¹ Ne ntswi inagn, nkum e buu, Sezara Augusutu apur onkean e nsiku djwi na ntanga isuu avear ne buu opfugn. ² Mbala enteang etanga wu avear, ntang enagn Kirinusu ayinde nkum ne Siria. ³ Wur na wur alitswikinde mfugni dzin inde ne weande. ⁴ Yezefo mpi s'atshwinde Beteleme ne buu e Yudea, ayim nde Nazareta ne ne buu e Galilea, djwi ayinde wur okuu o Davidi. ⁵ Ayia ondii enagn djwi wafugni dzin inde nda Mariya, onkear elingikinde iviya, mpi ayinde na dzim. ⁶ Ntang emikum wu, ntswi ingur e Mariya itikug. ⁷ S'awurnde mon nde eteang ompeam. Odzub ileam, s'oviyinde ne ebay epiawo ameme vayi, djwi ondii ekayia djwina wu na mvur n'evur angingien. ⁸ Etitin enagn, ayiwu n'avear eliliyiki ameme n'ivur amuu pipi na katikati otshuu. ⁹ Mbi wanzio e Nzeam apwe, nkembo e Nzeam adzub ne kati, wayug womo entsing. ¹⁰ Wanzio atuba nda wo ndindin: " Oyayugagni womo, djwi ntiyia onkabagni otshong owuo esipea kiese n'avear ankum. ¹¹ Lwo ene ne wiya e Davidi, watowuragni ngulusi, nde ali Kristo Nkum. ¹² Ayojiagnu na kidimu ine: Asiyen gnu mon emibutama watodzub ileam, watoviy n'ondii etsawu ndiy ameme. ¹³ Ne mbal'emog, wanzio ensing eyim dzug wayia mbeama na wanzio enagn wakumisa Nzeam wuwun: ¹⁴ " nkembo eyi na yie Nzeam e dzug, ngemba ne buu n'avear aleang nde." ¹⁵ Ntang emilim banzio na nkea ntsa dzug, vear alir ameme watuba wog na wog: " Ntswagni Beteleme, sitotsa ndiragni viy amilong mpiog, viy amikab'avear Nkum." ¹⁶ Mbiy s'etshwiwu eviang eviang wayen Mariya na Yozefo, na mon ativur n'ondii etsande ameme. ¹⁷ Ntang emiyen wu mon ewu, s'atswiwu nkamba avear amuu viy eyakabi angelu djwina mon enagn. ¹⁸ Avear ankum eyayug wayen ngituka na viy eyakabiki avear alir ameme. ¹⁹ Kansi Mariya awumikinde viy awu mpi alekanikinde n'etura ende. ²⁰ Avear alir ameme wakea nkien, ne mbug eletshiwu, walepiy nkembo ti lukumu na Nzeam djwina viy ankum emiyug wo na amiyen wo, ko otsin emog na viy eyakabiwo. ²¹ Ntang emikug ntshwi iniani, ntang ebag wu mon dzug etikog, s'opiy wu dzin i Yezu, dzin eyisalag angelu ntang eyi meande atovey djim. ²² Ntang eyikug ntswi e nsuyi dzug, n'otsing elong nsik'i Moyisi, Yozefo nda Mariya s'ovari wo ne tempelo e Yeruzaleme djwin'ongienge na Nkum, ²³ otsin emipfugni wo ne nsik'i Nzeam: Mon ompeam enkum e nsom'eteang ayopeawu na Nzeam, " ²⁴ Djwi wapiy epeab eman e nkodima ape, otsin eyifugniwo ne nsik'i Nzeam. ²⁵ Ayikiwo na wur emog ne Yerusaleme dzin inde Simeyona, ayinde wur e masonga mpi alurikinde Nzeam, akungikinde eshwi e Nzeam ayashirande ngiy n'Israyele, mpi Mpeve Santu ayi ne kat'ende. ²⁶ Mpeve Santu okabinde ndindin: