwi ayug nde me Moab wuwun Yaweh atilir buu ewo, atisapea vim a nda mpiog. ⁷ Apwe ne ondii oyipierikinde, ti akiu ande ankear, wakir mbug s'alekeyiki wo buu e Yuda. ⁸ Naomi atuba nda akiu ande ankear ndenden: "Kea ntsagni wur na wur n'evuru e mea nde! Yaweh aki vii a wuo nda gnu, oshin oyikignu ya vear amiwa ti ya me! ⁹ Yaweh aki wur na wur atsi ngyor ne evuru e wum nde!" Mby apea mwaa. Wadzama aluu na biu; ¹⁰ mby watuba wa nde wuwun: "Kaku, siletsu ti his, etay eli atwung ayie." ¹¹ Naomi atuba ndenden: "Kea ntshimagni, aman ame! Djwi na nge eleang gnu oyagni ti me? Nge n'ipfugn ime oyenagni ndi na aman a,peam asikug ngyia awum agnu? ¹² Tshimagnim aman ame, tshwagagni! Ntikum ognugn, mpafitsug wum emuu ve. Yug mituba memen: 'Ndi n'ekaagn, ata otshuu o lwo ene asivea me wum, mpi asiwur me aman ampeam,' ¹³ asileang gnu na nkwung tiiko ntangu eyafuye wo, okwon ntsugagni awum agnu? Kaku ve, aman ame! ogniang eli djwi na gnu emikum me na ngy entsign, n'ewuo e Yaweh emintag me ngean." ¹⁴ Kansi wo, wakea ndzama aluu kaku mpila. Orpa apea okiu nde mwaa, kansi Ruti asakama ko ti nde. ¹⁵ Naomi atuba nda Ruti ndenden: "Yen, mpivar yie ndean alekey ntsa etay eli atwung ande mpi etay e wanzeam inde, kea ntsa kamsi mpivar yie ene." ¹⁶ Ruti akeara ndenden: "Oyantum me na biu ve djwi mosossiangi yie! Etay enkeankum esitsa yie me mpi ndtsu, ondii osigneme yie, asigneme me; atwung ayie asikum wo atwung ame, Nzeam eyie asikum nde Nzeam eme; ¹⁷ ondii osiwa yie, asiwa me, mpi asimpfugn wo ko neti. Yaweh aki oshin oleang nde, yug epa ko ewa esitenama me ti yie!" ¹⁸ Ntangu emiyen Naomi inaagn ndenden aletsu ti nde, s'asiangi nde. ¹⁹ Mby s'atshiwo wape tii eyikum wo Beteleem. Ntangu emishwe wo ne Beteleem, wiya opfugn egnug djwi na wo, ankear wayue wuwun: "Ene ndug Naomi?" ²⁰ Akeara ndenden: "Oyafi mviagni Naomi ve, omviagni Mara, ogniang Nkea Biu amingyura me na ngy. ²¹ Ayikime n'otsun ntangu emitsa me, kansi atinkeara ko mbwo mpama. Mby djwi na nge esimvie gnu me Naomi, ntangu eli Yaweh amitubavii apwo nda me, mpi Nkea Biu amimpea me ngy?" ²² Enagn wog oshin oyikey Naomi yim Moab, nda okiu nde Ruti, onkear oyim Moab. Akum wo ne Beteleem ko ne ntangu ekeaga wo mbeam i orje n'ivur.