¹ Itsin oshwong o wuo e Yezu Kristu Mon e Nzeam. ² Oshin emifugni wo n'onkean e ngunsa Esaya: "Lir, ndatum ne nteang eyie longi eme, na ngwong mbug eyie; ³ Eli otuba e wur eletsug olie ne buu e ndzum: wongagni mbug e Nkum, dzubagni abulu ne wambug inde.'" ⁴ Yoane apwinde, apikinde mbotika na nsuy itura, mpi alongikinde vii a mbotika e ntshima etura, djwi na ndolula e masumu. ⁵ Okiri onkum e Yudea ti vear ankum a Yerusalem atshikiwo etay ende. Aveyikiwo mbotika ne nzey e Yordani mpi akikiwo mfunguna e masumu iwo. ⁶ Yoane ayinde n'eleam e viey e shamo, okaba epuy e gnam n'ikini inde. Alikinde abampay na mpag. ⁷ Alongikinde, ndenden: "Wur eley mby eme andenga na biu, mpi me mpikug ve n'ongama eshing e sabata inde. ⁸ Me, ndopeagni mbotika e vay; nde, ayopeagni nde mbotika e Mpeve Santu." ⁹ Ne nshuu inagn, Yezu ayum nde Nazarete ne buu e Galilea, mpi ayinde mvey mbotika etay e Yoane ne Yordani. ¹⁰ Ntangu eyipwinde ne vay, ayen olung etingam mpi Mpeve Santu akr ne dzug inde kamsi nkodima. ¹¹ Mby, otuba omog etuba eyum olung: "Ene eli Mon me e nsia, ya nde mitsug ngaagn eme enkum." ¹² Mby Mpeve Santu atum Yezu n'oshwi, ¹³ Mpiog, akie nshuu oning, djwi satana opii mpukumuna. Ayinde ti wagnam okwun, ti banzio eyosarisike. ¹⁴ Ne mby emitshung wo Yoane, Yezu s'ayinde Galilea, alongikinde oshwong o wuo e Nzeam. ¹⁵ Atubikinde: "Ntangu etikug, mpi ekub e Nzeam etivanga. Tshimagni itura, mpi djiragni oshwong o wuo." ¹⁶ Ntangu eyilegikinde mbeama na nzey e Galilea, ayen Simoni ti Andre, otwung o Simoni, watwomo oshing ne nzey; djwi ayikiwo vear alob nse. ¹⁷ Yezu atuba nda wo: "Ondjiagni, mpi asikum gnu vear alob vear. ¹⁸ Ko ne ntangu enagn, wasianga eshing ewo, mby wosodjie nde. ¹⁹ Ntangu emikum Yezu etey, ayen Jaki, mon e Zebede, ti Yoane, otwung onde, ayiiwo ne war wawong eshing ewo. ²⁰ Mby s'avinde, mpi wasasianga Tea wo Zebede ne war ti vear otshia, wosodjie nde. ²¹ Mby watsa Kapernaum, mby eshuu e sabat Yezu ashwe ne sinagoga, mpi along . ²² Vear ayen wo ngituka n'along ande; djwi na alongikinde n'ekub, epa kamsi walong i nsiku ve. ²³ Neti e sinagoga ayiwo na wur emog eyi na mpeve epwo, mby atsug olie ndenden: ²⁴ "Vii awo nge eli su na wo ti yie, Yezu e nazarete? Ayiyie nendien djwi na ntedjag su? Ndajia nagn eli yie. Oli osantu o Nzeam. ²⁵ Yezu s'ogniangi nde, atuba ndenden: "Tshung odzum, mpi pwe ne djuug i wur ene. ²⁶ Mpi mpeve epwo enagn epwe ne djuug i wur enagn, ologo ne buu, mpi atsug olie e biu. ²⁷ Vear ankum wayen ngituka, wasayue wog na wog wuwun: "Ene nge? along a mpa na ekub? Atuba nda wampeve ipwo, mpi walemfuka! ²⁸ Mby lokumu ende epagn n'endii enkum eyi pipi na Galilea. ²⁹ Ntangu emipwewo ne sinagoga, watsa n'evuru e Simoni ti Andre, ndwong emog ti Jaki nda Yoane. ³⁰ Mby okiu e Simoni ayinde ngivur, ayinde na jing. ³¹ Mby s'ayinde, akir onkear owo n'ewuo, s'ayiminde; jing eshir ko ne ntangu enagn. Mbiy onkear onagn s'apiinde vim a nda. ³² Epiekwo, vuna etijie, wojie vear ankum a nkeang ti vear ali na mpeve ipwo. ³³ Mby vear a wiya enen enkum wayia njuo to ne nteang epfug. ³⁴ Avuga vear a nkeang eshin n'eshin; akma mpi mpeve ipwo entsing, akapea nsua e ntuba, djwi walojia nde. ³⁵ Abiy ne lii-lii, ayiwo mpib etoshir ntete ve; atsa n'ondii onde emog eyitshikinde ndemie djwi na nsama. ³⁶ Simoni nda vear ayiike wa nde wosoling. ³⁷ Mby ntangu eyoyen wo, watuba wa nde wuwun: "Vear ankum ane waloling ko yie." ³⁸ Mby nde akeara ndenden: "Nsoagni etay emuu iky, ntsi ndong along mpi. Eli djwi na wo eyipwe me na ngya nendien." ³⁹ Mby atsa ne Galilea enkum, alelong ne wasinagoga iwo, mpi alekmi wampeve ipwo. ⁴⁰ Wur emog e nkeang i ndwum ayinde etay ende. Afukama ne nteang ende, atuba ndenden: "Yug oleang, osikug nkie djwi djuung ime itiem." ⁴¹ Yezu, ayug ngy, ashima ewuo, okir, mpi atuba: "Ndaleang, yia ngitiem. ⁴² Ko ne ntangu enagn, nkeang e ndwum elim, mpi akum ngitieme. ⁴³ Yezu atuba nda nde biu, mby osianga s'akien nde. ⁴⁴ Mpi atuba nda nde ndenden: "Oyakaba ata wur vii ane ve, kansi tshwag etay e wanganga-Nzambi woyen, mpi pea makabu iyie oshin otuba nsiku i Moize, djwi esayia ntiegn djwi na wo." ⁴⁵ Kansi wur ene, eyikiende, abana nkab ya wur enkum vii ayitubiwo ya nde, mby Yezu akafikug ve na nkien ne viya inen imuu. S'asanditsuga nelien, n'endie ende ndemie, mpi vear ayum etay n'etay ayikiwo etay ende.