apayawa ve yu atoyen Kristo emitum Nzeam. ²⁷ Mpeve s'otum nde ne Tempelo.Mpi ko ntang e Tea nda meande wayia wa mon ewu Yezu djwina nkokisa otsin etum nsiku, ²⁸ Simoni ayama mon ne mbwo inde, atuba: ²⁹ Opean Nkum, sianga wur eyie otshia atsu na ngemba otsin eyitubiyie. ³⁰ Djwi viy'ame atiyen ngulusi, ³¹ ngulusi emitumayie vear a buu enkum, ³² kamsi mwinda djwina mpea nsemo ne buu enkum kamesi nkembo i Israyele buu eyie. ³³ Tea nda meande ayiwu na kiese ensign na ngyug viy ayitubikiwo djwina mon. ³⁴ Simeyoni asampula wankum mpi atuba na Mariya mea emon: " Lir mon ene atiyia djwina ndogo mpi djwina ndjir avear entsign n'Israyele, ayayiande kidimu eyavara nteme ne wiya ³⁵ djwina yie ipaga ayotuna wo etura djwi na ngind'ivear entsign emizuba n'itura ipwi n'elien." ³⁶ Ayiwu na mbikudi emog onkear dzin'inde Ana, mon e Famwele n'okuu e Aser,otsug wo atoji'ampeam, azinginde nvwe ishambia nda wum nde mbiy wum awa, ³⁷ emisanditswa ntsakwi mpi na nvwe oniani n'inigni akampwaka n'elien e Tempelo, akiyikinde k'otshi'o Nzeam mbiyi n'otsuu ne nkn okio ti ne bisambu. ³⁸ Nde ko akum ko ntang enagn, akumisa Nzeam mpi atuba viy a Yezu n'avear ankum eyikungiki evug e Yerusaleme. ³⁹ Ntang emishir wu nkie viy ayitubi nsiku i Nkum, Yozefo nda Mariya s'eyikeyi wo Nazarete wiy'edwo ene, ne buu e Galilea. ⁴⁰ Mon ayiwu alefwi, mpi alekum biyu, ayinde ngiywo na ntiegn mpi grasia e Nzeam ayikiwo na nde. ⁴¹ Bibuti i Yezu aletswikiwu nvwe inkum Yerusaleme djwin'okina o Pake. ⁴² Ntang emikum nde nvwe djum n'ipe watsa diaka Yerusaleme otsin oyilomiki nsik'okina o Pake. ⁴³ Mbiy ntang eyileg nshwi, ntang elekeyiwo, mon Yezu ayitsatswa na Yerusaleme, tea ti mea wakajia. ⁴⁴ Ne ngind'iwu ajiwo wuwun alekeyi mbug emog nd'iwur'inde. Ntang emikien wu eshwi opfugn, bibuti wobana n'onding eaty avear ejiawo. ⁴⁵ Ntang ekoyen wo , wakiya Yerusaleme n'onding. ⁴⁶ Ne mbiy e nntsw'isar, woyen ne tiy e Tempelo ne kati e walong'i viy a Nzeam, ayug viy awu mpi alayuy viy. ⁴⁷ Vear'ankum eyoyugiki wayituka djwina na wagn'ende mpi djwina mvutu elekearikinde. ⁴⁸ Ntang emoyen tea nda meande wayituka, mpi mea atuba: " Mon me, djwina nge emitekie yie ngwign? Yen teayie ti me sitiyen mpay djwin'onding yie." ⁴⁹ Otuba ndawo ndindin: Djwina nge elendingiki gnu? Okajiakagni gnu gnu mfwete nkie otshi'o Teame? ⁵⁰ Kansi ne wagni ewo wakajia kisongidila e viy ayitubinde nda wo. ⁵¹ Mbiy s'akeyinde ntsa ndawo mbug emog Nazareta, mpi alelemfukinde ndawo. Meande alewumikinde vi'anagn n'etura. ⁵² Kansi Yezu alefwikinde na wagn, n'onen e djung, na ngrasia ne nteang e Nzeam ti ne nteang'avear.